The Definitive Guide to Living in the Capital , Cairo , Egypt

سمعنا أن فيه مطعم جديد فتح اسمه سمكاوي أفندي، ويعتبر من مطاعم وسط البلد لقربه من ميدان لاظوغلي، وكانت الآراء عنه متناقضة تمامًا فإحترنا نصدق مين، وعلشان كده قررنا نروح بنفسنا  ونجرب أكلهم، وننقل لكم تجربتنا عن المطعم والأكل، وفي السطور اللي جاية هنقولكم على رأينا.

في البداية المطعم صغير مش كبير، وفيه 4 ترابيزات وويتر واحد، والويتر حقيقة حد كويس جدًا ومبتسم وخدوم، والمطعم عامل ديكور كله ألوان، وإضاءته خفيفة جدًا زيادة عن اللزوم، وبما إننا مش عارفين مستوى الأكل إيه، قلنا نجرب حاجة صغيرة، وبالفعل طلبنا شوربة سي فود بـ45 جنيه، ودي كانت أغلى شوربة عندهم، ولكن لما نزلت الشوربة كنا فاكرينها “طحينة”، وللأسف طلعت سي فود، وطعمها كان مش قوي وريحتها مش أحسن حاجة، ولكن الـ3 جمبريات الصغيرين اللي كانوا فيها عجبونا، وأكلناهم وسبنا الشوربة.

طلبنا كمان أرز بالجمبري بـ30 جنيه، وكنا متوقعين إن الأرز بيكون بتاع سمك وله طريقة للطبخ وطعم مميز، لكن عندهم الأرز أصفر وفيه فلفل ألوان وجزر وبهارات صحيح طعمه كان حلو ومختلف، بس مش للسمك، والأرز مكنش فيه “جمبري” مدفون، كان مجرد 7 وحدات جمبري حولين الأرز اللي كان واخد شكل قلب، والجمبري تتبيلته كانت حلوة ومقرمش من بره وطري من جوه، بس لونه غامق جدًا زيادة عن اللزوم، وده قلقنا وخلانا مش عارفين ده بلدي ولا مستورد، لأن التتبيلة مغيرة الطعم جدًا.

وفيه صفة مشتركة في الأكل عمومًا حتى اللي كانوا حوالينا اشتكوا منها ان الملح كتير زيادة عن اللزوم، ولازم ياخدوا بالهم من ده، وكمان وقت تجهيز الأكل بيوصل لساعة لطلب صغير زي اللي جربناه، رغم إننا لما طلبنا ماكنش فيه زحمة، ولا فيه حد غيرنا، وجت أسرة بعدنا وأشتكوا من الوقت كمان، ونقدر نقول أن المطعم بلدي وشعبي جدًا سواء لخدمته أو مكانه أو نوعية الأكل اللي بتتقدم، ونتمنى أنه يطوروا من نفسهم ويكونوا أقوى من كده.