The Definitive Guide to Living in the Capital , Cairo , Egypt

رنا شرف

الشاورما السورى لها عشاق كتير في العاصمة المصرية، واصبحت بدرجة كبيرة من مصادر البهجة في الخروجات الشبابية. ومؤخرًا حبينا نجرب شاورما سوري من عند “شاكر”، اللي فتح جديد في المعادي، وفي وقت قصير أصبح له شعبية بسبب شاورمته الجامدة.. تعالوا نجربه مع بعض علشان نعرف الشاورما عنده فعلًا جامدة ولا!

“شاكر” بيقدم خدمة حلوة يمكن مش كل الأماكن بتقدمها، وهي شراء الشاورما بالكيلو، طلبنا من عنده نصف كيلو شاورما لحمة، ونصف كيلو شاورما فراخ. وبييجي معاها عيش سوري علشان تعملوا السندوتشات بنفسكم، وتقدروا طبعًا بعد ما تعلموا الساندوتش تحطوه في الميكروويف علشان يبقى سخن قوي، وممكن تعملوا السندوتشات على طول عادي لأن الشاورما والعيش بييجوا سخنين بسبب التغليف اللي بيحتفظ بالحرارة.

بييجي مع الطلب مجانًا شوية سلاطات حكاية، عبارة عن ثومية وكول سلو وطحينة، وتغليف الطلب بيكون ممتاز.

نيجي بقى للطعم؛ بصراحة عجبتنا الشاورما الفراخ أكتر من اللحمة، كانت خفيفة ومافيهاش دهون كتير، عكس اللحمة اللي كان فيها دهون بسيطة بس أزعجتنا شوية.

أما السلاطات فكانت جيدة، ماعدا الكول سلو، كنا نتمنى يكون أحسن من كده، وبرضه كنا نتمنى إن كمية السلاطات تكون أكبر من كدة خصوصًا إن الطلب كبير مش قليل. لكن نحب نعترف إن الثومية كانت جميلة جدًا، ويمكن تكون من أفضل المقبلات اللي جربناها مؤخرًا في مطاعم القاهرة.

الأسعار معقولة مقارنة بالكمية والجودة، يعني طلب نصف كيلو شاورما لحمة سعره كان 230 جنيه، أما نصف كيلو شاورما الفراخ فكان بـ180 جنيه.