The Definitive Guide to Living in the Capital , Cairo , Egypt

مطاعم
مكاني

مكانى: سحور رمضانى غير تقليدى فى المعادى

  • جراند مول المعادي
  • سوشي
  • 8 صباحاً - 3 صباحاً -
تم التقييم بواسطة
Gaser El Safty
قيم
قيم الآن
مكانى: سحور رمضانى غير تقليدى فى المعادى

مع دخول ثالث أسابيع رمضان، ووسط العزومات الأسرية الحتمية، بـ نشوف على الناحية الثانية كثير من المطاعم بـ تحاول تقدم بدائل مبتكرة للإفطار، أصل مافيش أكثر من السمبوسك وورق العنب على كل الترابيزات المصرية.

ملوك الابتكار فى “مكانى – Makani” قرروا يعملوا وجبات رمضانية مختلفة؛ عندك مثلاً اختيارات من اللحم المقلى وفراخ بالبهارات، والاثنين معاهم مكرونة إيطالى، وسلاد، وشوربة وكركديه (75 جنيه). الوجبة الثالثة كانت حاجة خفيفة، والغريب أنها كانت مناسبة جدًا لأجواء رمضان، وجبة سوشى (95 جنيه).

أربع قطع فيلاديلفيا رول، وأربع قطع كرسبى رول، واثنين نيجيرى سلامون، وقطعة كراب نيجرى وشوربة ميسو، وبكده تعتبر وجبة سوشى على الإفطار اختيار لطيف للناس اللى تحب تفطر حاجة خفيفة. الوجبة كمان مناسبة للسحور، فيها نشويات وبروتينات كافية تكمِّل بها يومك بأقل كم ممكن من المقليات، الأحسن أنك تلغى الوسابى.

مكانى معروف بطعم السوشى الرائع غير المعلّب. شوربة الميسو تكونت من مرقة، وتوفو وواكامى، صحيح طعمها فى الأول كان عديم النكهة، لكن تقدر تعالج المشكلة بشوية ملح وليمون.

الفيلادلفيا رول كانت مكونة من جبن فيلادلفيا، وقطع كابوريا، وخيار، وأفوكادو، وأرز وطحالب بحرية ملفوفين مع سلامون وسمسم، وطعمها فعلاً لذيذ قدر يخلق تناسق ممتاز بين الجبن الكريمي، وقوام الخيار وحلاوة السمسم.

أما الكرسبى رول فكان عبارة عن أرز، وجمبرى مقلى، وخيار، وسمسم وصوص ترياكى، وطعمه كان لذيذ بنفس الدرجة وكان أكثر حاجة مقرمشة وسط كل الرولات اللى جربناها.

النيجرى الموجود للأسف كجزء من وجبة الإفطار كان من أقل الاختيارات ابتكارًا، زى السلامون ساكى، المكون من سلامون وأرز فقط، والكراب رول، المكون من كابوريا وأرز فقط، والشريمب شيواكى؛ ملح مشوى مع جمبرى وأرز. صحيح رول السالمون والجمبرى كان لطيف، الكراب رول المستخدم فيه الكابوريا المعلبة نكهته كانت مش قد كده.

كلام غريب ومختلف عن تقاليد رمضان؟ طبعًا، لكن بعد تجربة وجبة السوشى على السحور، كاتب المقال الصائم كان كله نشاط وحيوية.

نصيحة 360

مكانى بـ يوصل اختياراته من وجبات الإفطار والسحور، وطلبك هـ يوصل لك سريعًا.

أحسن حاجة

الكرسبى رول منتهى اللذة.

أسوأ حاجة

قطع الكابوريا مش من النشويات.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح