The Definitive Guide to Living in the Capital , Cairo , Egypt

مفيش بيت في العالم تقريباً مافيهوش كوتشي «كونـﭭـرس» واحد أو أتنين،
الأطفال والكبار رجالة وستات، البداية كانت مجرد كوتشي كرة سلة سعره رخيص يقدر يشتريه
البسطاء، بس دلوقتي بقى علامة للستايل والموضة في العالم كله، ومصر مش إستثناء
للموضوع ده. الناس اللي بـ تعشق الاسم ده عارفين انه محدش بـ يشتري واحد جديد إلا
لما القديم بـ يدوب ويتقطع، وكل ما بـ يقدم بـ تزيد معزته عند اللي لابسه، بس لسه
صعب جداً أنك تلاقي كوتشي «كونـﭭـرس» في مصر في أماكن كتير.

أخيرا بقى فيه دلوقتي محل أو توكيل رسمي ممكن تشتري منه كوتشيك المفضل في
القاهرة، أول فرع لـ «كونـﭭـرس» فتح في مصر الجديدة في شارع الثورة، المحل صغير
ومش باين قوي بس هو موجود تحت محل «دانيال هشتر – Daniel Hechter» وجنب محل «ماكس مارا –
Max Mara».

المحل نفسه بسيط ولايق على فكرة الـ «تشاك تايلور – Chuck Taylor» البسيطة برضه. التصميم البسيط ده والمنظم في نفس
الوقت بـ يخلي كل حاجة سهلة في المحل ومفيش متاعب في الفرجة أو الشراء. ودي حاجة
بـ تميز المكان عن محلات أحذية كتير في القاهرة. الأرفف عبارة عن مربعات خشب في
الحيطة جوة كل مربع فردة واحدة من الكوتشي الـ «
كونـﭭـرس »، وفيه أرفف خشب عادية
عليها أحذية تانية. الحوائط عليها كتابة ورسوم جرافيتي والإضاءة ظريفة وهي عبارة
عن لمبات عليها غطاء باللون الاسود متعلقة من السقف، وأي حد بـ يحب الستايل
المودرن الغريب شوية هـ يحب ده.

الـ تشاك تايلور اول ستار Chuck Taylor All Star – وده اسم المنتج بالكامل بالمناسبة – بـ يتعرض بموديلات  مختلفة منها العالي والبسيط اللي سعره أقل. فيه
موديل اسمه دكتور سويس Dr Suess للأطفال
سعره 320 جنيه وموديل بناتي رائع للشكل التقليدي للكوتشي لونه أخضر وبرقبة عاليه
سعره 350 جنيه، وموديلات وألوان كتير زي الأصفر الباهت والبنفسجي والنبيتي أسعارها
250 جنيه.

وبعيد عن الموديلات اللي عليها رسومات عشوائية وألوان وموديلات ﭼـاك بيرسلJack
Purcell التقليدية الوقورة شوية، لفت
نظرنا كوتشي مميز جداً من الجلد الأسود ونعله أسود، عليه من فوق 4 أبازيم من الجلد
الرفيع برضه، شكله فعلاً جرئ وشيك قوي بس سعره برضه جرئ (899 جنيه).