The Definitive Guide to Living in the Capital , Cairo , Egypt

القاهرة
فقط فيها ملايين القطط والكلاب الضالة اللي مالهمش صاحب وماشيين طول الوقت –يا
حرام– بـ يدوروا على حاجة يأكلوها وحالتهم تصعب على أي حد مهتم بحقوق الحيوان!
وعلى النقيض فيه مجموعة مرفهة من الحيوانات بـ تعيش في أشيك بيوت وبـ تأكل أحسن من
البشر أحيانًا. «إيـﭼـي ﭘاﭘـي – Egy Puppy» بـ يلبي احتياجات القطاع الأخير من الحيوانات الأليفة ويعتبر
الأفضل في تخصصه.

الفرع
الموجود في منطقة دجلة في المعادي في شارع 233 ممكن تشوفه من بعيد بسبب أضواءه
الساطعة أو لأنه المحل الوحيد في الشارع في الواقع. لوجو لامع باللون الأزرق هـ
يلفت انتباهك للمحل. وأحبطنا جدًا لما لاقينا المحل مش بـ يبيع كلاب صغيرة فعلًا (Puppies) لكن ممكن تسأل هناك لأنهم هـ
يدلوك على ناس معرفة بـ يقوموا بتربية الكلاب الصغيرة وبـ يبيعوها.

المحل
مُقسم لـ 4 أقسام: أول قسم مخصص لألعاب الحيوانات المنزلية والأدوية وحفاضات الكلاب
البيبيهات! وفرش أسنان (20 جنيه) والألعاب البسيطة أسعارها من 35 لـ 50 جنيه، وفيه
ألعاب غالية زي شخصية “بومبا” الخنزير من فيلم «الأسد الملك» اللي بـ
يعمل أصوات حقيقية مضحكة (110 جنيه) وممكن من هنا تجيب غطاء ضد الأمطار لحيوانك
الأليف بـ 150 جنيه وممكن تجيب سويتر بـ يتلبس بـ 200 جنيه.

في
«إيـﭼـي ﭘاﭘـي» هـ تلاقي تشكيلة فريدة من سلاسل الرقبة
للكلاب، موديلات وألوان مختلفة، معظمهم بأسعار قريبة من 120 جنيه. وفيه أطواق
للرقبة من الجلد أغلى شوية بـ 170 جنيه، وفيه زي سرج أو
لجام بـ 330 جنيه وكمامات بـ 160 جنيه. في وسط المحل ترابيزة عالية عليها مخدة ممكن
تقعد عليها الكلب بتاعك وتجرب أي إكسسوارات عليه.

بعد
قسم الإكسسوارات والألعاب دخلنا قسم التغذية والمأكولات. وفيه خبراء تغذية في
المحل هـ يقدموا لك النصيحة بخصوص الأكل اللي المفروض تقدمه لكلبك أو قطتك. ولو
عند الحيوان بدانة أو فقدان شهية هـ يعمل له برنامج غذائي سليم وتدريبات بدنية!

قسم المأكولات غني جدًا وتقريبًا فيه أكل لكل أنواع
الكلاب والقطط، وفيه أكل يناسب كل طريقة تربية. 3 كيلو من الطعام للكلاب البالغين
بـ 190 جنيه، وفيه أكل مخصوص للكلاب الصغيرة والأمهات! وفيه أكثر من كده، لو عندك
كلب صيد من نوع تيرر يوركشاير وشعره بـ يتساقط ممكن تجيب له أكل من هنا بـ يمنع
تساقط الشعر!

معظم المأكولات من نوع (رويال كانين Royal Canine) والأسعار بـ تختلف باختلاف
الأنواع.

أكل
القطط موجود، فيه معلبات (Meow) العادية وفيه طعام
مخصوص للقطط اللي بـ تدخل مسابقات جمال! 1.5 كيلو بـ يبقى بـ 50 جنيه وده يعتبر
رخيص بالنسبة لأنواع ثانية من الأطعمة. وممكن تشتري حلويات زي المضاغات اللي على
شكل قلب (40 جنيه) وأنواع ثانية من الحلويات اللي من غير سعرات علشان وزنهم ما
يزيدش!

وبالنسبة للناس اللي بـ تكره الحيوانات أوبـ تخاف منهم
وبـ تحاول تكون بعيد عنهم قدر الإمكان هـ تلاقوا هنا برضه حاجة لكم وهي عبوة “توقيف
الحيوانات” بـ 18 جنيه. وده عبارة عن سبراي ترشه على المناطق اللي مش عاوز
الحيوانات تلوثها أو تيجي عندها، وممكن ترشه على نفسك (أكيد إحنا مش بـ ننصح بحاجة
زي كده) لكن لأصحاب الحيوانات الأليفة في مصر نقدر نقول أن «إيـﭼـي ﭘاﭘـي» هو جنة مستلزمات كلبك أو قطتك.