The Definitive Guide to Living in the Capital , Cairo , Egypt

بوا خاو – Bua Khao

بوا خاو: مطعم تايلاندى متذبذب المستوى فى المعادى

  • 9 شارع 151
  • تايلاندي
  • 0223580126,0223783355
  • 12 ظهراً - 10 مساءً
تم التقييم بواسطة
Gaser El Safty
قيم
قيم الآن
بوا خاو: مطعم تايلاندى متذبذب المستوى فى المعادى

بعض المطاعم فى القاهرة بـ تنجح لمجرد تقديمها أكل كويس. انسى المكان بـ يطل على إيه، أو شكل الديكورات عامل إزاى. الموضوع كله عبارة عن أكل بجودة عالية. “بوا خاو -Bua Khao” واحد من المطاعم اللى بـ نتكلم عليها، لكن المطعم التايلاندى المحبوب فى الأيام الأخيرة مستوى أكله بـ يتغير. قررنا نشوف بنفسنا مستوى الأكل وصل فين، ومن هنا بدأت زيارتنا للمطعم الصغير فى شارع 151 المعادى.

الديكورات العتيقة نوعاً ما محافظة على شكلها، ودرجات السلالم البسيطة بـ تنقلك للمطعم البسيط. طبعًا كلنا فاهمين أن باو خاو بـ يركز على الأكل، بعيدًا عن الشكل الجمالى، ومن هنا استقرينا على الترابيزة والجرسون بـ يعرض علينا المنيوهات.

طلبنا شوربة Tom Ka Gaiبـ 32جنيه، وسبرينج رولز خضروات (20جنيه) من بين المقبلات. الشوربة المكونة من فراخ وبنجر وحليب جوز الهند، كانت دافئة وطعمها لذيذ مع طبقة كريمة خفيفة ناتجة من الحليب. السبرينج رولز للأسف مستواها أقل من زمان، بنكهتها العادمة شوية، والصوص المسكر عديم الطعم.

بالنسبة للأطباق الرئيسية، جربنا كريسبى تشيكن بصوص الفلفل والثوم (48جنيه) من قسم فى المنيو اسمه “حاجة جديدة لازم تجربها”. الأطباق الرئيسية على غير العادة بـ تنزل من غير أرز أو شعرية، فـ طلبنا Pad See-Ew Gai بـ 40جنيه، وهو عبارة عن أرز بالشعرية مقلى بالصويا صوص ومعاه فراخ وخضروات. الطبق الثانى كان بط بصوص الأناناس (75جنيه) ومعاه طلب جانبى من أرز بالياسمين (18جنيه).

الكريسبى تشيكن يستحق لقب طبق اليوم. شطشطة معقولة، وقطع الفراخ مقلية وعليها طبقة حراقة مقرمشة قدرت تجمع بين القوام الطرى والقرمشة. الأرز بالرغم من طعمه اللذيذ، كان معجن شوية. الفراخ كانت قليلة جدًا، لكن مافيش مشكلة، مع طبق الكريسبى تشيكن، شبعنا واتبسطنا على الآخر.

البط، وما أدراك ما البط، قصة ثانية خالص. البطة كانت عائمة وسط شوربة حريفة مع خضروات وأناناس، مليانة زيت، رائحتها سيئة وطعمها كأنها مش متنظفة كويس، لدرجة أننا طلبنا منهم يشيلوها من أمامنا. الأرز بالياسمين كان لطيف، لكن صعب أى حاجة تعوض تجربة البطة.

بجد حاجة تزعل؛ بوا خاو له عندنا ذكريات وحنين لكن واضح أن جودة الأكل بـ تنهار يوم عن الثانى.

نصيحة 360

اعرف من الجرسون الأصناف غير الموجودة فى المنيو.

أحسن حاجة

الكريسبى تشيكن بالفلفل والثوم.

أسوأ حاجة

مستوى الأكل المتذبذب.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح