The Definitive Guide to Living in the Capital , Cairo , Egypt

تليفزيون
قلة مندسة

قلة مندسة: يا عيني ع القلة.. يا روحي ع المندسة

  • محمود عزب
  • كوميدي
  • من الآن
تم التقييم بواسطة
Samah Nageh
قيم
قيم الآن
قلة مندسة: يا عيني ع القلة.. يا روحي ع المندسة
برنامج “قلة مندسة” على قناة دريم 2 بـ يقدم الواقع السياسى بشكل ساخر، بـ يقدمه محمود عزب من السبت إلى الأربعاء الساعة 8 مساءً، وطبعًا زى ما إحنا عارفين أن البرامج اللى بـ تتناول الفكرة دى بقت كثير جدًا دلوقت، لكن” قلة مندسة” اختلف شوية عن البرامج الساخرة اللى بـ تُقدم فى الوقت ده وأول اختلاف أن الحلقة قصيرة “20 دقيقة” وفى كل حلقة بـ يقدم شخصية من شخصيات المجتمع وهو اللى بـ يمثل الشخصية بنفسه.

بـ يبدأ البرنامج ووزير المالية الهارب يوسف بطرس غالى قاعد بـ يتفرج على الثورة فى التليفزيون وهو خارج مصر وبـ يشوف مبارك و هو بـ يتنحى وبـ يدخل القفص وبـ يتحاكم وبـ يتفرج على طوابير انتخابات مجلس الشعب وبـ يشوف غزوة الصناديق وهولز الكتاتنى وغيرها من الحاجات اللى حصلت بعد الثورة، وكل المشاهد دى حقيقية ومافيهاش أى مغالاة كل اللى بـ يحصل أن إحنا بـ نشوفها من وجهة نظر بطرس غالى اللى بـ يقوم ببطولته الفنان محمود عزب وبـ يقوم كمان بأداء كل شخصيات البرنامج حتى الشخصيات النسائية، ومن أشهرهم: سوزان مبارك زوجة الرئيس المخلوع والمذيعة ريم ماجد، والإعلامى يسرى فودة ووائل غنيم وتوفيق عكاشة ومجدى الجلاد وحازم صلاح أبو إسماعيل وغيرهم. والمكياج فى الحقيقة بـ يساعده جدًا فى أداء الشخصيات وإقناع المشاهد بها.
من أكثر الحلقات المميزة جدًا حلقة الإعلامى توفيق عكاشة اللى قدم فيها محمود عزب أدق تفاصيل مثل حركة اليد وحركة العين ولازمة توفيق عكاشة فى الكلام حتى اللكنة والصوت ومحمود عزب ما أضافش أى شيء فى الكلام هو بس اختار بعض الجمل من حلقات متفرقة لتوفيق عكاشة وأداها بنفس أداؤه وكأنه بـ يقول للمشاهد أنا مش محتاج أضيف حاجة فى الكلام علشان أنتقده. ومن الحلقات المميزة كمان حلقة رئيس الوزراء الأسبق عصام شرف وفى الحلقة دى قدم محمود عزب ثلاث شخصيات وهم منى الشاذلى وعصام شرف وطبعًا يوسف بطرس غالى الثابت فى كل الحلقات.

و زى ما محمود عزب بـ يقدم كل حلقة شخصية جديدة، بـ يقدم لنا كمان ديكور جديد يناسب كل شخصية، يعنى مثلاً شخصية يسرى فودة الديكور فيها بـ يكون الستوديو اللى بـ يذيع منه برنامجه، حتى شكل البدلة بـ يتم اختيارها بدقة وكرافتة يسرى السوداء اللى بـ يلبسها كل ما تحصل مصيبة فى البلد. وفى حلقة توفيق عكاشة بـ يكون الديكور هو نفس ديكور ستوديو الفراعين وده طبعًا كله علشان يقنع المشاهد بأداء الشخصية.
أما المشاهد اللى بـ يظهر فيها بطرس غالى بـ يكون فيها الديكور تقريبًا ثابت وهو عبارة عن سفرة بـ يأكل عليها هو فقط وأمامه تليفزيون بـ يشاهد من خلاله كل اللى بـ يحصل بعد الثورة وبـ يعلق عليه.
وبالرغم أن الحلقة 20 دقيقة فقط لكن المخرج سامى أبو الخير بـ يعمل مجهود كبير لأنه بـ يقدم كل حلقة ديكور مختلف ومؤثرات مختلفة. وأجمل حاجة أن موعد عرض البرنامج مناسب لأغلب الناس لأنه بعد الشغل وبعد المدرسة أو الجامعة.

عجبك ؟ جرب

"زلطة شو" على قناة الحياة.

نصيحة 360

"قلة مندسة" بـ يعرض على قناة دريم 2 من السبت إلى الأربعاء الساعة 8 مساءً ومدته 20 دقيقة، لو فاتك جزء من الحلقة مش هـ تستمتع بالباقى، من إخراج: سامي أبو الخير.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح