The Definitive Guide to Living in the Capital , Cairo , Egypt

المطاعم عندها ميزة هايلة وهي إنها بتقدر تخلي زوارها يحسوا أنهم في مكان مختلف عن طريق الديكور والأجواء، وطبعًا نوعية الأكل.

"بوليفارد – Boulevard" في بوينت 90 مول استوحى ديكوراته من فيلمThe Great Gatsby ، وقدر يقدم اللمسة المميزة للقرن العشرين – وتحديدًا فترة الأربعينات – اللي هتلاحظها من الخشب اللي داخل في كل حاجة من الفرش للحوائط. المكان هناك فعلًا مريح وفيه نوع من الأناقة.

الأكل عند بوليفارد معظمه من المطبخ الأوروبي، يعني باستا وبيتزا من إيطاليا، فيل شنيتزل Veal Schnitzel من ألمانيا، وأكلات ثانية مناسبة لكل الأذواق.

نبدأ مع المقبلات اللي طلبنا منها بعد جولة في المنيو الضخمة طبق تكس ميكس فرايز (40 جنيه) ومعاه طبق تريو بلاتر (61 جنيه)، وصحيح المطعم كان تقريبًا فاضي يومها – يمكن كان في ترابيزة أو اثنين مشغولين – لكن برضه الأطباق وصلت متأخر.

البطاطس وصلت على طاسة ساخنة، وعليها لحمة مفرومة وجبنة وفوقهم شرائح هالبينو. المشكلة إن البطاطس واضح إنها من نوع ردئ – رغم إنهم كاتبين في المنيو إنها بطاطس بيتي– وكانت رفيعة جدًا ومالهاش طعم.

أما اللحم المفروم فكان طعمه غريب شوية، وعليه جبنة بيكورينو وموتزاريلا طعمهم حلو مع بعض، بس مش ماشي مع باقي مكونات الطبق.

نروح للتريو بلاتر المكون من موتزاريلا رولز وتشيكن ستربس وفيش فينجرز ومعاهم ثلاثة أنواع صوص، مارينارا وهوني مسطرد و1000 أيلاند. الستربس كانت في حجم الناجتس، وتتبيلتها هايلة وكمان مقرمشة من بره وطرية من جوه، ونقدر نقول بكل ثقة إنها أحلى حاجة في الطبق. رغم إن الموتزاريلا رولز كانت متماسكة، بس طعمها كان غريب شوية وواضح إنها مش طازة أما الفيش فينجرز فكانت مقرمشة بس المشكلة إنها كانت مملحة جدًا ومستواها يعتبر قليل جدًا بالمقارنة مع باقي مكونات الطبق.

نروح للأطباق الرئيسية، واللي اخترنا منها طبق بوليفارد المخصوص فيل شنيتزل (112 جنيه) مع طبق بيف مع صوص ميكس تشيز (121 جنيه) وبرجر جبنة (51 جنيه)، وبلّعنا الأكل بسموزي بطيخ (28 جنيه) ومانجو (30 جنيه) ومعاهم عصير اسمه شد انتباهنا وهو ستروبيري أجو جو Strawberry Ago Go (30 جنيه).

نبدأ مع البيف والجبنة اللي معاهم طلب أرز أبيض وبطاطس محمرة. الأرز كان مستوي كويس، بس مافيش أي طعم أو بهارات وكمان شكل التقديم نفسه مش لطيف. أما البيف فكان عظمة، طعمه جميل وعمل شغل ممتاز مع صوص الجبن اللذيذ.

الفيل شنيتزل كان عبارة عن قطعة لحم كبيرة مع صوص ليمون وشوية بطاطس محمرة. في الطبق ده بتقدر تختار الصنف الجانبي، بس المشكلة إننا اخترنا البطاطس اللي طلعت زي التكس ميكس – من غير أي بهارات أو طعم مميز – وكمان الشنيتزل نفسه كان مزيّت فطبيعي إنه يكون ثقيل وطعمه مش ماشي مع صوص الليمون، وبكده يكون الطبق الثاني برضه مش على المستوى.

وصلنا أخيرًا للتشيز برجر؛ العيش كان طازة بس أكبر بكثير من قطعة البرجر نفسها، وطعم اللحم كان أقرب سجق شرقي وعليه جبنة شيدر سائحة بسبب التوابل الزيادة، وبكده نقدر نقول إن الأطباق كلها مش على المستوى.

ننسى الأكل ونطلع على المشروبات، سموزي البطيخ كان لذيذ بس خفيف بالمقارنة مع سموزي المانجو الهايل وقوامه المميز. أما الستروبيري أجو جو فكان كوكتيل من الفراولة والموز، لكن المشكلة كانت كمية اللبن الزيادة وطعم الموز الطاغي على باقي مكونات العصير.

قولنا جايز حاجة حلوة تقدر تنسينا اللي حصل، فطلبنا راسبيري وايت شوكو كوكي دوف Raspberry-white choco cookie dough (46 جنيه) وهو عبارة عن طبق  كوكي محشية شوكولاتة ساخنة وعليها بولة آيس كريم فانيليا مع قطع شوكولاتة بيضاء وعصير توت أحمر.

الكوكي نفسها كانت طرية ومليانة شوكولاتة، وطبعًا سحر الآيس كريم عمل شغل عالي مع طعم التوت الحامضي. طبق حلو هايل استمتعنا بكل قطعة منه وقدر ينقذ اليوم بعد مجموعة أكلات محبطة.

تجربتنا في بوليفارد كانت متواضعة مافيش كلام رغم إن عندهم مميزات تخليهم من الأماكن المهمة زي فكرة المكان والمنيو الهايلة والأجواء المريحة. المشكلة الأكبر كانت في تنفيذ الأكل ومافيش تفاهم بين الجرسونات اللي أصلًا مش مركزين في شغلهم، والكلام ده بيدق جرس خطر للمكان.