The Definitive Guide to Living in the Capital , Cairo , Egypt

مطاعم
سيريانا – Syriana

سيريانا: مطعم على قد حاله في الدقي

تم التقييم بواسطة
Muhammad Nasr
قيم
قيم الآن
سيريانا: مطعم على قد حاله في الدقي

شارع التحرير من الشوارع الأساسية في منطقة الدقي ويعتبر هادئ نسبيًا وما فيهوش محلات كثيرة بالمقارنة بشوارع في حجمه وموقعه، في ظل الهدوء ده اتفاجئنا بمطعم “سيريانا” اللي فتح من مدة قريبة، المكان الأول كان محل مقفول وما فيهوش أي حاجة، لكن من فترة بدأت فيه التجهيزات وإحنا بدأنا نجهز نفسنا لمقال نقدي جديد عن المكان اللي هـ يفتح.

مع اقتراب الافتتاح عرفنا أنه محل أكل سوري والمطاعم السورية بدأت تظهر بشكل كبير في القاهرة بعد ما كانت المنافسة بين مطعمين ثلاثة معروفين، وده بسبب أحداث الثورة السورية ولجوء عدد كبير من اخواننا السوريين لدول قريبة منهم ومنها مصر، نتمنى ربنا يفك كربهم وينصرهم وأكيد طبعًا منورينا في مصر.

على رأي المغني الكبير أحمد عدوية “زحمة يا دنيا زحمة” الشوارع كلها متكربسة بالعربيات والدنيا حر قولنا مفيش غير المترو (هاتولي مترو)، نزلنا من محطة الدقي ومشينا مسافة صغيرة قوي علشان نلاقي محل “سيريانا” اللي هـ تميزوه بيافطته الكبيرة بلونها الأحمر المميز وأضواء مبهرة، المحل عبارة عن طرقة طويلة في يمينها عدد من الترابيزات والكراسي وفي نهاية الطرقة دي الكاشير على الشمال والمطبخ في الوش، كمان فيه تابلوهات معلقة على الحائط فيها صور للأماكن المميزة في سوريا وخريطة للبلد مع عبارات زي “سورية جريحة” وغيره من عبارات الثورة والنصر، بصينا في المنيو البسيطة اللي متقسمة لساندويتشات بأنواعها ما بين برجر وجريل وبانيه ومسخن وبرجر بالإضافة إلى الوجبات اللي عبارة عن بطاطس وأرز وخبز شامي وسلطة كول سلو ومخلل ومايونيز وثومية، طلبنا من الجرسون اللي كان متعاون ولطيف الجريل شيش طاووق اكسترا (15 جنيه) واللي جذبنا له اكثر أنه مكتوب بجانبه كلمة “اختصاصنا” وكمان مكتوب أنه مبهر بخلطة سيريانا، وشاورما شامية دجاج (28 جنيه) اللي مكتوب أنها ساندوتش شامي متقطع وبـ ييجي معاه بطاطس ومخلل وثومية، فترة انتظار مش كبيرة ووصل الطلب، ساندوتش الشيش طاووق وصل كان ملفوف في ورق فويل وساخن لكن الفراخ كانت أقرب ما تكون مقلية عن مشوية كمان قدرنا بصعوبة نميز خلطة سيريانا اللي كانت عادية وطعمها مش قوي، أما الشاورما الشامية اللي عبارة عن ساندوتش سوري مقطع مع بطاطس محمرة ومايونيز وكاتشب ومستردة مع خيار وجزر ولفت مخلل ، الشاورما كان طعمها حلو ومعمولة كويس وعليها ثومية وبهارات، تقدروا تقولوا على الساندوتش معقول بالنسبة للساندوتشات السوري، أما البطاطس كان عليها بهار له طعم لذيذ لكنها كانت مزيتة شوية.

محل سيريانا ماعداش عليه 6 شهور وياريت يأخذوا بالهم من بعض الملحوظات في البداية علشان يقدروا يثبتوا نفسهم على ساحة المطاعم السورية في مصر لأن المنافسة مش سهلة.

نصيحة 360

ما فيش أحلى من تمشية على كورنيش الجيزة بعد الأكل.

أحسن حاجة

الديكور البسيط وساندوتش الشاورما الشامية.

أسوأ حاجة

البطاطس المزيتة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح