The Definitive Guide to Living in the Capital , Cairo , Egypt

آدامز دونر & جريل – Adam’s Doner & Grill

آدامز دونر & جريل: دونر كباب ورابس لسه محتفظة بمستواها فى هليوبوليس

تم التقييم بواسطة
Angie El Batrawy
قيم
قيم الآن
آدامز دونر & جريل: دونر كباب ورابس لسه محتفظة بمستواها فى هليوبوليس

قليل أوى فرصة أننا نلاقى مكان فى القاهرة بـ يعمل دونر تركي ممتاز، كان زمان فيه مكان فى الزمالك اسمه "على بابا دونر كباب" لكن قفل مش عارفين ليه رغم أنه كان ناجح جدًا، أما المكان الثاني اللى شايفين أنه يعتبر الأفضل فى القاهرة هو "آدامز دونر & جريل – Adam’s Doner & Grill"، جربناه مرتين من أول ما فتح، مرة أول ما فتح والمرة الثانية كانت فى شهر رمضان وكتبنا عن تجربتنا مقال نقدي،

قلنا نروح نعيد زيارتنا نعرف الدنيا وصلت لفين، المنيو بسيطة جدًا فيها أقسام: الأرز (ممكن تضيف عليه دونر كباب، أو كفتة مشوية، أو بيف ستربس، أو دجاج تندورى)، السلاطات، الرابس (دونر ولحوم ودجاج)، جزء صيامي وجزء خاص بالأفطار فيه جبنة وأومليت، وأخيرًا الإضافات الجانبية.

طلبنا ساندوتش بيف ستريبس (29 جنيه)، وآدامز دونر كباب (28 جنيه)، وباكيت بطاطس (10 جنيه)، ومشروب سبرايت (6 جنيه)، وسلاطة دجاج تندورى (34 جنيه)، لو عاوزين تعرفوا الأصناف أكثر ممكن تشوفوا صفحة الفيسبوك بتاعتهم، جنب الكاشير فيه مطبخ مفتوح ممكن تشوف فيه أكلك وهو بـ يتعمل.

المكان واخد ناصية ومتميزة، فيه كام ترابيزة بره علشان اللى حابب يأكل فى المكان، فيه كمان حاجة زي مدخل لمكان مقفول جنب مدخل المطعم الأصلى فيه قعدة ترابيزتين أمام بعض، وفيه لوحات فنية على الحوائط علشان تستمتع بها طوال ما أنت قاعد تأكل، الأكل أخذ وقت طويل أوي عقبال ما جاء لنا، لكن شكله يفتح النفس.  

الأكل أقل ما يوصف به أنه رائع، تسوية الفراخ فى سلاطة التندورى اللى كانت مكتسبة لون أحمر لطيف رائعة مع الخس والجرجير والطماطم والخيار والفلف الأخضر والخبز المحمص وصوص التزازيكي، كمان راب البيف ستريبس كان رائع، قطع البيف المقطعة مع الطماطم والفلفل الرومي والبصل والذرة وساور كريم والجبنة الشيدر كان مزيج رائع وطري وغني بالعصارة، بس الأحلى منه كمان راب دونر الكباب اللى كان الحشو فيه غني وممزوج مع البقدونس والخس والطماطم والبصل وصوص طماطم بالليمون وعليها صوص كمان التزازيكي، طعم اللحم نفسه كفيل أنك ممكن تأكله لوحده من غير مكونات، كمان البطاطس المحمرة كان مقرمشة من بره وطرية من جوه وعليها نكهة من بره فشلنا نعرف هى إيه بس كانت وهمية.

"آدامز دونر & جريل" مازال فى الصدارة ومحتفظ بجودته، الخدمة بس محتاجة تكون أسرع خاصة أننا كنا الوحيدين فى المكان وقت زيارتنا، نتمنى أنه يفضل على نفس المستوى وأحسن حتى لو ظهر منافسين على الساحة.

نصيحة 360

الشارع اللى فيه آدامز "استحالة" الركنة فيه.. حظ سعيد!

أحسن حاجة

طعم اللحم بتاع الدونر، والدجاج التندورى.. رائعة.

أسوأ حاجة

التأخير فى طلبنا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح