The Definitive Guide to Living in the Capital , Cairo , Egypt

مافيش فى القاهرة أكثر من مطاعم الوجبات السريعة وخاصة اللى بـ تتخصص فى البرجر، من ساعة زيارتنا من سنتين لفرع الزمالك، أول ما سمعنا أن “برجر فاكتوري – Burger Factory” فتح فرع فى أمريكانا بلازا فى الشيخ زايد رحنا ناطين على هناك على طول خاصة أن القعدة اللى فى الهواء الطلق فى مساحة أكبر من فرع الزمالك أغرتنا أكثر أننا نعيش التجربة هناك.

مكان الترابيزات المفتوح على شكل مستطيل أمام المحل واسع ومش هـ تتضايق قوي من قرب الترابيزات –اللى عددها حوالى 10- من بعض، بـ تتنوع بين ترابيزات وكراسي عالية ومنخفضة شوية، لكراسي على شكل بوكس لها أيد من الحبال البيضاء عجبتنا أوى، فى الواجهة الكاشير والجرسونات كلها منتظرة تخدمك وعلى الجنب الشمال جنب الكاشير حوض عميق فضي وواسع علشان تغسل أيدك بعد ما تخلص، والمطبخ على الجنب اليمين للداخل مستخبي.

زي فرع الزمالك عندهم خدمة توصيل، اتصل بهم لو أنت من سكان أكتوبر أو الشيخ زايد (0102881313)، المنيو البيضاء اللى عبارة عن ورقة بيضاء من صفحتين ممكن تأخذها معاك لو عاوز تطلب دليفري، برجر فاكتوري بـ يستخدموا 100% بيف Angus ولو عاوز تعرف معلومات أكثر زور موقعهم على الإنترنت.

قررنا نجرب برجر بمكونات جديدة، طلبنا برجر اسمه فرنشمان Frenchman سعره 39.9 جنيه وهو عبارة عن بيف، وجبنة بلو تشيز، وبيف بيكون، ومربى البصل، والطماطم، والخس وثوم المايو، كمان اختارنا البرجر اللى باسم المكان برجر فاكتوري (37.95 جنيه) مكون من بيف، وجبنة، وطماطم، وخس، وحلقات بصل فريش، والصوص الخاص بتاعهم، والعادى أن بـ ينزل مع الطلب بطاطس محمرة بس ممكن تختار من الـ Sides حاجات ثانية زي حلقات البصل (14.95 جنيه)، وأصابع الدجاج (17.95 جنيه)، أو تختار الطبق الكبير اللى فيه كل أنواع المقبلات (37.95 جنيه) فيه حلقات بصل، مشروم مقلية، أصابع دجاج، وستيكس موتزاريلا وبـ ينزل معاها صوصات باربكيو وثوم المايو وهانى ماسترد.

الأكل ما أخذش وقت كثير عقبال ما جاء لنا، منظر البطاطس الكثيرة مع الساندويتشين خلى قلبنا ينشرح، البطاطس مقرمشة ووهمية والكمية كبيرة، الفرنشمان وهمي لأكبر درجة، اللذاعة بتاعة البلو تشيز أضافت طعم مختلف ويجنن للبرجر مع الصوص اللى كان محطوط، مربى البصل كانت كثيرة شوية وقعدنا نمسك الساندويتش من كل حتة علشان المكونات ما تخرجش من العيش بس الطعم كان وهمي، البرجر التانى اللى باسم المكان كان حلو جدًا برضه وكان طعم اللحم واضح فيه أكثر من الأول.

بعد ما خلصنا أكل طلبنا من قسم الحلويات المغري أبل باي اسمهاUpside Down Apple Pie اللي سعره 29.95 جنيه عبارة عن كرست خفيفة عليها قطع تفاح مركملة بالقرفة وعليها بولة آيس كريم فانيليا، ومن المشروبات اللى مقسمة غازية وشيك أخذنا بيبسي (6.95 جنيه) وبـ يسألك عاوزها Can ولا Machine، وباشون فروت شيك (24.95 جنيه)، فى زيارة فرع الزمالك جربنا التشوكليت فوندو (29.95 جنيه) وكانت أكثر من رائعة.

فطيرة التفاح تعتبر من أخف ما ذقنا لحد دلوقت، الكرست رفيعة أوى والتفاح ذايب مع القرفة عاملين مزيج رائع، مع الآيس كريم اكتمل الحلو عندنا، الباشون فروت شيك كان حلو برضه وإضافة آيس كريم عليه خلت السكر اللى فيه يخفف مزازة الباشون فروت فكان الطعم واصل لنا خفيف أوى عجبنا.

زيارتنا ما طولتش كثير فى المكان اللى هـ تستمتع بالهواء النقى والهدوء فيه، مشينا وإحنا مش حاسين بالثقل وده كان أحلى شعور ممكن تحسه بعد أكلة جميلة، طاقم العمل محترف ومهذب جدًا مش بـ يتأخر عليك ثانية لو طلبت حاجة حتى لو مناديل زيادة، أسعار البرجر غالية شوية، بس الغالى ثمنه فيه، هـ تدفع فلوس فى مقابل طعم متميز وغني.