The Definitive Guide to Living in the Capital , Cairo , Egypt

معالم وسياحة

10 حاجات لازم تعملها في القاهرة

10 حاجات لازم تعملها في القاهرة
بواسطة
Hannah Cooper

من أجمل الحاجات في
القاهرة إنها مزيج من القديم على الجديد، يعني تلاقي جنب المعمار العتيق الأثري
ناطحات سحاب حديثة، وجنب القهوة اللي من أيام الملك٬ تلاقي كافيه عالمي إيطالي ولا
أمريكاني. وده مابـ يعبرش عن حتى جزء ضئيل من غنى وتنوع الحضارة اللي موجودة في
القاهرة.

وإحنا من آلاف الحاجات
اللي ممكن تتعمل وتتشاف في القاهرة اختارنالك دول٬ وفي رأينا هما ما يتفَوِتوش، بس
الأكيد كمان إنهم ما يكَفوش، وده لإن القاهرة مدينة عمرك ما هـ تشبع منها ولا حتى
تقدر تستنفذ كل اللي ممكن تقدمهولك.

1.       أي سايح في
العالم لما بـ يسمع اسم “مصر”٬ أول حاجة بـ تيجي على باله هي الأهرامات.
ويمكن تكون شُفتها في أفلام كتير٬ لكن إنك تشوفها على الطبيعة فـ ده شيء تاني
خالص. الأهرام العملاقة ديه اتبنت كقبور مجهزة لفكرة البعث والحياة بعد
الموت سنة 2560 قبل الميلاد.

2.       بعد الأهرامات
تيجي مصر القديمة٬ بآثارها القبطية اللي فيها كنايس من القرن الخامس
ومعالمها جذابة وجميلة جداً. وعشان تشوف حاجة يمكن القاهريين نفسهم ما يعرفوهاش،
روح سوق الجمال الل اسمه “برقاش”٬ وده سوق للتجارة عمره آلاف السنين.

3.       ولو إتقدمنا
بالزمن شوية هـ نوصل للعصر الفاطمي٬ العصر اللي ساب في القاهرة يمكن أهم المعالم
في تاريخها. وبالتالي القاهرة الفاطمية لازم تكون محطتك الجاية، وعشان تشوف
أعظم معالمها إتمشى في شارع المعز بمعماره العتيق الساحر المبدع٬ ومشربياته
الدقيقة الجميلة٬ اللي بـ تحكي عن حضارة ليها سماتها وطعمها المميز. إتفرج على
«بيت السحيمي» المبني في القرن السابع عشر و دايماً دلوقتي يستضيف حفلات وعروض
ثقافية متنوعة أسبوعياً. ومش بعيد عن شارع المعز هـ تلاقي سوق «خان الخليلي»؛ وده
سوق رائع لكل ما هو شرقي٬ مصري، وكمان عربي٬ وخاصةً الفضة. روح هناك وأكيد هـ
تلاقي حاجة تحب تقتنيها وتفكرك بالقاهرة٬ لكن الأكيد إنك لازم تفاصل عشان تاخد سعر
مناسب. ولا غنى عن سهرة في الحسين على قهوة الفيشاوي في أجواء تاريخية وجميلة.

4.      
«قلعة صلاح
الدين»
اللي إتبنت في
القرن الـ 12 لكن بـ يغلب عليها طابع أحدث شوية بسبب بناء «مسجد محمد علي» في
أوائل القرن الـ 19. على هضبة عالية كاشفة من فوقيها القاهرة بحالها٬ القلعة مكان عمران
بالمصريين والسياح. وعلى بعد كام كيلومتر هـ تلاقي «الأزهر ﭘـارك»، وده منتزه ضخم
في موقع ستراتيجي بـ يمتع زواره بمنظر للقاهرة من إرتفاع بـ يطل على المدينة صاحبة
الألف مئذنة وكمان كاشف أسطح عشوائية وعتيقة كتيرة٬ ده غير المساحات الخضرا
الواسعة المتزينة بالنوافير والأزهار.

5.       ومش بعيد عن
هناك ممكن تزور كورنيش المقطم٬ وده ما بـ يطلش لا على نهر ولا بحر٬ بس بـ
يطل على القاهرة نفسها. هو عبارة عن هضبة عملاقة بـ تشوف وانت عليها بحر من
الأنوار في الأفق في منظر إستثنائي٬ وعشان كده المصريين بـ يتعاملوا معاه على انه
كورنيش للفسحة والتمشية٬ لكن ده الحركة مابـ تبتديش فيه قبل الساعة 11 بالليل٬
والهضبة الساحرة دي أقباط مصر بـ يؤمنوا انها إتنقلت من مكان قرب البحر لمكانها
الحالي بمعجزة.

6.       ومن الأماكن
اللي ما ينفعش إنك تفوتها هو مجمع الأديان. مصر بلد موقعها محوري ومثال حي
لتقابل الحضارات والأديان. المجمع ده فيه دور عبادة قديمة للثلاث أديان السماوية:
اليهودية٬ الإسلام والمسيحية. وفيه هـ تلاقي مسجد «عمرو بن العاص»٬ أول مسجد يتبنى
في مصر وأفريقيا. وهـ تلاقي كمان كنائس مر عليها سيدنا عيسى وأمه مريم٬ والمعبد
اليهودي اللي تعبد فيه سيدنا موسى على أرض مصر.

7.       ولنظرة عميقة
ومشروحة عن مصر الفرعونية ممكن تزور المتحف المصري العظيم، والمتحف ده
أهميته بالغة لسببين: الأول إنه بـ ينافس المتحف البريطاني والـ «لوفر» بالـ136
ألف أثر فرعوني اللي معروضين فيه٬ وده غير الآلاف اللي في المخازن. السبب التاني
إنه بقى له في ميدان التحرير العظيم اللي شهد الثورة المصرية الأخيرة فوق الـ 100 سنة٬
وده ميدان زيارته واجبة.

8.       أما النهارده٬
فمصر الحديثة لا تقل غنى وعراقة عن أيام ما الفراعنة كانوا رواد في العلوم
والفنون٬ فالشعب المصري صاحب الثورة الشعبية التاريخية اللي مافتش عليها شهور عنده
كتير يقدمه للسياح. فيه مراكزثقافية حديثة كتيرة جداً٬ منها ساقية الصاوي٬
وهناك ممكن تحضر حفلات لفرق ومغنيين جداد من اللي بـ يقدموا إبداع جديد ومتميز٬ ده
غير العروض اللي بـ تقدمها الأوبرا النشطة جداً٬ وتقدر دايماً تعرف اللي بـ يتعرض
في الإتنين من خلال أجندة الموقع بتاعنا.

9.       الفسح والخروجات
هما والضحك والفرفشة من تخصصات الشعب المصري الصميمة! وبجنيه ولَّا ألف هـ تعرف
تنبسط في القاهرة٬ ومن الفسح القاهرية الأصيلة: التمشية على كوبري قصر النيل
اللي بـ يوصِل حي الزمالك الراقي بالميدان الحيوي، ميدان التحرير.

10.   ومن الفسح برضه
إنك تاخد فلوكة (مركب شراعي) في النيل من كورنيش جاردن سيتي أو من كورنيش
المعادي. وديه بـ تبقى رحلة نهرية في نهر عتيق وسط واحدة من أكتر عواصم العالم
حيوية وتأثير.

مقترح