The Definitive Guide to Living in the Capital , Cairo , Egypt

المقدمة إسلامية باقتدار.. فيها مش هتلاقي كلام عن الرواية أو إهداء كل اللي هتلاقيه.. بسم الله الرحمن الرحيم، والصلاة والسلام على أشرف المرسلين، ودي بيديك إنطباع إن الكاتبة سامية أحمد عندها خلفية إسلامية، لكن يا ترى ده واضح في الرواية ولا لأ؟

 البطلة هي سارة اللي شغالة على مجموعة أبحاث عن الإرهاب والشخصيات الإرهابية، وإزاي بيتحول الشخص من مواطن عادي إلى قاتل مش فارق معاه بيموت مين، وبتقابل المهندس "علي" مهندس الديكور الملتحي اللي عنده لحية سوداء، وبيدور بينهم مواقف كتير، ومناقشات بتبدأ بالغضب وبتتحول مع الوقت لحاجات تانية.

من الصعب إن سارة تحب علي، سارة أصلًا مش بتحب المتدينين، وشايفة إن أغلبهم إرهابيين، وعصبيين وهمجيين، وهي متعلمة في أمريكا، وعندها قدر كبير من الحرية، وعلي مع إنه مثقف ومهندس، لكنه محافظ على دينه في الخارج والداخل.

الرواية راحت لأكتر من موضوع أهمها النظرة المأخوذه عن أصحاب اللحى وإنهم غير مثقفين أو متعلمين، والغرب اللى بيوصفهم بالإرهابين، والرواية كمان بتشير بهدوء لفكرة المؤامرات الخارجية وعلاقتها بالشباب، وإزاي الأجهزة الخارجية ممكن تأثر عليهم وتخليهم يتحولوا لإرهابيين، باستخدام بعض التفسيرات الغلط للنصوص الدينية.

الرواية كمان بتتكلم عن سماحة الدين الإسلامي، وإن التدين غير الإرهاب، وإزاي نقدر نفرق ما بين الأتنين، وسامية أحمد روائية ليها طريقتها السهلة في الكتابة والسرد، بتهتم أكتر بالحكايات عن الشخصيات أكتر من أي حاجة تانية، ولغتها بسيطة وبتوصل للقارئ بسرعة.

يا ترى هتقدر سارة تسيطر على السيكوباتي صاحب اللحية السوداء، وهل هتقدر تخضعه لأبحاثها، وتخليه فعلًا فأر تجارب، ولا هتقع في حبه، هتكمل أبحاثها اللي بتعملها لصالح مؤسسة الأبحاث الأمريكية، ولحد فين ممكن تضحي علشان المناصب والأبحاث، صراعها مع علي صراع فكر ولا إرادة ولا حب.. كل ده هتعرفوه لما تقروأ الرواية.