The Definitive Guide to Living in the Capital , Cairo , Egypt

فى رمضان اللى فات استمتعنا جميعًا بعمل وصفناه أيامها بأنه المسلسل الأفضل على مستوى كل المسلسلات اللى تم عرضها فى رمضان، المسلسل ده اسمه “رقم مجهول” وأثار أيامها ضجة كبيرة من حيث الإخراج المتميز والتمثيل الأكثر تميزًا.

فى مشاهدتنا المبدئية لمسلسل اسم مؤقت كنا واثقين أننا أمام حالة اقتباس وتكرار بالمللي لكل تفاصيل رقم مجهول، حتى بنفس أبطاله وطاقم العمل المشاركين فيه وعلى رأسهم المخرج أحمد نادر جمال اللي أخرج العملين المتشابهين. وربما كان المختلف المرة دي هو اسم المؤلف المجتهد “محمد سليمان عبد المالك” اللى قدر ينسج شكل مختلف وجديد للرواية، يظل يفكرنا باللى حصل فى رقم مجهول وفى نفس الوقت يحتفظ برونقه ورائحته الخاصة فى العمل المتميز.

مع الوقت بدأ يتولد عندنا شعور مختلف أن رغم التشابه المبدئي فى أسلوب الإخراج والموسيقى التصويرية وحتى أسلوب الإخراج التليفزيونى فى الاستعانة بالمشاهد السابقة من الحلقات السابقة لتذكير المشاهد باللي حصل وغيرها إلا أن يبقى للمسلسل طعم ونكهة مختلفة عن سابقه.

المسلسل بـ يحكي عن رجل الأعمال يوسف رمزى (يوسف الشريف) اللى بـ يرجع لمصر بعد رحلة طويلة إلى إنجلترا، وبـ يتعرف على مضيفة جوية جميلة (شيرى عادل) وتباغته الأحداث بحادث كبير بـ يفقد على أثره الذاكرة، ثم بـ يصحى علشان يكتشف أن الحياة بشكلها اللى كان يتصوره اختلف 180 درجة! مش عاوزين نحرق عليكم الأحداث أكثر من كده علشان يبقى عندكم دافع تتابعوا المسلسل يوميًا.

ملاحظين حاجة كنا تكلمنا عليها العام الماضى فى كلامنا عن مسلسل رقم مجهول.. ألا وهى انتشار مشاهد التدخين على طول المسلسل وعرضه، وزاد السنة دى كمان مشاهد الشيشة المنتشرة فى كثير من المشاهد، حتى مع الطبيب المعالج ليوسف! ودى همسة مننا لمخرج المسلسل أنه ناسى أن بـ يتفرج عليه كثير من المراهقين والأطفال اللى ممكن يحبوا يجربوا التدخين على أثر مشاهدة بطلهم المفضل وهو بـ يدخن طوال الوقت.

يوسف الشريف بـ يثبت للعام الثانى على التوالى أنه بطل متميز للمسلسلات التليفزيونية، وأنه قادر على سرقة الكاميرا بخفة وذكاء من اللحظة الأولى، ناهيك أن واضح عليه آثار “دايت” قوى جدًا وفعال أدى لتغير شكله بالكامل.

شيرى عادل إلى الآن حاسين أن مساحة دورها كانت محتاجة ما هو أزيد من ذلك، وإحنا بشكل عام بـ نحب شيرى وبـ نشوفها وجه جميل وذكى وقادر على تطويع أداءه لعمل أى دور يطلب منها، ونعتقد أن الحلقات القادمة هـ تحمل تطور نوعى لدورها وقدرتها على أداءه.

شيرين الطحان مش عارفين ليه مصرين على إعطاءها أدوار قوية ومباشرة، رغم عدم قدرتها على أداء أبسط الانفعالات؟ بـ نشوفها فى أحدى الحلقات الأولى للمسلسل لما بـ تكتشف خيانة زوجها (زكى فطين) بـ تؤدى مشهد ممكن تعمله أى ممثلة مبتدئة بسهولة لكنها بـ تتصنع وتتكلف فـ يخرج أدائها ضعيف جدًا فى النهاية! عموما قد تأتى الحلقات القادمة بأداء أفضل من كده.

زكى فطين كالعادة بـ يقدر يتكيف مع أى نوعية من الأدوار بـ يقوم بها، وإحنا بشكل عام برضه بـ نحب زكى فطين رغم أداؤه اللى قد يسبب قلق للبعض من عدم تخلصه من  مدرسة يوسف شاهين، لكن إحنا مختلفين فى الرأى مع أصحاب المبدأ ده.

فى النهاية اسم مؤقت مسلسل محترم ورائع، وبـ نراهن عليه أنه يكون أفضل مسلسل فى رمضان 2013.. ننصحكم تشوفوه.