The Definitive Guide to Living in the Capital , Cairo , Egypt

مع الانتشار الواسع لفيروس كورونا المستجد، بقى تعقيم كل حاجة خطوة مهمة جدًا لسلامتنا وتجنب العدوى أو الإصابة، خاصةً بعد ما أثبتت الدراسات إن الفيروس بيعيش على الأسطح الصلبة لأيام.. وعلشان 99% مننا مش بيسيب الموبايل لوقت طويل، فهو يعتبر ناقل للفيروس بشكل مخيف.. علشان كده هنقولكم على طريقة علمية لتعقيم الموبايل وتطهيره من الفيروسات:

أغلبنا بيعقم الموبايل بإنه يرش مطهر أو كحول عليه، وبعض الناس بتغسله بالمياه لو كان الموبايل ضد المياه، لكن كل الطرق دي غلط، وهتبوظ الموبايلات مع الوقت.. وهنا اتدخل خبراء صناعة المحمول في العالم وقالوا إن أفضل طريقة لتطهير الموبايلات هي المناديل المبللة أو الـ “وايبس” لأن فيها 70% من “كحول الإيزوبروبانول – Isopropyl alcohol” وده مركب بيساعد على التخلص من الجراثيم بنسبة عالية جدًا، وبدون ما تضر شاشة الموبايل أو أجزاؤه الداخلية.

كمان ممكن تعقموا الموبايل بخلط مياه معقّمة مع محلول الإيزوبروبانول، ويترش حاجة بسيطة منه على قطعة قماش ويتنضف بيها التليفون، وبلاش تخلطوا المياه مع الصابون لأن نتيجتها مش قوية.

وطبقًا لنصيحة خبراء صناعة الموبايلات في العالم، فخطوات التعقيم دي مهم تتعمل مرة كل 3 ساعات لو انتوا في مكان الشغل أو زحمة، أما لو أماكن عادية فبيبقى كفاية من 3 لـ4 مرات يوميًا، ولو انتوا في البيت مرة واحدة كفاية.

وعلشان متضروش الموبايل بتاعتكم.. الخبراء شرحوا طريقة تعقيم الموبايل بشكل احترافي، وأول خطوة فيها هي فصل الموبايل عن الشاحن والسماعة والكفر.. وتاني خطوة هي إنكم تقفلوه تمامًا، وبعد كده يتمسح بالمناديل المبللة أو القماشة، وبدون ما تقربوا من الزوايا أو الكاميرا، ودول ممكن تستخدموا ليهم عود قطن، وبعد التنظيف بتسيبوا الموبايل شوية قبل تشغيله.