The Definitive Guide to Living in the Capital , Cairo , Egypt

مطاعم
دراجون هاوس – Dragon House

دراجون هاوس: مطعم آسيوي فقد بريقه في المعادي

تم التقييم بواسطة
Gaser El Safty
قيم
قيم الآن
دراجون هاوس: مطعم آسيوي فقد بريقه في المعادي

المطاعم الآسيوية عددها مش قليل في القاهرة؛ ده بالعكس، كميتها زادت في الفترة الأخيرة، وبقت تقدم كمان مطابخ مش واخدة حقها في القاهرة زي المطبخ الكوري والتايلاندي بالذات.

بعد كتابة مقالات كثيرة عن مطاعم آسيوية فتحت جديد، قررنا أننا نشوف مستوى المطاعم الأقدم، واللي المفروض أنها تكون أكثر خبرة واهتمام بأنهم يحافظوا على مستواهم المعهود. من ضمن المطاعم دي مجموعة دراجون هاوس، واللي ظهرت سنة 1993 بفروع كثيرة في مناطق متفرقة في مصر؛ زي القاهرة، إسكندرية وشرم الشيخ. ده بجانب إدارتهم لمطعم إنديا كورنر.

في رأينا استمرار المطعم لأكثر من 20 سنة في حد ذاته إنجاز؛ وخصوصًا أنه لسه محتفظ بمكانه في شارع 9 في المعادي، واللي مش من السهل أنك توصله، وكمان بديكوراته القديمة المكونة من اللونين الذهبي والأحمر، مع سجاد أخضر زاهي. تفاصيل الديكور بالنسبة لنا كثيرة، ولكن ما تختلفش كثير عن ديكورات أي مطعم آسيوي نعرفه.  

استقبلنا جارسون لطيف وقدم لنا مجموعة المنيوهات المختلفة؛ وبما أن كان نفسنا في أكل صيني، طلبنا ون تون مقلية (16.25 جنيه)، و دامبلينج مقلية على البخار (16.25) كفواتح شهية.  

أما كأطباق رئيسية، طلبنا فراخ مقلية حارة بالثوم (48.5 جنيه)، لحم بيف بالبروكولي (55 جنيه) مع أرز مقلي بالبيض (15.5 جنيه) ونودلز باللحم (32 جنيه).

بالنسبة لفواتح الشهية، الون تون -واللي تشبه لحد كبير السمبوسك- كانت عجينتها مقرمشة وذهبية، أما الفراخ كحشوة فكانت ممتازة وطعمها حلو جدًا. ما انبهرناش بالدمبلينج زي الطبق الأول؛ لأن الحشوة ما اختلفتش عن حشوة الون تون، ولكن العجينة الخارجية -واللي عادة بـ تبقى أسمك- ما حسناش أنها مقلية بالتساوي من كل الجانب.

للأسف من أول هنا والموضوع بدأ يسوء. في مقالنا القديم، عجبنا جدًا اللحم بالبروكولي، بس المرة دي الموضوع اختلف تمامًا. بجانب أن اللحمة كانت مستوية لدرجة مطاطية تخليك بـ تمضغ فيها سنة، الطبق ككل كان فاقد للنكهة لأن ما كانش فيه أي توابل. أما النودلز -والمفروض أنها معمولة يدويًا في المطعم- فكانت هي كمان فقيرة في النكهة، وقطع اللحم كانت بـ تعاني من نفس مشكلة الطبق الأول.

صحيح الفراخ المقلية بالثوم ما كانتش بـ نفس سوء الطبقين اللي فاتوا -لأن الفراخ كانت تسويتها أحسن- إلا أن نفس مشكلة التتبيل كانت موجودة، ونعتقد أن أهم حاجة في المطبخ الآسيوي هي التتبيلة. الأرز المقلي بالبيض ما كانش أحسن حاجة قابلنها في حياتنا، ولكن كان معقول… بس.

بالرغم من أن دراجون هاوس المفروض يكون رائد في عالم المطاعم الآسيوية، إلا أنه من الواضح جدًا أنه فشل في مواكبة مجموعة المطاعم الجديدة الموجودة على الساحة في الوقت الحالي، وخصوصًا أن جودة الأكل مش بالمستوى المطلوب اللي تخلينا نرجع له ثاني.

 

 

نصيحة 360

دراجون هاوس بـ يوصل الطلبات للبيت، اتصل بـ 0223782928.

أحسن حاجة

المطعم له روح خاصة لسه محتفظ بها، وكمان الون تون.

أسوأ حاجة

كل الأكلات تقريبًا اشتركت في مشكلة واحدة، نقص التتبيل، وقلة النكهة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح