The Definitive Guide to Living in the Capital , Cairo , Egypt

دائمًا لما كنا بـ نشوف علامة «صب
واي – Subway» الصفراء في أبيض في فروعه
الموجودة في الزمالك والمعادي وسيتي ستارز وداخل الجامعة الأمريكية كنا بـ نفتكر
أن المكان ده عامل زي “On
the Run” في طبيعة الساندويتشات الجاهزة والباردة اللى بـ يقدمها،
لكن المفاجأة أن الموضوع أكبر من كده بكثير.

طبيعة ساندويتشات “صب واي”
عاملة زي محل “TBS”،
أنت اللى بـ تختار مكونات الساندويتش بنفسك وبـ يتعمل أمامك، بداية من نوع العيش
لحد نوع الصوص على المكونات، والدليل على كده أنهم كاتبين على المنيو “Make it your way”. محل الزمالك صغير جدًا
لدرجة أن مافيش غير ترابيزة واحدة فقط وفيه سلم للدور العلوي لكن اكتشفنا أنه
المطبخ! لكن شكل طبيعة المحل قاصدة أنك تأخذ ساندويتشك وتأكله وأنت ماشى.

أول حاجة بـ تختار نوع العيش (إيطالي،
أو أسمر، أو بالعسل والشوفان، أو بارميجان أوريجانو، أو بالسمسم) وفيه حجمين للعيش
(برائحته الجنان والخبيز الوهمي) إما “على حد تسميتهم” 6 إنش (15 سم) أو
فوت لونج Footlong وده 30 سم،
الأسعار فى المنيو للـ 6 إنش، لو عاوز الحجم الأكبر بـ تزود على سعره 15 جنيه، بعد
كده بـ تختار نوع الإضافة: جبن، لحم، شرائح لحم، وبـ يسألك عاوز تسخنه ولا لأ وبـ
ننصحك تعمل كده لأنه لما بـ يدخل الفرن المكونات والطعم بـ يكونوا حاجة ثانية حلوة
جدًا لأن العيش كمان بـ يتحمص شوية، وآخر خطوتين بـ تختار الخضروات (خس، طماطم،
خيار، خس، خيار مخلل، فلفل حلو، زيتون، بصل، هالوبينو) والصوص (سويت أونيون،
مسطردة وعسل، زيت وخل، مايونيز).

الساندويتشات حوالي 17 نوع بـ
يتراوح سعرها من 12 إلى 22 جنيه (دي أسعار الـ 6 إنش)، والأنواع هى: إيطاليان بي
إم تى (تركي مدخن مع ببيروني وسلامي)، وتونة، وصب واي ميلت (صدور تركي مع تركي
مدخن وشرائح بيف)، وسبايسي إيطاليان، وتشيكن ترياكي، ومارينارا كرات اللحم، وروستد
تشيكن برست، وستيك أند تشيز، وصدور تركي، وصب واي كلوب (صدور تركي مع تركي مدخن،
روست بيف)، وتركي برست أند ثاي، وروست بيف، وسي فوود سينسيشن، وبيتزا صب، وتشيكن
باربكيو، وتشيكن بارميزان، وفيجي ديلايت.  

فيه كمان عندهم وجبة كومبو (البيبسي
سعره لوحده بـ 7 و8 جنيه! والكان بـ 6 جنيه، والبطاطس عبارة عن كيس شيبسي عادي
اللى بـ نجيبه من السوبر ماركت بـ 1 جنيه هـ تلاقي سعره لوحده هناك بـ 3 جنيه)، الوجبة
بـ 25 جنيه للحجم الـ 6 إنش لأصناف التيرياكي، الإيطاليان بي إم تي، صدور التركي، ومارينارا
كرات اللحم، وممكن كمان عندهم تختار مكونات الساندويتش الـ 6 إنش بتاعك وتحوله إلى
سلاطة بإضافة 2 جنيه (لكن ده غريب شوية لأن كده هـ نأخذ نفس المكونات من غير عيش
ونضيف 2 جنيه كمان؟!).  

ممكن تزود إضافات على ساندويتشك
من 2 إلى 6 جنيه في الحجم الصغير ومن 4 إلى 12 جنيه فى الحجم الكبير، ومكتوب أن عندهم
كمان كوكيز (الواحدة بـ 6 جنيه، الـ 3 بـ 15 جنيه والـ 12 بـ 60 جنيه!) لكن قالوا
لنا أنها مش موجودة في كل الفروع ما بـ تنزلش حاليًا!

“صب واي” بـ يعمل خدمة Catering بـ يعملوا لك صينية مشكلة
ساندويتشات وكمان كوكيز، اتصلوا برقم التليفون علشان تعرفوا تفاصيل أكثر، الفكرة
أن المكان رائع جدًا للناس اللي مهتمة بصحتها وبـ تختار اللى حابة تأكله وبـ يتعمل
أمام عينيها، إلى جانب ضمان النظافة وأنها صحية، لكن بعض الأسعار مش منطقية شوية،
لكن ده ما يمنعش أننا حبينا المكان وحبينا ساندويتشاته.