The Definitive Guide to Living in the Capital , Cairo , Egypt

قهوة «الشادر» موجودة في منطقة دجلة
المعادي وفيها شوية حاجات كده هـ تَعَلِّم معاك من أول مرة تروحها. أولاً، القعدة مناسبة
جداً لو واحد عايز يسترخي ويريح شوية، لكن الترابيزات ملزوقة في الكنب والكراسي
صغيرة جداً لدرجة تخلّيك تحس إنك قاعد في بيت عرايس لعبة. المساحة الصغيرة
ماتتنسيش أبداً، وعلى فكرة بالرغم منها القهوة دي تُعتبر من الأماكن المُفَضَلة لسكان
المنطقة.

منيو الشيشة فيه الحاجات الأساسية بس،
لكن في نفس الوقت كافي جداً. فيه إختيارات النكهات التقليدية زي النعناع، التفاح،
الكنتالوپ، العنب والليمون. أغلب الناس اللي بـ تروح «الشادر» بـ يبقوا زباين
دائمين، والويترز هـ يفتكروك وهـ يفتكروا طلباتك المُفَضَلة لو إنت متعود تروح
هناك. وهـ تاخد بالك من الزباين الدائمين اللي ماليين المكان وهما بـ ينادوا للويتر بإسمه، بـ
يهزروا معاه، وبـ ياخدوا أحسن خدمة لدرجة إن تقريباً عمرهم ما يستنوا عشان يتغير لهم
الحجر بتاع الشيشة.

وبما إن الوقت بـ يعدي من غير ما تحس
بيه في «الشادر»، يبقى أكيد هـ تجوع ولازم تطلب أكل. بـ يعملوا هناك فطير حلو
وحادق وبـ يبقى طعمه جميل ولذيذ جداً، ده غير الپيتزا. «الشادر» كان بـ يقدم كمان
برجر معمول مخصوص عندهم، بس مؤخراً بقى يقدم البرجر العادي التقليدي بس بـ ييجي في
عيش ملفوف بدل العيش الكيزر ومعاه بطاطس محمرة.

أغلب زباين «الشادر» بـ يبقوا شباب
جامعي لغاية فوق الـ20 سنة بشوية. وهو عامةً مكان مناسب لو عايز تضيع شوية وقت أو
حتى تلعب لك دورين كوتشينة. وبما إن «الشادر» مكان معروف جداً في الحي، ففيه فرصة
كبيرة جداً إنك تشوف ناس تعرفها بالصدفة طول ما إنت هناك.

أيام الويك إند بـ يبقى فيه حد أدنى
للطلبات 25 جنيه للفرد «Minimum Charge» ، بس غير كده الأسعار معقولة وغالباً الحساب مش
هـ يعدّي الحد الأدنى.