The Definitive Guide to Living in the Capital , Cairo , Egypt

مطاعم
موروز تيك أواى – Moro’s Take Away

موروز تيك أواى: أكلات سريعة عادية فى المهندسين

  • 23 شارع سوريا - المهندسين
  • مأكولات سريعة
  • 24 ساعة -
تم التقييم بواسطة
Ahmed El Dahan
قيم
قيم الآن
موروز تيك أواى: أكلات سريعة عادية فى المهندسين

صناعة الأكل فى العموم زيها زى أى حاجة ثانية من ناحية المنتجات المستوردة والأفكار، والحقيقة أن الجو العام السائد فى مطاعم القاهرة لسه رايح ناحية مبدأ الفاست فوود لإشباع رغبات المصريين، وده هو السبب الأساسى أن كثير من المطاعم المحلية والسلاسل قادرة تنافس أسماء عالمية زى ماكدونالدز وغيره.

على شارع سوريا فى المهندسين، “موروز تيك أواى – Moro’s Take Away” إضافة جديدة من الإضافات المستمرة لمطاعم الأكلات السريعة فى القاهرة، بمنيو شاملة ترضى كل الأذواق، لأى وجبة طوال اليوم. صحيح الدعاية بـ تقول أنه مطعم تيك أواى بـ يوصل 24 ساعة، بس عندهم كمان مكان قعدة بسيط، عبارة عن بار أسود وكراسى عالية بمساند حمراء.

طبعًا شكل الأكلات السريعة اللى كلنا عارفينه موجود، بس الجديد من موروز هو شوربة العدس (9.99 جنيه) وكريمة الفراخ (19.99 جنيه). المطعم كمان بـ يقدم ثلاثة أنواع من الكلوب ساندويتش: تونة (15.99 جنيه)، روست بيف (17.99 جنيه) وبيض بالجبنة (12.99 جنيه).

احتمال أكثر حاجة تشدّك فى المنيو تبقى ساندويتش بيتزا فراخ (16.99/ 20.99 جنيه)، عبارة عن شرائح من الفراخ وقطع هوت دوج عليهم زيتون، وطماطم، وفلفل أخضر وجبنة موتزاريلا. رغم أن بخار الحرارة كان طالع من العيش الأبيض، خلطبيطة المكونات ما قدرتش تنسجم مع بعضها، مع الفراخ عديمة الطعم الغالب عليها طعم الجبنة المملح بزيادة.

صحيح طعم كلوب ساندويتش البيض بالجبنة –اللى يعتبر أكثر حاجة صحية فى منيو موروز-  فى المجمل كان معقول وقريب من أكل البيت، مع شرائح طازجة من الخس والطماطم، بس المشكلة أن استخدام شرائح الجبن المعالج كان مش موفق. حتى لو كانوا استخدموا جبنة شيدر عادية برضه كان يبقى أحسن.

بالنسبة للمقبلات والأطباق الجانبية فمتنوعة: حلقات البصل (كبير 11.99 جنيه) وبطاطس محمرة (وسط 4.99 جنيه/ كبير 6.99 جنيه) والاثنين متحضرين بزيت زيتون طازة أضاف لهم قوام مقرمش وطعم خفيف، مع رشة من البهارات. رغم أننا كنا مستنيين نذوقهم بصوص المايونيز بالثوم (1.75 جنيه) المخصوص من موروز، الطعم كان كله مايونيز وبس، ومافيش أى نكهة للثوم.

رغم أنه بـ يقدم أكلات سريعة مناسبة ومافيهاش تعقيد، موروز تيك أواى مش بـ يقدم أى ابتكار أو جديد –كلام كبير على مطعم فاست فود، مش كده؟- يقدر به يخطفنا من مطاعمنا المفضلة.

نصيحة 360

موروز عنده خدمة توصيل، اتصل بـ 02-33479922.

أحسن حاجة

حلقات البصل تعوض أى حاجة.

أسوأ حاجة

مافيش حاجة جديدة تجربها.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح