The Definitive Guide to Living in the Capital , Cairo , Egypt

يوجي فروتي – Yoggie Fruttie

يوجي فروتي: زبادى مثلج رائع بأسعار حنينة فى حدائق الأهرام

تم التقييم بواسطة
Angie El Batrawy
قيم
قيم الآن
يوجي فروتي: زبادى مثلج رائع بأسعار حنينة فى حدائق الأهرام

ونكمل لكم رحلتنا ومغامراتنا في منطقة حدائق الأهرام، المنطقة اللي تعتبر جديدة نوعًا ما على ساحة المطاعم والكافيهات، تفاجئنا جدًا لما لقينا مكان جديد اسمه "يوجي فروتي – Yoggie Fruttie" بـ يقدم زبادي مثلج اللي معروف عنه أنه خالي من الدسم ومن الكوليسترول والمواد الحافظة أو الألوان الصناعية، وكمان في مكان مميز جدًا عند أول مدخل البوابة الرابعة "مينا" على اليمين.

لما دخلنا وشوفنا المنيو اكتشفنا أنهم مش بـ يقدموا بس زبادي مثلج بأنواع مختلفة: فانيليا وشوكولاتة وفزدق وفراولة ولأول مرة نلاقي عندهم نوع فاكهة اسمها "تارو"، كمان عندهم براونيز بالآيس كريم (15 جنيه)، ووافل بـ Topping مختلفة (من 17: 25 جنيه)، ومشروبات سخنة: موكا (20 جنيه)، وأسبريسو (8 جنيه) وغيرها كثير بـ يستخدموا فيه بن illy، وعصائر وكوكتيلات، وميلك شيك وسموزي، ده غير أنواع الجاتوه والتارت والكيك، وفيه قسم "شرقيات" قريبًا، كمان ممكن تشتري علبة زبادي عائلية كبيرة (1 كيلو) بـ 160 جنيه، أو (1/2 كيلو) بـ 80 جنيه.

ديكور المكان يجنن، ألوانه مبهجة جدًا زي إحساسك بالبهجة وأنت بـ تأكل الآيس كريم، بـ يمزج بين ألوان الأبيض والبينك والأخضر الفاتح، تحس أنهم ملونين المكان بألوان الـ Frozen  Yoghurt الفراولة والفانيليا والفزدق.. بـ يبدأ المسئول عن المكان يذوقك كل أنواع الزبادي المجمد اللي موجود، خاصة فاكهة "التارو" اللي أثارت فضولنا، لونها زي البلوبيري موف لكن طعمها خطير، فيه حجمين للآيس كريم، الصغير لك إضافة نوعين فاكهة عليه مجانًا، والكبير لك 4 إضافات مجانًا، أخذنا واحدة اللي بالفزدق وعليه جرانولا (20 جنيه) والثانية بالتارو وعليه قطع شوكولاتة مبشورة (20 جنيه)، بجد طعم الآيس كريم أكثر من رائع، غني بالطعم ومثلج وقوامه حلو جدًا، ما كناش عاوزين الكمية اللي معانا تخلص، وسعره الصراحة أفضل من أماكن ثانية غالية وبـ تحاسبك على كل item بـ تحطها على الزبادي فبـ تلاقي في الآخر الفاتورة أكلت ربع مرتبك.

فكرنا نجرب حاجات ثانية من عندهم زي تارت الشوكولاتة (15 جنيه) وده عبارة عن تارت قاعدته كيك متماسكة من الشوكولاتة وعليه شوكولاتة عاملة زي نص كورة ومن جواه برضه شوكولاتة ومرشوش من جوه كريسب، أول ما شوفنا المنظر ده قلنا صباح الدسم، لكن المفاجأة أنها كانت حلوة جدًا ومش ثقيلة والكريسب مع الشوكولاتة الهشة اللي جوه كانوا مزيج حلو أوى، جربنا كمان الترايفل (8 جنيه) ودى عبارة عن قطع فاكهة (مانجو وفراولة) مع كيك أسفنجي وكريمة بيضاء، دي أخف ترايفل نأكلها لحد وقتنا ده، أقل ما توصف أنها رائعة، سعر وخفة وحلاوة.. حد عاوز حاجة ثاني؟

تجربتنا في "يوجي فروتي" كانت بنفس حلاوة منتجاتهم، هما فخورين بشعار "خامات عالمية وأسعار مصرية" ودي المعادلة اللي قدروا يحققوها.. برافو!

نصيحة 360

يوجي فروتي لهم صفحة على الفيسبوك.

أحسن حاجة

التارو ده اكتشاف.

أسوأ حاجة

مش عارفين لسه!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح