The Definitive Guide to Living in the Capital , Cairo , Egypt

مطاعم
موري سوشي & جريل – Mori Sushi & Grill

موري سوشي أند جريل: منيو جديد وأكلات أجدد ونفس الجودة العالية

  • 30 شارع جزيرة العرب
  • سوشي,ياباني
  • 10 صباحاً - 1 صباحاً -
تم التقييم بواسطة
Ramy Soliman
قيم
قيم الآن
موري سوشي أند جريل: منيو جديد وأكلات أجدد ونفس الجودة العالية

لما سمعنا أول مرة إن موري سوشي عملوا منيو جديد توقعنا أنهم يضيفوا كام رول جديد مع طبق مقبلات وواحد حلو على السريع، لكن كنا غلطانين. المنيو الجديدة فيها أكثر من 20 صنف جديد ما بين عصائر الموهيتو الرائعة وأطباق المقبلات اللذيذة زي بيبي شريمب بونبون baby shrimp Bonbons والتاكو سالاد، لرولات جميلة بنكهات من هاواي والهند وإيطاليا.

في الأول طلبنا موهيتو باشون (30 جنيه) وبعدين بدأنا نتفرج على منيو فرع المهندسين الجديد، ونبدأ كلامنا مع الموهيتو اللي كان عبارة عن أناناس وعصير باشون فروت وسبرايت وموهيتو وشرائح ليمون ونعناع فريش، ومع أول رشفة من العصير هيأخذك لجزيرة استوائية بعيدة عن العالم بدوشته وزحمته، وكمان يكفي فردين. ندخل على المقبلات اللي فيها أصناف جديدة هايلة، وطبعًا اخترنا موريز تاكوز (59 جنيه) بدون تفكير. التاكو عند موري سوشي عبارة عن أربع قطع عيش تورتيلا صغيرين محشيين سلطة ساشيمي عبارة عن مكعبات صغيرة فيها سمك وسالمون وتونة طازة، والتاكو نفسه واضح فيه نكهة الزنجبيل اللي عملت طعم هايل مع السمك وكمان قرمشة التاكو كانت ماشية مع السلطة واللحم الطري.

أما بالنسبة للرولات الجديدة، فالبداية كانت مع بيسو رول (59 جنيه لنصف الكمية). الرول كان عبارة عن رول أورا ماكي مرشوش عليه شوية صوص ترياكي ومحشي سكالوب وأفوكادو وجبنة بيضاء؛ لغاية هنا والرول عادي جدًا ومافيش حاجة جديدة. الجديد هنا إن تغطية الرول كان متغطي بفتافيت كورن فليكس، والفكرة دي داخلة في معظم أصنافهم الجديدة.الرول بشكل عام كان معمول كويس جدًا، بس لازم نقف احترامًا وتعظيمًا لرائحة الكورن مع صوص الترياكي المسكّر.مافيش مانع كامن ندخل على شوية سوشي مقليين على الماشي، والبداية كانت مع هوت بانكو رول (87 جنيه) وهو عبارة عن 8 قطع أورا ماكي رول محشيين شريمب تمبورا وجبنة بيضاء وهليون، ومتغطيين بعجينة بانكو وعليهم كافيار وصوص موري الشهير "سبايسي ليمون مايونيز". الهليون برضه من الحاجات الجديدة في المنيو، وبصراحة عمل طعم رائع للرول ده، أما عجينة البانكو فعملت قرمشة لذيذة. بكده نقدر نقول بعد ما جربنا البيسو رول إن السبايسي ليمون رول معشوق الجماهير الأزلي عند موري سوشي في خطر.

قررنا نأخذ استراحة من الرول وندخل على الهالبينو ساكي بلاتر Jalapeno Sake Platter (69 جنيه)، وهو عبارة عن شرائح سالمون رفيعة عليها فلفل أخضر وأحمر حراقين وبصل أخضر وعليهم صوص بونزو ponzu– صوص صويا لاذع – وصوص هالبينو. تركيبة الأكلة كانت مدهشة، يعني طعم البصل الأخضر القوي مع الفلفل السبايسي وصوص البونزو اللاذع عملوا شغل هايل مع السالمون. حاجة ثانية أبهرتنا كانت الهوت إنديان رول Hot Indian Roll (77 جنيه)، عبارة عن 6 رولات ملفوفين على طريقة السبرينج رول ومحشيين سالمون وجمبري مع نكهة الكاري القوية، وبيكون معاهم سويت تشيلي صوص. يمكن الجمبري والسالمون ماكانوش متماسكين وبيتفتتوا بسهولة، بس الطعم كان 10/10. السؤال دلوقتي: هل المفروض نعتبره سوشي رول ولا طبق مقبلات؟

خلونا دلوقتي نتكلم شوية عن اللازانيا رول (54 جنيه لنصف الكمية)؛ أيوه الاسم صح ومافيش غلطات إملائية. لازانيا رول! تخيل معايا رول أوراماكي محشي موتزاريلا وهليون وجمبري، وطبعًا كل المكونات كانت طازة وخفيفة، أما طعم السريراتشا Sriracha  اللذيذ وصوص السمسم فعملوا نكهة مميزة وفي نفس الوقت ماغطوش على طعم الرول نفسه. إحنا أسفين طبعًا لو كنتوا توقعتوا لحم مفروم وطبقات لازانيا وجبنة موتزاريلا؛ مافيش كلام من ده. جرّبنا كمان جونكان كريسبي ساكي Gunkan Crispy Sake (23/القطعة)، وهو عبارة عن أرز سوشي مع أفوكادو وعليهم سالمون مبشور ومايونيز سبايسي وفتات بانكو علشان إضافة شوية قرمشة، بس المميز فعلًا في الجونكان هو أرز موري سوشي الجديد، اللي أضافوا معاه شبت وكزبرة وبصل أخضر وصنوبر. المشكلة الوحيدة كانت إنه حجمه كبير. عمومًا، أكيد في ناس هيعجبها أرز موري الجديد لو أضافوه للرولات التقليدية علشان هو فعلًا طعمه حلو.

وصلنا لنهاية الحفلة، وطبعًا مافيش قفلة احسن من تويو رول (28 جنيه/للقطعة) علشان يكون مسك الختام. أرز سوشي وسالمون عليهم جبنة بيضاء، والحلو في الموضوع كان إضافة توت أحمر وأزرق أضافوا نكهة مسكرة لاذعة للرول.

ماحدش كان يتوقع كل الأصناف الجديدة في منيو موري سوشي، لكن أكثر حاجة عجبتنا يومها كان تنفيذ الأكل الرائع والرولات المبتكرة. موري رفع من سقف التوقعات يا جماعة، وبيقدم أكل وجودة مالهمش حل.

نصيحة 360

عايزين اقتراحات ثانية؟ ممكن تشوفوا مقال 10 Weird Things You Need to Try at Mori Sushi  على صفحتنا الشقيقة Cairo Gossip.

أحسن حاجة

أسفين يا سبايسي ليمون رول، البيسو والهوت بانكو خطفوا الأضواء عند موري.

أسوأ حاجة

لو كنت متردد، الموضوع هيكون صعب. قصادك اختيارات مالهاش حصر.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح