The Definitive Guide to Living in the Capital , Cairo , Egypt

في رمضان ساعات الواحد بيزهق من تكرار نفس الأكل وبيبقى عاوز يكسر القاعدة، فيه ناس بتروح تاكل سوشي، وفيه اللي بياكل كشري، وفيه اللي بيضرب برجر، من قبل رمضان وإحنا شايفين بافالو برجر – Buffalo Burger في الشيخ زايد شغالين فيه وفي تشطيباته، وبالتالي أول ما فتح في نص رمضان كان لازم نروح نكسر القاعدة ونغير نوعية أكلنا ونزور الفرع الجديد.

موجود قريب من سوبر ماركت سعودي في سرايا مول، المكان واسع وفيه ترابيزات كتيرة، وأول ما تدخل على اليمين فيه 4 كراسي طويلة وبار بتبص منه على الناس بره وأنت قاعد، الجرسونات منظمين جدًا ومركزين والديكور مودرن رائع ومريح ويحسسك أنك في مطعم بره مصر، الترابيزات كلها عليها الكاتشب والباربكيو صوص وكمان علب للمناديل والجوانتيات البلاستيك اللي ممكن تلبسها علشان لما تبدأ حفلة الزروطة.

بافالو برجر عاملين عروض في رمضان ونازلة على صفحتهم على الفيسبوك، لكن العرض اللي كان شغال بس وقت زيارتنا هو Ramadan Box فيه 4 ساندويتشات لحم أو فراخ 200 جرام (من اختيارك) و4 بطاطس ولتر مشروب غازي ومولتن كيك، الساندويتشات اللي اختارناها كانت: Chicken Cholo’s وده عبارة عن صدور دجاج مقلية وهالوبينو مكسيكي مع صوص البافلو الكريمي وجبن الشيدر، والتانى Charbroiled مكون من بيف مع صوص الباربكيو مع البصل المكرمل والجبن الشيدر، والتالت Hawaii Waikiki وده بيتحط على البيف قطعة أناناس وصوص الأناناس الكريمي مع جبنة شيدر، والأخير Hitchhiker (بيضاف عليه 10 جنيه زيادة هو ونوعين كمان) مكون من 3 قطع من أصابع جبن الموتزاريلا الكريسبي مع الكاتشب والمسطردة وبيف بيكون وصوص البافالو الكريمي، سعر Ramadan Box بـ 269 جنيه، لكن بعد إضافة الخدمة والضريبة دفعنا (356 جنيه).

إحنا اللي بنروح الكاونتر نطلب الأوردر وبعدين الجرسونات بيوصلوا الطلب لحد الترابيزة بناء على رقم الطلب اللي مكتوب على الريسيت، الساندويتشات جات أول حاجة بتنزل في سبت حديد وبيحطوا الخس والبصل والطماطم والخيار المخلل على جنب علشان سايبين لك حرية أنك تحطها على حسب ما تحب، وبعدها نزلت البطاطس حاطينها في طباق معدن غويطة لها أيدين من الجنب، ولتر المشروب الغازي.

الساندويتشات كانت محبطة بالنسبة لنا لأن كلنا عارفين أن الـ Food Styling اللي بيبقى معمول للساندويتشات في منيو مطاعم البرجر بتبقى كبيرة ومدفوسة مكونات وشكلها يفرح، بتبقى للدعايا فقط، لكن على أرض الواقع المكونات بتبقى أقل وحجم الساندويتش كارتفاع بيبقى أصغر طبعًا، بس شكل الأكل كان يفتح النفس، البطاطس عامة كان حجمها رفيع وصغير بس مقرمشة وجميلة وملحها مضبوط، ندخل على التقيل بقى.. الساندويتشات.

لازم نقول أن طعم اللحم في الساندويتشات كلها كان رائع، طعمه Juicy والتتبيلة والتسوية مضبوطين، الوحيد اللي بالفراخ كان حجم قطعة الفراخ في العيش أصغر منه وبالتالي كان فيه جزء كبير بناكله كان فاضي، القرمشة بتاعة الفراخ كانت لطيفة ومستوية كويس بس كنا حاسين أن مكوناته مش مخدومة كفاية بس طعمه كان كويس، ساندويتشات البيف نتكلم بقى عن كل نوع منهم بالتفصيل: أول واحد Hawaii Waikiki، إحنا من عشاق البرجر بالأناناس، ويا سلام كمان لما تحط عليه باربكيو صوص بيبقى قمة الإبداع حتى أننا بنعمله في البيت من ساعة ما دوقناه في مطعم تاني، اللي اخترعه عبقري.

تاني واحد Charbroiled، طعم صوص الباربكيو مع البصل المكرمل والجبن الشيدر كان مزيج كويس، عامل زي الساندويتش اللي فات في فكرة أنك بتدوق طعم مسكر مع البيف، والتالت Hitchhiker وده أقوى واحد فيهم حجمًا وموضوعًا، فيه 3 صوابع موتزاريلا كبار مع صوص البافلو الكريمي والكاتشب والمسطردة والبيف بيكون، بالنسبة لنا الموتزاريلا كانت كميتها كتيرة ودسمة أوي، وممكن تغطي على طعم البيف، لكن باقي المكونات كانت تمام.

مع عرض بوكس رمضان فيه كمان مولتن كيك حجم عائلى، جات لنا بعد ما خلصنا أكل بس هى بالنسبة لنا كانت أقرب للبراونيز عن أنها مولتن كيك لأن الشوكولاتة كانت ماسكة نفسها ويمكن ده لأن تاريخ صنعها كان قبل زيارتنا بيوم وما كانتش سخنة علشان صوص الشوكولاتة يبقى سايح زي ما قال الكتاب، لازم هتاخدها معاك البيت وتسخنها علشان الشوكولاتة تسيح.

عرض رمضان حلو جدًا لو أنتم أسرة أو أصحاب من 4 أفراد، كل واحد هيختار ساندويتش وله بطاطس بتاعته، ولو أنت أكيل ممكن أنت وصاحبك تاكلوا كل واحد اتنين، العرض لطيف وطعم الساندويتشات حلو واللمة أحلى.