The Definitive Guide to Living in the Capital , Cairo , Egypt

موجود بعد الناصية المشهورة في الزمالك اللي فيها «كوفي
بين – Coffee Bean & Tea Leaf »، محل حلويات وألبان ومتخصص في البديل الصحي للآيس كريم وهو
الزبادي المجمد.

المحل مساحته صغيرة بس معمول بمنتهى الشياكة، الجزء
الداخلي للمحل صغير جداً، والمنيو مكتوب بالألوان على الحوائط البيضاء ، كل صنف والسعر قصاده. ورا الكاونتر اللي
عليه علب المذاقات اللي ممكن تتحط فوق الزبادي، فيه ماكينتين للزبادي المجمد، وبرة
المحل وقدام الواجهة الزجاجية بتاعته فيه سماعات كبيرة مشغلة مزيكا خفيفة.

علب معقمات اليد والمطهرات متعلقة على الحيطة برة المحل وده دليل على مدى نضافة
وصحية كل حاجة في المكان. ملصقات كتير في كل حتة بـ تأكد على أن كل حاجة بتـ تقدم
في المحل صحية وخالية من الدهون ومش بـ تأثر على الوزن، عشان كده هـ تلاقي ناس
كتير من هواة الدايت بـ ياكلوا هناك طول الوقت.

فيه 3 مذاقات مختلفة للزبادي، سادة وبالبطيخ و«مايبي تو – Maybe Two » وده عبارة عن خليط من
الفواكه بس اللون اللي ظاهر أزرق ورائع. كل المذاقات في نفس المستوى؛ حلوة وفريش
ومنعشة، بس إحنا كان عندنا شكوك في موضوع أن طعم الفواكه ده خالي من الدهون زي
الزبادي السادة ببساطة لأنه كان حلو ومسكر قوي.

لو مش بـ تحب طعم الزبادي السادة جرب إضافة صوص شيكولاتة أو كراميل أو
فراولة، وفيه إضافات تانية زي قطع فواكه (ساعات مش بـ تكون فريش قوي زي التوت
المجمد والتفاح اللي لونه بقى بني شوية) وحبوب ملونة مسكّرة وأنواع مختلفة من
الشيكولاتة المغلفة.

طبق فيه زبادي سادة وعليه 4 إضافات هـ يكلفك 42 جنيه، ولو كان طعم تاني زي
البطيخ أو «مايبي تو» هـ يبقى بـ 46 جنيه، طبعاً غالي جداً لأنه في الآخر مجرد آيس
كريم.

عشان أصلاً صعب تلاقي في القاهرة محلات بـ تقدم المنتج ده، ماتتعبش نفسك في
التدوير وآدينا قولنالك على محل إختراع الزبادي المجمد الجديد وتقريباً الوحيد،
إحنا بس نفسنا يراجعوا تاني موضوع الأسعار ده عشان في الآخر دي كوباية زبادي مش
كيلو لحمة.