The Definitive Guide to Living in the Capital , Cairo , Egypt

صحة ولياقة
جيمي بيوتي صالون – Jimmy Beauty Salon

جيمي بيوتي صالون: جودة في الأداء ومعاملة غير محترفة في المعادي

  • 13 برج الصفا - زهراء المعادي
  • 12 صباحًا: 9 مساءً -
تم التقييم بواسطة
Nagla Ashraf
قيم
قيم الآن
جيمي بيوتي صالون: جودة في الأداء ومعاملة غير محترفة في المعادي

"والقلب يعشق كل جميل" على رأي الست أم كلثوم، بس يا ترى الجمال ده معنوي بس ولا ظاهري وداخلي؟ ناس كثير دخلوا في الجدال ده من الفلاسفة والمفكرين، بس الأكيد أن الجمال أصله داخلي وبـ يظهر في الخارج في الإطار المشروع والمقبول، ومن النقطة دي بدأوا صناع الجمال في كل المجالات يتنافسوا في صناعة المنتج الأجمل، وبقى فيه مقاييس عالمية ومحلية للجمال، منها أو أغلبها بـ يدور حول المرأة، وبما أن فكرة أن المرأة سلعة مرفوضة بكل الطرق والمقاييس، لازم كل واحدة تعرف الفرق بين أنها تبقى جميلة جمال هادئ بما يتناسب مع ذوقها وشعورها الداخلي بالجمال، وبين أنها تبقى فاكرة نفسها منتج بـ تسوقه علشان تجيب أكبر نسبة مبيعات.

ومن هنا ظهر أهمية دور الكوافير من زمان جدًا، من أيام الفراعنة لحد دلوقت، وبقى شيء مستحيل أي بنت تستغنى عنه في حياتها، إلا لو اتعلمت طرقه الخاصة في صناعة الجمال. رحنا Jimmy Beauty Salon علشان نكتشف طرقه في صناعة الجمال، بس واجهتنا عيوب معتادة في أي كوافير للأسف نكدت علينا.

أول ما دخلنا كان المحل زحمة نسبة أننا في يوم في وسط الأسبوع، دخلنا قسم المحجبات، وطلبنا أننا نعمل تنظيف بشرة وباديكير ومانيكير، للأسف برغم أن عدد الناس اللي بـ تشتغل كبير في المحل إلا أن المعاملة ما كانش فيها اهتمام إطلاقًا، وده كان شيء مبهم بالنسبة لنا.

المهم بدأنا رحلة تنظيف البشرة بغسول للوجه Clean & Clear وبعدين حطوا كريم مرطب على الوجه، وبدأ جهاز البخار يشتغل حوالي ربع ساعة ومافيش أي حد بـ يقول لنا أي حاجة، ودي كانت أول مرة لنا نعمل تنظيف بشرة، فكنا محتاجين بعض التوجيهات، بس للأسف في الوقت ده المكان كان فاضي تمامًا، وما كانش فيه حد يتابع بدقة إلا بعد 10 دقائق أخرى، وبدأت رحلة العذاب المؤلم للوصول للجمال، لأن علشان يتم إزالة الحبوب السوداء من الأنف، لازم يتم تقشيرها يدويًا، يعنى تخيلوا كده أن فيه حد بـ يكحت مناخيرك حرفيًا، ومش بس كده فيه طريقة أخرى من الطرق أنه بـ تضغط المناخير للداخل جامد جدًا، كأنك أخذت بونية فيها بالضبط، أو اتخبطت في باب حديد مجنزر.

المهم مراحل التقشير بـ تتم على أكثر من مرحلة، وكل ده وحضرتك وجهك تحت البخار بـ يتسلق، ومن أشد عيوبه أنك ممكن تتخنقي من كثرة البخار بس ابقى حاولي حركي رأسك على قد ما تقدري، تخطفي نفس وترجعي ثاني، المهم بـ يحطوا أكثر من Face Scrub حوالي 2، وآخر حاجة ماسك للوجه كله، وبـ يتم غلق المسام بقطنة فيها مياه ورد.

الحقيقة أن البنت اللي كانت بـ تعمل لنا عملية التنظيف كانت بـ تجاوب على كل أسئلتنا الخاصة بالحبوب، رغم أنها ما كانتش علمية 100%، ومع عملية التقشير، بردت لنا أظافرنا استعدادًا للخطوة القادمة، واللي للأسف برضه كانت عادية مش تحفة، إحنا بـ نبقى حريصين جدًا نقول للشخص اللي بـ يعمل أظافرنا أنه يخلي باله وهو بـ يشيل الجلد علشان بـ نتعور، وفعلًا اتعورنا..  وده كان شيء مؤسف، اختارنا لون بيج خفيف هادئ، كان كويس بس لأن المكان كان ميعاد غلقه قرب فكنا لازم نمشي بسرعة مما أثر على أن بعض الأصابع باظت.

كانت تجربة لطيفة هم بس يحسنوا الأداء في بعض الحاجات والدنيا هـ تضبط معاهم، تنظيف البشرة كان بـ 150 جنيه، والـ Manicure & pedicure كان بـ 30 جنيه، سألنا على كريمات الشعر لو عندهم حمام كريم مختلف، لقينا اللي موجود حمام كريم L’Oreal اللي ممكن نشتريه بسهولة من أي محل ثاني، كمان هم بـ يعملوا كرياتين وبروتين بأسعار تبدأ من 1200 جنيه. أما عن قص الشعر وعمله فزي أي مكان 40 جنيه للسيشوار والمكواة و40 للقص، كمان بـ يعملوا كل المستلزمات الثانية للجمال والاعتناء بالجسم والوجه من إزالة شعر زائد وبأسعار معقولة (المتعارف عليها).

نصيحة 360

ليس للمحل فروع أخرى.

أحسن حاجة

ديكور المحل.

أسوأ حاجة

عدم توفير اهتمام مناسب ومعلومات كافية للزبائن.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح