The Definitive Guide to Living in the Capital , Cairo , Egypt

فاكر آخر مرة كنت بـ 50 جنيه تقدر تروح السينما وتتعشى بعدها؟.. لأ، ولا إحنا كمان، بس أهلنا دائمًا بـ يحكوا لنا على زمن التحويش الجميل.

مافيش شك أن الثورة اللي شوفناها على ساحة مطاعم القاهرة خلال السنين الأخيرة كانت رائعة، وشوفنا ظهور لمطابخ جديدة وأفكار متنوعة، بس طبعًا كل حاجة ولها ثمنها، وثمن الدلع غالي يا عزيزي! بس إحنا هنا بـ نقول لك أن مش شرط تدفع كثير مقابل أكلة لذيذة، إحنا جمعنا لكم قائمة فيها 10 أماكن بـ تقدم أكلات لذيذة بأقل من 50 جنيه.

 

طازة – Taza

لو عاوز تعرف ليه شارع التحرير في الدقي دائمًا زحمة جدًا في نصف الليل، السبب هو "طازة"، طازة بـ يقدم تشكيلة كبيرة من الوجبات والساندويتشات، ويعتبر اختيار ممتاز لو عاوز تجيب أكلة بسعر معقول، عندك مثلاً نصف فرخة مخلية ومعاها عيش وبطاطس وصوص ثومية وكل ده بـ 21 جنيه، أو ساندويتش تشيكن رول لارج سعره 16.50 جنيه أو ممكن حواوشي بـ 8.50 جنيه، كده يفضل معاك فلوس تشرب بهم حاجة من سيتي درينك وهو برضه من الأماكن التى بـ تسبب زحمة في الشارع.

 

باستاويسي – Pastaweesy

لو نفسك في مكرونة وعاوز مكان أسعاره في المعقول، متخصص المكرونة باستاويسي في الخدمة يا فندم، باستاويسي بـ يقدم تشكيلة من المكرونة الفرن بالصوص الأحمر أو الأبيض أو الأخضر، ده غير أنك ممكن تختار بين السوسيس أو الفراخ أو المشروم أو البسطرمة، والأسعار تبدأ من 14.50 جنيه لغاية 40 جنيه، ممكن بعدها تحلّي بواحدة ديب فرايد بوريو أو "لقمة البوريو" (13.50 جنيه) أو سنيكرز (15 جنيه).

 

الدوّار – El Dawar

معظم الآراء اتفقت أن الدوار من أحلى الأماكن اللي بـ تعمل فطير في القاهرة، تقدر تختار فطيرتك الحادقة من بين الجبنة والسوسيس والخضروات بأسعار تتراوح بين 24 جنيه و40 جنيه، مع عدد محدود من أطباق الحلو أسعارهم تبدأ من 6 جنيه، مافيش أسهل من كده.

 

سيتي كريب – City Crepe

سيتي كريب واحد من أشهر محلات الكريب اللي عندها جمهور عريض في هليوبوليس ومدينة نصر، وعندهم كمان عدد كبير من اختيارات الكريب الحادقة وبأسعار معقولة جدًا، على سبيل المثال لا الحصر ممكن تجرب تشيكن كريسبي كريب (13 جنيه – 16 جنيه) وبيف كريب (14 جنيه – 18 جنيه) وسي فوود كريب (21 جنيه – 25 جنيه)، وطبعًا مش هـ ننسى كريب النوتيلا أو الحلاوة (10 جنيه)، والأكيد أن سيتي كريب اختيار هايل.

 

ذا ستريت – The Streat

شوفنا اليومين دول أشكال وألوان من مطاعم البرجر في القاهرة، وصحيح البرجر اللي بجد هـ يكلفك شوية فلوس حلوين، ذا ستريت يعتبر من الأماكن اللي بـ تثبت أن كل قاعدة ولها شواذ، الجميل في ذا ستريت أن مافيش أي إدعاء أو مبالغة؛ مافيش إضافات مالهاش لازمة، اوعى تقلق من أن البرجر هناك بـ 10 جنيه، هو فعلاً طازة وطعمه لذيذ وجودته كويسة.

 

الركن الآسيوي (أشيان كورنر) – Asian Corner

لو عاوز أكلة تشبعك وفي نفس الوقت سعرها في حدود الميزانية علشان تكمل رحلة تسوقك، يبقى أكيد الركن الآسيوي اختيار مناسب بـ يقدم لك مجموعة من الأكلات الآسيوية منها فراخ ماسالا الهندي أو فراخ ترياكي الياباني، تقدر مثلًا بـ 30 جنيه تشتري وجبة مهراجا اللي بـ تتكون من اختيارك من اللحم أو الفراخ مع أرز أو نودلز وقطعة سبرينج رول.

 

عنتر الكبابجي – Antar El Kababgy

مين قال أن المشاوي لازم تكون غالية؟ عنتر الكبابجي بـ يقدم مشويات بأسعار مناسبة جدًا، يعني ممكن بـ 45 جنيه بس تستمتع بطبق ميكس جريل يتكون من 3 قطع كفتة، 3 قطع كباب و3 قطع شيش طاووق، ومعاهم خضروات وأرز أبيض وسلاطة وعيش، أو ممكن بـ 38 جنيه تطلب كوارع بهاريز لو لك في الفتة.

 

سمسمة – Semsema

سمسمة الموجود في الدقي –وفتحوا كمان فرعهم الجديد في داون تاون مول الشيخ زايد– يعتبر من أوائل مطاعم الفاست فوود في القاهرة، لو نفسك في شاورما كيزر (6 جنيه) أو فاهيتا لحم (17 جنيه) أو ساندويتش كبدة (13 جنيه)، أكيد سمسمة من أهم أماكن الأكل بأسعارهم المناسبة جدًا، ممكن تطلب الأكل من عربيتك الواقفة أمام سمسمة أو يوصل لك لباب بيتك.

 

بطاطس أند زلابيا – Batates & Zalabya

صحيح بطاطس أند زلابيا مش الشكل التقليدي للمطعم، لكن أكيد يعتبر اختيار ممتاز لو نفسك في شوية بطاطس وزلابيا بسعر معقول، ممكن بـ 12 جنيه تجرّب الكورن دوج أو باكيت بطاطس (7: 10 جنيه) أو ممكن تطلب علبة زلابيا كبيرة سعرها 13 جنيه وتدلعها بالكراميل أو القرفة أو صوص شوكولاتة.

 

أي محل شاورما سوري..

كثير من المصريين بـ يشوفوا أننا بـ نعمل أحلى شاورما في الشرق الأوسط، لكن أصدقائنا في سوريا هـ يعترضوا ويدللوا على كلامهم بانتشار مطاعم زي أبو يوسف السوري وأبو عمار السورى وأبو رامز السورى اللي بـ يمثلوا المطعم السوري في القاهرة، ممكن تشتري ساندويتشين شاورما بـ 34 جنيه وتضيف 3 جنيه ثمن قطعة سمبوسك مقلية أو تغيّر رأيك وتطلب فتة شاورما بأسعار تبدأ من 25 جنيه.

 

كل أكلة وأنتم طيبين، تابعوا قسم المطاعم على كايرو 360 وشوفوا أجدد المقالات والأخبار عن عالم الأكل والأكيلة في قاهرة المعز!