The Definitive Guide to Living in the Capital , Cairo , Egypt

مزيكا
دنيا جديدة

محمود العسيلي: دنيا جديدة

  • محمود العسيلي
  • بوبشرقي...
  • من الآن
  • مزيكا
  • كل مكان
تم التقييم بواسطة
Waleed Abuarab
قيم
قيم الآن
محمود العسيلي: دنيا جديدة
حاولنا نسمع ألبوم عسيلي الجديد من غير أي توقعات مسبقة، حاولنا ندور على عسيلي غير اللي إحنا عارفينه ومتعودين على الستايل بتاعه سواء في الألحان أو الكلمات أو التوزيع، مش عارفين ده كان صح ولا غلط، بس اللي إحنا متأكدين منه أنك لما بـ تسمع أو بـ تشوف حاجة أنت متوقع أنها تكون بالشكل الفلاني بنسبة 80 % ممكن تصاب بخيبة أمل لو كنت بـ تسعى لحاجة جديدة أو غير مألوفة، أما لو كنت عاوز تلاقي الحاجة اللي بـ تدور عليها كل مرة، أكيد هـ تبقى سعادتك لا توصف لما تلاقيها بحذافيرها.

تقريبًا إحنا كنا من النوع الأولاني اللي أصيب بخيبة أمل، بس مش هـ نكبر الموضوع لأن رغم كل حاجة إحنا استمتعنا بالألبوم وكلماته ومزيكته لأن محمود العسيلي عنده شخصية فريدة ممكن تميزها بعد ثواني قليلة من بداية كل أغنية، وإحنا بـ نعتبره من أهم نجوم الشباب الموجودين على الساحة الغنائية وما يقلش في ابتكاره عن رواد كثير سبقوه في مصر والعالم العربي، وبـ نتوقع كمان أنه يوصل للعالمية قريب جدًا.

ألبوم «دنيا جديدة» صدر أخيرًا من كام يوم، طرحته شركة مزيكا بعد ما أجلت نزوله أكثر من مرة لأسباب مختلفة، حقق نسب استماع عالية على الإنترنت ومبيعات جيدة في سوق الكاسيت، والـ Curve بتاعه في الطالع من غير حسد.
الألبوم مكون من 14 أغنية قام عسيلي بتلحين وكتابة كلمات 11 أغنية منهم، مع أن السمة المميزة لأغاني عسيلي بـ نحسها في التوزيع قبل اللحن أو الكلمات، إلا أن الألبوم ده شارك في توزيعه عدد كبير من الموزعين من أصحاب الأسماء الكبيرة زي نادر حمدي وتوما وأحمد رجب، لكن واضح أن شخصية عسيلي كانت طاغية على الشكل النهائي للألبوم، وحسينا أن كلهم بـ يساهموا بالشكل اللي يخلينا نشوف ألبوم متقن واحترافي من ماركة “عسيلي”.
أغنية «ضحكة» في بداية الألبوم فكرتنا بأغنية “فرحة” لنانسي عجرم اللي صاحبت حملة كوكاكولا في رمضان اللي فات، كلمات حلوة وجديدة لعسيلي ولحن مبهج كالعادة، هـ تبقى الأغنية الرسمية للحفلات والتجمعات لعدة شهور جاية. آلة القانون اللي كانت بطل معظم أغاني عسيلي الناجحة في الألبومات اللي فاتت كان في بداية أغنية «عيشة حلوة» اللي أبهرنا فيها عسيلي بلحن من طراز عالمي وتوزيع قوي لأمير هداية، لكن الكلمات الوطنية اللي كتبها عسيلي ما كانتش على مستوى اللحن والعزف المتميز لروكيت على الجيتار وماجد سرور على القانون. في «اشتغلوني» بـ يرجع عسيلي لمقسوم توما الغني بجمل الباص جيتار للفنان أحمد رجب وناي الأستاذ رضا بدير، مشكلة الأغاني اللي كتبها ولحنها عسيلي أن مقاطعها بـ تبقى مش مكتملة الوزن في أحيان كثير، وبـ يضطر يمط في بعض الكلمات بشكل غير مناسب علشان الوزن ينضبط، وبالتالى من الأفضل أنه يلجأ لمراجع متخصص علشان يخرج الكلمات بالسلاسة المطلوبة لأذن المستمع.
مش عارفين هي دي صدفة ولا لازم أغنية الألبوم تبقى على موسيقى الهاوس في أي ألبوم جديد لأي فنان! ما حدش قادر يجازف ويكسر القاعدة في معظم ألبومات 2012 ومن قبلها 2011، أغنية «دنيا جديدة» حلوة ما قولناش حاجة، بس كان ممكن جدًا تبقى مش أغنية الألبوم. في أغنية «ست الستات» مافهمناش الـ Intro اللي فيها صوت واحدة بـ تقول “عليّ الطبلة يا عسيلي” وبـ تضحك بين مقاطع الغناء! كان مافيش داعي للمؤثرات الصوتية دي. الأغنية كلماتها حلوة وفيها جملة لحنية جميلة مع جملة “وكثير اللي انتي بـ تعمليه..” وطبلة سعيد الأرتيست عاملة شغل عالي.
عجبنا توزيع أغاني زي «نظرة في عنيكي» و«أنت مني» لنادر حمدي و«وراك وراك» و«أجزخانة» اللي سبق وصدرت Single  قبل طرح الألبوم بفترة والاثنين لأمير هداية. وكلمات أجزخانة اشترك في كتابتها أمير طعيمة وعسيلي، وعجبنا فيها استخدام الـ Beep للغلوشة على بعض الكلمات الخارجة، فيها جرأة تحسب للمنتج. أغنية هاوس ثانية هي «عايشين» مناسبة لصالات الرقص وأداء عسيلي فيها كويس.
كلمات معبرة ورقيقة جدًا لمحمد عاطف في أغنية «هـ نخاف من إيه» ولحن مناسب لتامر علي وتوزيع أسامة الهندي فكرنا بأغنية “أشكي لمين” لمحمد منير، ووصل لنا بسهولة إحساس عسيلي في الأغنية دي. هـ تطلع صوت جيتار أوسو من وسط كل أغاني الألبوم في أغنية «مبسوط في مكانك» ولحن عسيلي كان أقل من المتوسط، لكن الحالة الإنسانية في الكلمات كانت حقيقية وأثرت فينا فعلًا.
«الليلة» واحدة من أجمل أغاني الألبوم مع الدور البارز للتوزيع والعزف على كل الآلات الشرقية الغربية، أحمد رجب أبهرنا كموزع في الأغنية دي، ولحن عسيلي ناعم وبسيط وملائم للكلمات. و«أديني بعيش» أقوى ما فيها كلمات بهاء الدين محمد وعزف مشعل على آلة الكلارنيت، بس نبرة الحزن عالية حبتين.
محمود العسيلي قدم ألبوم متنوع فيه كل أنواع الموسيقى من أول المقسوم الشرقي لحد الروك مرورًا بالفانك والهاوس، توزيعات متميزة وأداء قوي من المطرب في معظم الأغاني في حدود إمكانيات طبقات صوته، الألبوم فعلًا يتحب خاصة من عشاق عسيلي وأغانيه، ورغم تحفظنا على بعض التكرار في الألبوم، لكن حبيناه ولقينا نفسنا بـ نسمعه أكثر من مرة حتى بعد كتابة المقال ده.

عجبك ؟ جرب

«طول ما أنتي جنبي» لمحمود العسيلي، «من قلبي بغني» لمحمد حماقي.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح