The Definitive Guide to Living in the Capital , Cairo , Egypt

بعد أول أسبوع من الشهر بنتفاجئ أن هوب المرتب خلص، وده شيء صعب جدًا وسط الجوع المستمر في الشغل، فحبينا نوفر عليكم التدوير وجبنا لكم 10 أماكن بيقدموا أكل حلو ورخيص من مطابخ مختلفة لو ميزانيتك أقل من 50 جنيه.

طازة

طازة محل ساندوتشات في الدقي، عنده تشكيلة كبيرة ومتنوعة والأهم إن أكلهم نضيف جدًا ورخيص وتقدروا تشوفوا العنوان والمنيو من هنا.

عز المنوفي

عربية كبدة وسجق صغيرة في الدقي بتوفر لك الساندوتش بحوالي 7 جنيه، صحيح هو صغير شوية بس يملى التنك، وتقدروا تعرفوا عنوانه  ورأينا فيه من هنا.

حوواشي الربيع

مكان مختلف في إمبابة بيقدم حوواشي خطير، لازم تجربه وأكتر ميزة فيه أنه على قد الإيد، وتقدروا تعرفوا عن تجربتنا فيه وعنوانه من هنا.

أسماك الشامي

مكان لطيف في وسط البلد قدم لنا تجربة سمك ما حصلتش ويا دوب على قد الميزانية، أعرفوا عن تجربة كايرو 360 وعنوان المكان من هنا.

مكرونة الإنسجام

أحلى طبق مكرونة باللحمة المفرومة ممكن تضربه في الجيزة وأحلى حاجة فيه سعره. التفاصيل والعنوان هنا.

زيزو نتانة

نار على علم ومشهور جدًا جنب شارع المعز بساندوتشاته الشهية واللي سعرها معقول أعرفوا أكتر عن المكان من هنا.

عبده تلوث

ساندوتشات حواوشي تلاقي، كفتة وسجق وسكلانس تلاقي، كل اللي نفسك فيه هتلاقيه عند عبده تلوث في مدينة نصر وعنوانه هنا.

سمسمة

أحلى شاورما في العالم في سمسمة الدقي، مشهور بالشوارما بتاعته جنب الساندوتشات التانية بس الأكيد إن الساندوتشات بتاعته لا يُعلى عليها. التفاصيل هنا.

مرزوقة

بدأوا بعربية فول وطعمية ودلوقتي بقى عندهم محل وبيقدموا ساندوتشات كبدة وسجق وبرجر ومكرونة وكلها بأسعار تبع الميزانية. العنوان هنا.

يوكل

أحلى سندوتشات كبدة وسجق وكفتة من المعادي أو الزمالك أو مدينة نصر تقدر تطلبهم أو تروح لهم في مكانهم. والتفاصيل هنا.