The Definitive Guide to Living in the Capital , Cairo , Egypt

تجربتنا في شكسبير أند كو – Shakespeare & co، كانت مختلفة عن توقعاتنا جدًا لأن المطعم له سلسلة محلات مشهورة، والمفروض أنهم يكونوا متبعين القواعد العالمية للتقديم والخدمة.

المكان في بلاتفورم المعادي، قاعدة خارجية بكراسي ملونة مع منظر النيل، حاجة آخر دلع، وفيه مكان داخلي مقفول مكيف، للي يحب، ولازم نقول أن الديكور تحفة من أول الكراسي الملونة لحد التابلوهات والنجف، ولكن هل الديكور المميز يقدر ينجح مطعم أو كافيه؟

المنيو متنوع جدًا ما بين أطباق بيتزا ومكرونة وساندويتشات وعصائر وحوالي 10 أنواع فطار من أكثر من مطبخ عالمي. قررنا أننا نبدأ بعصير من الكوكتيلات المختلفة وأختارنا Minty Licous بـ 36 جنيه، وعصير برتقال (26 جنيه)، وبعد كده قولنا نجرب الفطار فطلبنا Eggs Benedict (64 جنيه).

نزل عصير Minty Licous واللي كان مكون من كيوي ونعناع وبرتقال وآيس كريم ليمون، وكان طعمه تحفة وفكرة أن الليمون كان آيس كريم فكرة هايلة، لكن عصير البرتقال ماكانش قد كده يمكن علشان مش الموسم بتاعه، بس كان بلا طعم تقريبًا. نيجي بقى للطبق الرئيسي الـ Eggs Benedict عادة الطبق بيكون مكون من قطعتين توست عليهم بيكون أو روستو مدخن وعليهم بيض مسلوق على درجة قليلة جدًا لأن الصفار بيكون ني وبيتقدم معاه صوص هولنديز، إحنا طلبنا تكون درجة الحرارة أحلى سنة بس مش لدرجة أن البيض يكون ناشف وللأسف اللي وصل لنا كان بيض مافيهوش أي صوص، ناشف جدًا وكمان مافيش بيكون أو روستو مجرد البيض والتوست، وبرغم أن حجم الصوص كان كبير إلا أنها ضربوه لدرجة أنه بقى بيوريه بجد، يعنى لو كنا استنينا عليه شوية وحطينا حبة حاجات تانية كان ممكن يكون كيكة، ولما قولنا للجرسون، غيره بس بصوص ايه تحفة، هو ماكانش صوص الحقيقة هو كان حبة بيض مضروب بشوكة كان خفيف زي العصير، للأسف مافيش وسط أو أي حرفية، بمناسبة الحرفية بعد ما كنا طلبنا من الجرسون أول مرة، جاء لنا حد تاني وخد الأوردر بحجة أن الأولاني لسه بيتدرب فمش عارف حاجة، طيب بتدربوهم يبقى مايطلعوش للزبائن يا جماعة. حاولنا نتماسك نفسنا ونغير نطلب حاجة حلوة بالذات أن في المنيو كاتبين أن من تخصصهم الحلويات، فطلبنا Lemon Tart (24 جنيه). وشاي Treasure Blom (31 جنيه). إحنا حقيقي مش عارفين هم اتأخروا في إيه والتارت جاهزة ورانا في التلاجة، والشاي أخد حوالي ساعة إلا ربع علشان يطلع لنا.

المهم التارت كانت معقولة بس عليها ترانشاية برتقال المفروض أنها مكرملة وكانت متنفذة بشكل سيء للأسف، وعجينة التارت كانت ناشفة جدًا ومش طازة.

أما الشاي فهو عبارة عن نبات مستورد اتقدم في براد بلاستيك شفاف، وكان طعمه حلو الحقيقة، بس مش محتاج مجهود علشان يتعمل.

تجربتنا في شكسبير اند كو للأسف كانت سيئة جدًا، لو عاوزين مكان تشربوا فيه أي حاجة معلبة مع منظر جميل ممكن نقول لك هتستمتعوا بس لو بتدورا على حرفية وأكل حلو ما نعتقدش أن ده مكانكم المناسب.