The Definitive Guide to Living in the Capital , Cairo , Egypt

«سوﭭـلاكي هاوس – Souvlaki House   » هو مطعم جديد في مدينة
الرحاب في القاهرة، ورغم أنه مُصَنَف كمطعم للوجبات السريعة في سوق الرحاب، لكنه
بـ يقدم منيو كبير لأكلات البحر المتوسط بس بأسعار غالية شوية.

«سوﭭـلاكي »
يعني البديل اليوناني للـ “شاورمة”. يمكن بس قطع اللحمة أو الفراخ تكون
متقطعة بسُمك أكبر وطعم التتبيلة مختلف. بس في الآخر كلهم نفس الفكرة، عيش رفيع
مقرمش فيه كمية كبيرة من الپروتين مع شوية خضروات وكمية توابل في التمام.

المطعم نفسه
واخد شكل مطاعم الوجبات السريعة وفيه ترابيزات وكراسي ألوانهم زي شعار المطعم. وفيه
كمان كاشير كبيرعشان تطلب منه شبه جداً الكاشير اللي في «ماكدونالدز» و«هارديز».

«سوﭭـلاكي
هاوس» بـ يقدم منيو حلو جداً مليان بالإختيارات، فيه ساندويتشات سوﭭـلاكي (شاورمة
يعني زي ما قلنا)، برجر مع بطاطس وكولا، ووجبات تانية زي مثلاً لحم البتلو بصوص الفلفل
الإسود.

إحنا إخترنا
شوربة سخنة في الأول. شوربة الفراخ بـ الكريمة (14.95 جنيه) ماكانتش سميكة قوي بس
كانت غرقانة في السمنة و مرشوش عليها فلفل إسود. الشوربة كانت حراقة شوية وطعمها
كان حلو قوي بس الفراخ نفسها كانت سوﭭـلاكي (أو متقطعة شاورمة) ومتوزعة على الوش.

الـ «سوﭭـلاكي
جريل» (59.95 جنيه) وجبة كبيرة لازم تقسمها مع حد تاني، فيها كمية كبيرة من الرز
البني مع اللوز المحمص والزبيب، وده مجرد صنف جانبي للتشكيلة الكبيرة من اللحوم
المشوية والفراخ فيه كانت طرية وطعمها لذيذ ومتبلة بالفلفل الأسود بس. البتلو كان
طازة ومستوي ناشف شوية بس الطعم كان رائع، لكن الريش الضاني المشوية كانت للأسف مش
حلوة قوي ومليانة عضم ودهن، وحتة اللحمة اللي ممكن تتاكل كانت بـ تشد.

الفراخ الپيستو
(29.25 جنيه) أكيد مش أكلة تقليدية تطلبها وانت قاعد في مطعم يوناني، بس إحنا قُلنا
نجرب. الفراخ بـ تيجي متقطعة «سوڤلاكي» ومعاها كمية مكرونة كبيرة بصوص الپيستو. وعلى
غير العادة، المكرونة ماكانتش مسلوقة بزيادة زي أغلب المطاعم التانية، وصوص الپيستو
كان من أحلى المرات اللي جربناه فيها.

إختيارات
الحلويات كانت تقليدية جداً ومافيهاش إبتكارات. يعني المنيو كان فيه رز باللبن، سلاطة
فواكه، وﭼيلي. وإحنا طلبنا الكريم كراميل بـ 7.95 جنيه وكان طعمه حلو بس ماكانش
ماسك نفسه كويس.

رغم أن
المكان مش يوناني 100%، بس برضه «سوﭭـلاكي هاوس» بـ يقدم عشاء كويس وساندوتشات
سريعة وبطاطس تيك أواي، وأكله هـ يعجبكوا قوي.