The Definitive Guide to Living in the Capital , Cairo , Egypt

من وجهة نظرنا أصغر فوود كورت وأقلهم ازدحامًا في القاهرة هو اللى موجود فى داندي مول على طريق مصر إسكندرية الصحراوي فى الدور الثاني، دائمًا هادئ ومافيهوش مطاعم كثيرة حاليًا، والأسماء اللى موجودة رنانة ومعروفة إلا المطعم اللى اسمه وشكله يشدك ويخلى عندك فضول تجربه.. “أكلة كباب”.

موجود على أقصى أيدك الشمال أول ما تدخل، صغير ومافيهوش غير كاشير والفرن الكبير بتاع شوي الكفتة والكباب المشهور، وعلى عكس المطاعم المنيو مش معلقة على الحائط لكن موجودة مطبوعة جنب الكاشير، المنيو مش كبيرة أوى والاختيارات مش هـ تتوه فيها، إما وجبات أو نوعين ساندويتش: شيش ملفوف أو كفتة ملفوف (14 جنيه للواحد) أو رغيف حواوشي (19.50 جنيه) وبطاطس (4.50 جنيه) وأرز بالخلطة (5 جنيه)، والمشروبات الوحيدة اللى موجودة غازية (5 جنيه)، ومياه معدنية صغيرة (4 جنيه).

بالنسبة للوجبات بـ ينزل معاها 3 سلاطات بس (طماطم بالثوم، ومخلل خيار، وطحينة) وعيش أبيض، أما الأرز والبطاطس بـ تطلبهم لوحدهم لو عاوز، الطلبات إما: شيش، أو كباب وكفتة وريش، أو كفتة، أو كباب وكفتة وشيش طاووق، أو نصف دجاجة مشوية، والأحجام بـ تختار بين 300 جرام أو ½ كيلو أو 1 كيلو.

طلبنا 300 جرام كباب وكفتة وريش (60 جنيه)، ورغيف حواوشي (19.50 جنيه)، وعلبة بطاطس (4.50 جنيه)، وكانز بيبسي (5 جنيه)، الراجل على الكاشير قال لنا الأكل هـ يخلص فى 10 دقائق، وبالفعل ما أخذش وقت كثير أوى على الرغم أن الطباخ بدأ شغل فيهم فريش أمامنا بعد ما طلبنا.

أول حاجة لاحظناها أن الكميات قليلة، ومافيش تزيين أو أى حاجة تجمل الطبق اللى فيه المشويات، بس الطعم كان حلو أوى، لو واحد أكيل الـ 300 جرام مش هـ تنفع معاه، يأخذ النص كيلو أحسن، الكفتة والكباب كانوا متسويين كويس أوى وطعمهم جميل وطري، عجبنا جدًا، ما جربناش الريش الصراحة لأننا بدلناها بكمية أكبر من الكباب، البطاطس كانت مقرمشة من بره وطرية من جوه بس مش هما اللى عاملينها لأنها كانت فارم فريتس، والسلاطات كانت لطيفة بس ذقنا أفضل منها فى أماكن ثانية، والطحينة كانت خفيفة.

أما الحواوشي كان طعمه حلو أوى بس برضه حجمه صغير واللحم المفروم داخله مش متوزع بشكل كويس، فيه أطراف هـ تلاقيها فاضية ومقرمشة وأجزاء ثانية فيها لحم مفروم وبرضه كميته مش كبيرة.

المكان لطيف وأكله حلو بس مافيهوش خلطة أو طعم مختلف يخليه يعلق فى ذهنك، لكن الخدمة سريعة والأكل حلو والمكان اللى فيه هادئ.. لو حابب تأكل مشويات وأنت فى داندي مول وتبعد عن الأكلات السريعة اللى مليانة دسم وسعرات حرارية على الفاضي “أكلة كباب” هـ يكون Option لطيف لك.