The Definitive Guide to Living in the Capital , Cairo , Egypt

رنا شرف

لو كنتم من عشاق السمك، فأكيد طول الوقت بتدوروا على مطعم كويس بيقدم أكلتكم المفضلة بجودة عالية وسعر معقول، إحنا كمان من عشاق المأكولات البحرية، وعلشان كده قررنا نروح مطعم “فيش غلك” في المعادي.

أول حاجة لفتت نظرنا في المكان هو اسمه، “فيش غلك”، والحقيقة الاسم ذكي وبيلعب على التعبير المصري الشائع اللي بنستخدمه ساعة الغضب، وفي نفس الوقت كلمة “فيش” بالإنجليزية اللي معناها سمك.

المكان بيقدم نفسه بشعار مثير للانتباه، وهو “سفارة بورسعيد في المعادي”، وطبعًا كلنا عارفين أهمية “بورسعيد” لما نتكلم عن السمك.

عجبنا في المكان إنه شيك، وده لاحظناه من أول ما دخلنا المطعم؛ الكراسي والترابيزات لونها جميل، أبيض مريح للعين، وطبعًا من أول ما تعدي من مدخل المطعم هتلاقي الأسماك موجودة قدامك، وهتقدر تختار من ثلاجة الأسماك الكبيرة النوع اللي يعجبك، ودي حاجة منتشرة في أغلب محلات الأسماك، يعني أول انطباع خدناه عن المكان هو إنه شيك وراقي ونضيف.

هناك ممكن تتوه فعلًا من كتر الأصناف، لأن كل الأنواع موجودة قدامك، وإحنا هناك لقينا عرض علي صواني السمك، منهم صينية اسمها “فيش غلك”، ودي كبيرة شوية، وفيها 4 سمك بوري و4 أرز، ونص جمبري مشوي، وربع كفتة جمبري، وسلطات دي سعرها 555 جنيه.

إحنا اختارنا صينية التفليتة، ودي صينية بتتكون من 4 سمكات بلطي، و4 أرز و12 واحدة جمبري مشوي، ونص جندوفلي، مع سلطات وعيش، ودي سعرها 275 جنيه، وبشكل عام السمك كان حلو وطازة، الأرز كمان طعمه بيتي، والسلطات حلوة بس الكمية قليلة، والجمبري نقدر نقول إنه عادي، يعني كان ممكن يكون أحلي، أما الجندوفلي فكان لطيف لكنه مش أحلي حاجة لو قارناه بمطاعم تانية معروفة.

طلبنا كمان سلاطة الرنجة علشان كان نفسنا نجربها عندهم، بس للأسف ماكنتش زي ما توقعنا، مش أحلي حاجة، وطعم الرنجة كان ضايع فيها، ولوهلة حسينا إنها أقرب للبابا غنوج عن الرنجة!

تجربتنا هناك كان فيها إيجابيات وسلبيات، لكن نقدر نقول إن المكان وفريق العمل وتنوع السمك. كل ده ممكن يخلينا نجرب تاني المكان، كمان الأسعار معقولة مقارنة بأماكن تانية، يعني تقدروا هناك تطلبوا صينية سمك كبيرة بـ 275 جنيه، ودي صينية تعتبر عائلية.

المطعم موجود في المعادي، وبالتحديد في شارع إبراهيم الخليل، جراند سيتي المرشدي، زهراء المعادي.