The Definitive Guide to Living in the Capital , Cairo , Egypt

من كام سنة فاتوا شفنا أول فرع لـ«ستاربكس – Starbucks» العالمية بـ يفتح في مصر، وده كان في منطقة الكوربة الساحرة. وبعديه فتحت أكتر من سلسلة عالمية تانية ومنها «جلوريا ﭼـينز – Gloria Jean’s» في نفس المنطقة جنب «ماكدونالدز» وقدام «الحرية مول» عشان يبقى أول منافس حقيقي لـ «ستاربكس».

الكافيه إتأسس سنة 1978 وإنتشرت فروعه في 37 دولة، وإتشهر بجوه اللي المفترض انه غير رسمي وإدارته البسيطة كأنها عيلة عندها كوفي شوب صغير، بس هـ نلاحظ أن السلسلة في شبه كتير بينها وبين «ستاربكس».

ومع ذلك في فرع الكوربة مش هـ تحس بموضوع جو البساطة ده. الحيطة مرسوم عليها بالـ«الجرافيتي» وفيه طابور من الشباب اللي تحت 18 سنة واقفين مستنيين الكيك والمشروبات المتلجة اللي طالبينها؛ ساعتها هـ تحس أنك في كوفي شوب صفته الأساسية انه مش تقليدي، ودي على فكرة الصفة السايدة على كتير من الكافيهات النهارده، فبقت بدل ما تميز تخلي المكان عادي. الترابيزات الصغيرة والكراسي الخشب ماليين المدخل اللي بـ يودي على تلاجة العرض اللي فيها المأكولات والكاشير.

وزي ما قولنا مافيش حاجة مميزة قوي في جو المكان، بس المنيو مكثف ومليان تفاصيل وبـ يرضي جميع الأذواق. الأكل في العرض شكله يفتح النفس، زي «الرابس – Wraps» اللي هي السندويتشات الملفوفة في عيش تورتيا مكسيكي وسعرها من 15 لـ20 جنيه، والسلاطات ودي سعرها من 20 لـ25 جنيه ومنيو الحلويات متنوع كمان. من ألذ الحاجات «كيك الجزر» الرطب اللي كان طعمه مفاجأة (18.5 جنيه). الكيش بالجبنة والسبانخ (11.75 جنيه) كان لذيذ قوي بس الخبيز نفسه كان المفروض يبقى أتخن شوية.

منيو القهوة غني جداً والإختيارات فيه كتير، جربنا الحجم المصغر من اللاتيه اللي أسمه هناك «ﭘيكولو – Piccolo» وسعره 11.5 جنيه. الكاﭘوتشينو الصغير بـ13.5 جنيه وجالنا عليه كمية وفيرة من الكريمة وطعمه رائع. القهوة عموماً حلوة بس مش لدرجة لا تقاوم. أحسن حاجة جربناها كانت الـ«تشاي لاتيه» بالكريمة الحجم الوسط (18.5 جنيه)، وكان رائع وهو بلبن الصويا ومن غير فلوس زيادة عليه؛ مش هـ تندم على الإختيار ده.

عشان تضيف أي نكهة أو مذاق للمشروب بتاعك هـ تدفع 4 جنيه. القهوة المتلجة بـ16 جنيه كمية التلج فيها قليلة بس جرعة القهوة قوية ومركزة جداً. فيه مشروبات كتير غير القهوة بأنواعها زي الشاي المتلج وعصائر تانية وأسعارها من 20 لـ25 جنيه.

«جلوريا ﭼينز» بـ يعمل ماج عليه أسمه وشكله شيك جداً عشان تاخده معاك في كل حتة، وعنده ماكينة قهوة فرنسية وكل لوازم فنجان القهوة المثالي اللي ممكن تفكر فيها، ولو عايز تاخد من البن الخاص بتاعهم ممكن تشتري كيس 200 جرام بـ55 جنيه، أغلى من أماكن مشابهة كتير.

لو كنت بـ تتمشى في الكوربة وروكسي وعايز تاخد قهوتك وتريح في مكان لذيذ جرب «جلوريا ﭼينز». الخدمة والعاملين في المكان ممتازين وهـ يساعدوك في إختياراتك. بس هـ تحتاج تزاحم شوية وسط الشباب الصغير اللي مالي المكان عشان توصل للكاونتر وتعمل الأوردر بتاعك.