The Definitive Guide to Living in the Capital , Cairo , Egypt

مطاعم
بابا عبده

بابا عبده: ساندوتشات رخيصة ولذيذة في القاهرة الإسلامية

  • أمام شارع المعز لدين الله الفاطمي وباب الفتوح
  • مصري
  • 24 ساعة -
تم التقييم بواسطة
Yousef Hany
قيم
قيم الآن
بابا عبده: ساندوتشات رخيصة ولذيذة في القاهرة الإسلامية

من الحاجات الظريفة في مدينة متعددة الأوجه زي القاهرة أن لما بـ تيجي سيرة
الأكل بـ تلاقي كمية إختيارات مهولة وكلها مطابخ حلوة وأكلها لذيذ سواء كانت في
فنادق 5 نجوم أو حتى في حارة ضيقة في حي شعبي.

في قلب القاهرة وقدام «باب الفتوح» الأثري في المنطقة اللي ليها نفس الاسم
هـ تلاقي كشك صغير في حجمه بس زباينه كتير وعليه إقبال غير عادي، هو ده كشك «بابا
عبده».

المحل أو الكشك على بعد 5 دقايق مشي من مسجد الشرطة في طريق صلاح سالم،
خلّي ساحة إنتظار السيارات بتاعة المسجد على شمالك وأدخل أول شمال وبعد كده أول
يمين هـ تلاقي باب الفتوح على شمالك و«بابا عبده» على يمينك.

الشارع ضيق وزحمة قوي، وهـ تشم ريحة كل أنواع الأكل وانت هناك لأن فيه
مطاعم صغيرة كتيرة في المربع ده وكل مطعم متخصص في حاجة.

كشك «بابا عبده» بسيط وحواليه تقريباً 12 ترابيزة صغيرة بالكراسي البلاستيك
بتاعتها مرصوصين في الشارع وعلى الرصيف، وبـ يعمل ساندوتشات مصرية أصيلة زي الكبدة
الإسكندراني والكبدة البلدي والسجق والكفتة.

الساندوتشات الحلوة أو المسكرة من العلامات المميزة للمكان، وليها معزّة
خاصة عشان بـ تفكرنا بأيام المدرسة زي ساندوتشات الحلاوة بالقشطة وساندوتشات
المربى. لو غاوي أكل مشطشط جرب السجق الإسكندراني بس خلّي جنبك إزازة مية ساقعة
عشان تطفي الولعة، وبـ نحذرك منه لو مالكش في الأكل الحار.

كل الساندوتشات بـ تتعمل في نص رغيف فينو ماعدا ساندوتشات الهمبرجر والكفتة
اللي بـ تتعمل في عيش كايزر كبير. الأسعار قليلة وبـ تتراوح بين 4 لـ 8 جنيه
الساندوتش، يعني ممكن تطلب 5 ساندوتشات أنواع مختلفة ومخلل وسلاطات وتشبع وتملى
بطنك بـ 30 جنيه.

الكشك فاتح 24 ساعة كل يوم وننصحك تروح بالليل متأخرعشان تستمع بالمنظر
والأضواء اللي على باب الفتوح، والخدمة كمان بـ تبقى أحسن كتير بالليل، بس لو معاك
عربية الركنة هـ تبقى صعبة في الشارع الضيق ده.

بعد الوجبة التمام عند «بابا عبده» ممكن تتمشى في شارع المعز لدين الله
الفاطمي الرائع، وتستمتع بواحد من أقدم وأجمل شوارع القاهرة والمشهور بأنه فيه
أكبر كم من المعمار المهم في العالم الإسلامي.

نصيحة 360

إسأل على "خميس" اللي شغال هناك، ويتر متعاون ومتحمس لشغله جداً.

أحسن حاجة

ساندوتشات الكبدة الإسكندراني والحلاوة بالقشطة.

أسوأ حاجة

الركنة في الشارع الضيق ده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح