The Definitive Guide to Living in the Capital , Cairo , Egypt

الأكل بره البيت في رمضان له متعة، خصوصًا لما يكون وسط لمة من الحبايب، وخلال رحلة كايرو 360 لمطاعم القاهرة في الأيام الأخيرة، اتعرفنا على مطاعم كتير، جربنا فيها الإفطار والسحور، منهم اللي كان كويس، ومنهم اللي حسينا عنده بخيبة أمل كبيرة! في الموضوع ده هنعرفكم على تفاصيل تجربتنا في 8 مطاعم زورناهم خلال الشهر الكريم.

مطاعم جربناها في الأفطار

مطعم طشة –  تقييمه 3.5 من 5، كل شيء عنده بيرفكت، لكن للأسف فيه بعض الأكلات بتفلت منهم وبيكون مستواها مش أفضل حاجة، زي الشاورما البيتي والبانيه، ضايقنا كمان إن عدد العمالة عندهم قليل جدًا، وإحنا جربناه 3 مرات في رمضان.

مطعم حواوشي الربيع، وتقييمه 2.5 من 5، اللي على الرغم من جمال وطعامة أكلهم إلا أن الحجز عندهم صعب جدًا، ودايمًا التليفون مغلق أو مشغول للضغط اللي عليه، ولحد ما توصلوا لهم ممكن ماتلاقوش حجز وده حصل معانا مرتين ومرة كمان محدش رد علينا أصلًا بعد بعد عدد كبير من المحاولات، وكمان جودة الكبدة عندهم ماكنتش أحسن حاجة زي الأيام العادية.

مطعم فطومة، وتقييمه 2.5 من 5، واللي جرب المطعم ده زمان مش هيعجبه الجودة دلوقتي، وكمان معاملتهم بقت مختلفة عن طريقة المعاملة الكويسة اللي كانت في البداية، والقطط بتضايقكم جدًا هناك، ولكن مش هتلاقوا مشكلة في الحجز واللي بيكون طلباته بناءً على قائمة اليوم.

فرحات، تقييمه  2 من 5، وعندهم مشكلة كبيرة في الحجز، لأنهم بيطلبوا قبل الحجز تدفعوا مقدم قبل الإفطار وماعندهمش دفع أونلاين، لكن ده اتغير بعد كده، ولما روحنا أخيرًا بدون الحجز للأسف الحمام المشوي كان سيء ولكن المحشي كان حلو.

بيبو.. 1.5 من 5 أسوأ حجز ومشاكله كتير لدرجة أن المدير لما صممنا على حقنا طلب “عيدية” علشان يحل لنا المشكلة، وكان أسوأ أكل وخدمة، وزحمة جدًا ومافيش تنظيم، ولكن الشخص اللي كان بيساعدنا كان محترم وخدوم جدًا.

 

 

أماكن جربناها في السحور

أما في السحور فكان الموضوع مختلف والتقييمات عالية جدًا:

ونبدأها بسحور قصر القبة اللي موجود داخل قصر القبة الملكي وتقييمه 5/5 لأنه جمع ما بين الحجز الإلكتروني السريع، ونظام وديكور وعدم وجود زحمة ووجود باركينج وجودة أكل وخدمة ممتازة.

ومطعم زي لاونج.. 4 من 5 وأكلهم حلو جدًا ومميز وجميل، وخدمتهم رائعة ولكن الأسعار غالية جدًا بالنسبة لناس كتير، وممكن السبب في ده أن كل يوم عندهم حفلة، وده غير الخدمة والضريبة.

سحور الدجلاوية.. 3 من 5 مكان رائع ولطيف ومبهج والبنوتة اللي كانت بتساعدنا لطيفة ومرحة ولكن زحمة جدًا والخدمة فيه بطيئة، وتطلب مشروبات لها شيك مع نفسه ينزل تطلب شيشة شيك تاني تطلب سحور له شيك تالت ومافيش تنظيم، حسينا أنهم ماشيين بمبدأ اللي سبق أكل النبق، وحتى الحفلة اللي كانت موجودة مكنتش حفلة ولكن هما مزمار وتنورة من اللي بيلفوا في الشوارع وبيلزقوا لحد ما ياخدوا اللي فيه النصيب من كل ترابيزة.