The Definitive Guide to Living in the Capital , Cairo , Egypt

قبل الكتابة:

لازم نقول قبل البداية كده أن الاسم مختلف وجديد وحلو وبسيط جدًا.. الاسم هو عنوان المكان.. تخيلوا الفكرة يعنى، اربط الاسم بالعنوان ما حدش هـ يتوه وهـ يفضلوا فاكرين المكان كويس طوال الوقت “فكرة برضه”.

الفكرة:

هو مكان بـ يتم فيه مختلف أنواع الرياضات الروحية ورياضات التركيز واليوجا واللى نقدر نسميها بالعربى “قيادة الحياة الصحية”، إزاى تعيش سعيد بشكل صحى وتمارس رياضة وكل ده فى حالة روحية عالية… فاكرين “امرأة تبحث عن كل شيء”.

طعام.. صلاة.. حب

ده اسم الكتاب المشهور للكاتبة الأمريكية إليزابيث جيلبرت.. واللى لعبت دورها جوليا روبرتس فى فيلم من نفس الاسم.. الحالة الروحية اللى هـ تقرأها فى الكتاب واللى هـ تشوفها فى الفيلم وفكرة التأمل والبحث عن الذات فى معتزل بالهند.. تقريبًا كده هى دى فكرة المكان اللى بـ نتكلم عنه.

المكان:

المكان موجود فى منطقة الزمالك حيث الهدوء.. وفى شارع كله سفارات حيث الهدوء أكثر.. فى 35 ب شارع محمد مظهر.. الدور الثالث شقة 9.. مبدئيًا قبل ما تروح لازم تبقى عارف المواعيد علشان ما تروحش فى وقت “درس خاص” ومش هـ تعرف تدخل المكان.

الدروس:

المكان بـ يوفر دروس خاصة للنساء عن اليوجا والتأمل.. وبـ يوفر دروس عامة برضه للناس.. لأ وكمان بـ يوفروا أمسيات يوجا لكل الناس فى أماكن مفتوحة زى ما عملت “هنا كمال” مؤسسة ب 35 وعملت درس يوجا مفتوح لشباب كثير فى أماكن مفتوحة.. واللى عاوزة من خلاله تنشر ثقافة اليوجا ولأنها معالجة نفسية وخبيرة يوجا.. فبـ تقول أن اليوجا علاج للاكتئاب وهى الطريق للسعادة.

السعادة:

عاوز تبقى سعيد؟ تأمل فى نفسك واعرفها.. عاوز تتخلص من الهموم اللى حولك؟ لازم تلاقى وقت لنفسك ولروحك.. عاوز تلعب رياضة مفيدة؟ العب يوجا.. لكن لازم تلعبها على يد متخصصين.. لأن اليوجا مش مجرد جلسة وتغميض عينين.. اليوجا فلسفة وأسس وقواعد وطريقة تنفس وبحث عن الروح ومراحل وإدراك للعالم من منظور مختلف.

المنظور:

وعلشان منظور الحياة مختلف فى 35 ب.. دائمًا بـ يطوروا نفسهم وبـ يعملوا دروس مختلفة عن كل الحياة الصحية وعن التأمل الصوفى.. وصراحة أول مركز نشوفه بـ يعمل تأمل صوفى.. مع أن الموضوع قديم جدًا والتأمل الصوفى واحد من أهم طرق التأمل وبـ يربط بين الروح والجسد والكون بشكل عبقرى.. لكن كمان لازم تنقى روحك قوى وبعدين تمارس التأمل الصوفى يمكن تشوف اللى غيرك مش قادر يشوفه.

علشان تشوف:

علشان تشوف اللى غيرك مش قادر يشوفه يبقى لازم تعالج نفسك وتطلع اللى جواها من خلال لعبة الرسم والألوان اللى بـ تتعمل فى المركز واسمها “ورشة العلاج بالفن” كل واحد يقدر يرسم لأن الرسم فطرة فى المقام الأول مش موهبة بس، ومن خلال الرسم والشخبطة تتحلل شخصيتك وتعرف كثير عنك.