The Definitive Guide to Living in the Capital , Cairo , Egypt

مطاعم -
مقترح

كايرو بايتس: أكبر تجمع للأكل فى مصر

كايرو بايتس: أكبر تجمع للأكل فى مصر
بواسطة
Cairo 360

تفتكر أن صفحة المطاعم هى أكثر صفحات كايرو 360 متابعة ونشاط حصلت بالصدفة؟ أكيد لأ؛ شوف، رغم أن مصطلح الذواقة فى الغالب بـ يُقال على الأكل فى الأماكن الراقية، بس مصر لها ذوق مميز وحب الأكل ده حاجة ثانية خالص، سواء كانت أكلة فول وطعمية على عربية فول، أو أجمد مطعم فيكى يا قاهرة.

الموضوع ده كان حافز لماجدة جمعة وفريقها من الأكيلة أنهم يعملوا أكبر تجمع أكل هـ تشهده مصر. باسمه اللذيذ “كايرو بايتس – Cairo Bites” بـ يقدم مطاعم أكل وشرب من كل حتة فى القاهرة تحت سقف واحد يوم السبت 26 أبريل فى قصر البارون فى هليوبوليس.

الحقيقة أن كايرو بايتس أكبر من مجرد مهرجان أكل.

وضحت ماجدة الموضوع أكثر وقالت: “إحنا بـ نحاول نشجع صناعة الأكل. لاحظنا كمان أن فيه موضة بـ تفتح فى كل الشوارع بمطاعم وأفكار وعروض أعدادهم مالهاش حصر. وكلهم شغالين وكله تمام”.

المهرجان بـ يوفر الفرصة لكل خبراء الأكل يعرضوا إنتاجهم، بمجموعة مختلفة من المطابخ وأفكار أكل مختلفة، وده يعكس زيادة التغيرات اللى بـ يشهدها الاتجاه الطبيخى فى القاهرة.

“أصحاب الموضوع عاملين شغل جامد. عندنا قائمة متنوعة من المطاعم، المخابز، بوفيهات الفواكة والسلاطات، وغيرهم. بالنسبة للمطابخ الموجودة، بـ نوعد الناس أنها تتذوق طعم العالم كله فى يوم واحد، ودى مش مبالغة على فكرة!”

مع اختيارات الأكل اللى مالهاش حصر، كايرو بايتس كمان بـ يستضيف أنشطة كثيرة، من عروض حية، لحفلات موسيقية وحتى الأطفال لهم نصيب بعدد من الأنشطة المخصصة لهم.

لما نتكلم عن حدث بالضخامة دى، يبقى أكيد محتاج مكان ضخم، وماجدة فى الحقيقة اختارت قصر البارون من غير تردد.

“قصر البارون بجد تحفة معمارية، مكان مشوق منعزل وسط واحد من أزحم شوارع القاهرة. كنا نقدر نختار مكان ثانى، يكون أرخص شوية، بس فعلاً القصر هو أحسن مكان يكمل أكبر مهرجان أكل مصرى”.

ومع عشق الناس للأكل، ناقشناهم فى احتمالية أن كايرو بايتس يتنظم فى ميعاد ثابت.

“طول ما المصريين بـ يحبوا الأكل، أكيد الفرصة كبيرة جدًا. إحنا عاوزينه يتحول لعيد سنوى لمجتمعنا يقدر فيه الناس يتعرفوا على بعض وسط جو من الفرح والأكل اللذيذ”.

اعرف أكثر عن صفحة كايرو بايتس على الفيسبوك وتفاصيل التذاكر من هنا. لأصحاب المطاعم والمحلات الثانية اللى عاوزين يحجزوا مكان فى المعرض اتصلوا على 01097900044 أو 01003913911 أو البريد الإلكترونى info@cairobites.com.

بالهنا والشفا!

مقترح