The Definitive Guide to Living in the Capital , Cairo , Egypt

كافيهات
عالقهوة

عالقهوة: شيشة ولعب تمام التمام، أكل نص نص

تم التقييم بواسطة
Dalia El Fiki
قيم
قيم الآن
عالقهوة: شيشة ولعب تمام التمام، أكل نص نص

مشوار للدقي ممكن يبقى كابوس لأغلب سكان
كايرو. بس فيه كافيه أنتيكة وصغير في الدقي اسمه «عالقهوة» يستاهل انك تروحه وهـ
ينسيك تعب المشوار.

ديكور الكافيه من جوه مصري أصيل، وفيه
كنب من خشب الأبنوس، ومخدات بدوية للأرض، ده غير صور أبيض وأسود لشخصيات مصرية
معروفة متبروزة ومتعلقة على الحيطة. الديكور اللي مش مُتَكَلِف بـ يرحب بالواحد
وبـ يشعره بالراحة، ده غير الإبتسامات اللي على وشوش العاملين هناك وضيافتهم
الممتازة من أول ما تحط رجلك جوه الكافيه، وهـ تلاقيهم بـ يحاولوا يخلّوك قاعد
مرتاح في المكان على قد ما يقدروا.

من أحسن الحاجات في الكافيه إنك مستحيل
تزهق وإنت قاعد هناك من كتر وسائل الترفيه اللي موجودة. فغير شاشات التليفزيون
اللي محطوطة في كذا ركن، عندهم طاولة وشطرنج ولعب تانية زي السلم والثعبان، وغير
كده في «پلاي ستيشين – Play Station » بشاشة 42 بوصة. كل الألعاب ببلاش ماعدا الـ«پلاي
ستيشين» بـ 25 جنيه في الساعة. ويا سلام لو أخدت معاها واحدة شيشة تفاح (7 جنيه)،
هـ تبقي التسلية تمام التمام!

مع إن منيو «عالقهوة» يُعتَبَر أساساً لبناني،
بس الفتوش والمزاليكا كان طعمهم مش على المستوى المطلوب أبداً من كتر الزيت اللي
كان فيهم. فلو روحت ممكن تحب تتجنب الأطباق اللبنانية وتاخد پيتزا أو مكرونة. ومع
ذلك المكرونة كمان ماكانتش طِعمة، لكن پيتزا الـ«هوت دوج – Hot
Dog » (30
جنيه) كانت مظبوطة على الآخر؛ مستوية صح، وكمية الجبنة والمكونات اللي عليها حلوة.
وده طبعاً خلى إختيار الپيتزا هو أفضل إختيار في المنيو بتاعهم.

«عالقهوة» مكان ممتاز لو عايز تشرب شيشة
وتاخد مشاريب وتلعب شوية. لكن لو عاوز تاكل في الغالب هـ تحب تروح مكان تاني.

نصيحة 360

لو لقيت الكنب فاضي جرب تقعد عليه لانه مريح جداً وهـ يعجبك.

أحسن حاجة

الشيشة والديكور البسيط اللي مش مُتَكَلِف.

أسوأ حاجة

المكان مش هـ يبقى مناسب ليك لو انت جعان.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح