The Definitive Guide to Living in the Capital , Cairo , Egypt

“القاهرة ونيلها وطول ليلها، وغناويها ومواويلها، وحكاويها آه يا جمالها”.. مقطع من أغنية بتوصف جمال نيل القاهرة، والأغنية كانت للنجوم عمرو دياب ومحمد منير، وهما ماكدبوش لأن نيل القاهرة ساحر وأي حد بيعشقه، وإحنا بنحب نستمتع بالنيل وبمناظره الجميلة، مكان مهدئ للأعصاب ومريح للنفس، وعلشان كده هنعرفكم على Aventura Cairo وهو عبارة عن كافيه متحرك في النيل، وهنقول لكم كل اللي محتاجين تعرفوه عنه.

Aventura Cairo عبارة عن يخت بديكورات عصرية ومميزة وبيتحرك في النيل في أوقات محددة، والاستايل بتاعه مميز وينفع رومانسي ويمشي كاجوال، سواء كان الأنتريهات الفخمة، أو الكراسي العالية المميزة، وهو كمان مكان مناسب للتصوير وعمل فوتوسيشن لطيف.

اليخت كمان تقدروا تستغلوه في أعياد الميلاد وحفلات الخطوبة وأي مناسبة سعيدة عندكم، وتقدروا تعملوا أي ديكورات تحبوها للمناسبات بالتنسيق مع المسئول عن اليخت، وده عن طريق الحجز، وبيقدموا مأكولات ومشروبات من المنيو الخاص بيهم، وهتقدروا من خلال الرحلة النيلية تشوفوا أجمل معالم القاهرة زي أبراج نايل سيتي، فندق شيراتون والأوبرا، ومنطقة الزمالك، وغيرهم.

المكان عبارة عن تحفة ماشية في النيل بتكمل جماله، وطبعًا بيعملوا حفلات مختلفة وبيعلنوا عنها على صفحتهم، ده غير أن طول الوقت فيه دي جي شغال في المكان، وبنرشحه  لو حابين تغيروا المود وتخرجوا خروجة مختلفة، وسعر الفرد بيكون 460 جنيه ولكن الفترة دي عاملين خصم 50% بمناسبة افتتاح اليخت فالسعر حاليًا 230 جنيه، ولازم تتأكدوا من السعر قبل الحجز وكمان تعرفوا بيشمل إيه.

اليخت موجود في العجوزة، أمام مستشفى العجوزة وبجوار كوبري أكتوبر.

والحجز بيكون عن طريق التليفون أو واتس آب من خلال الرقم: 01019871459.

وتقدروا تعرفوا أكتر عنهم من خلال صفحة الفيسبوك من هنا.