The Definitive Guide to Living in the Capital , Cairo , Egypt

مع بداية فصل الصيف، مافيش أحسن من تضبيط حديقتك بأدوات جديدة. لكل واحد يحب يعيش فى بيت مفروش بشكل جميل بلمسة مودرن شكلها شيك، المحل العصرى “كالا –Kalla” فتح أحدث فروعه فى مول أمريكانا بلازا الشيخ زايد.

بتقديمه لمجموعة متنوعة من الأثاث المعاصر المناسب للأماكن المقفولة والمفتوحة، تقدر تلاقى تقريبًا أى حاجة ممكن تخطر على بالك.

صحيح المكان شكله منظم ومساحته كبيرة تسهل الفرجة بطريقة مريحة، المشكلة أن المعروضات كانت موزعة بشكل عشوائى وده يصعب من التدوير على حاجة بعينها.

معظم المنتجات الموجودة ألوانها تناسب فصل الصيف، وفى نفس الوقت مش مبالغ فى ألوانها بحيث تحتفظ بأناقتها، درجات من الرمادى الخفيف، والأبيض السمنى ودرجات رقيقة من الأزرق والأخضر، كل دول عاملين خليط لطيف مع الألوان الصيفية الجذابة.

وقت زيارتنا كان معروض عدد بسيط من الكنب لغرف المعيشة، منها كنبة مودرن على شكل حرف L لونها بيج وكافيه (9990 جنيه) شكلها تحفة ويزينها عدد من المخدات عليها أشكال ملونة أسعارها بين 175: 185 جنيه وكام واحدة سادة سعرهم بين 55: 65 جنيه. جنب الكنبة شوفنا ترابيزة جانبية من الخشب الغامق (2900 جنيه) عليها أباجورة يدوية من الخوص (750 جنيه). كل المعروضات كانت ذوقها قريب من بعض بحيث يخلى شكل المكان متجانس.

عدد قليل من البين باجز beanbags كان مُوزع وسط المحل، شوية منهم سادة، بس ألوانهم ملفتة للنظر (490 جنيه) أما الباقيين كان يزينهم رقع بارزة شكلها لطيف (550 جنيه).

قسم كامل مخصصينه لفرش السرير والحمام، يكمله مجموعة من الفوط الطرية أسعارهم بين 25: 90 جنيه، ومن أبرز الحاجات الموجودة لحاف برُقع ملونة سعره غالى حبتين (1350 جنيه) ومستلزمات حمام أساسية أسعارها بين 145: 250 جنيه.

مجموعة متنوعة من مستلزمات الأكل والترابيزات برضه موجودة. شوفنا أطقم كوبايات (25: 35 جنيه) بأشكال وأحجام مختلفة، أطباق فضية غالية شوية (485: 950 جنيه)، صوانى شاى فضية أسعارها بين 138: 166 جنيه ومجموعة من الشموع شكلها عصرى.

“كالا” فى الشيخ زايد أكيد بـ يقدم مجموعة ضخمة من الإكسسوارات المنزلية الرائعة؛ باختلاف أشكالها وألوانها، منتجاتهم بجد مثالية للاحتياجات اليومية من مستلزمات البيت والديكورات الأساسية.