The Definitive Guide to Living in the Capital , Cairo , Egypt

ذا فيجان كيتشن – The Vegan Kitchen

ذا فيجان كيتشن: تجربة أكل مميزة فى المعادي

  • 10 شارع 256
  • نباتي
  • 01155006688
تم التقييم بواسطة
Ahmed El Dahan
قيم
قيم الآن
ذا فيجان كيتشن: تجربة أكل مميزة فى المعادي

لأن مطاعم القاهرة  بـ تقدم كل شوية الجديد وبـ تتخطى حدود أبعد فى مناطق العاصمة، “ذا فيجان كيتشن – The Vegan Kitchen” أول مطعم من نوعه يفتح في القاهرة للأكل العضوي النباتى الخالى من أى بروتين حيوانى.

المكان مريح وصغير فى الحجم بـ يديره بيزنس عائلى (شاب من القاهرة وزوجته) بـ يهدفوا من خلاله مش بس أنهم يدخلوا ثقافة الأكل النباتي فى القاهرة لأ كمان علشان ينشروا فكرة المعيشة في بيئة خضراء صحية.

الديكور الداخلى معمول من الجبس الطبيعي ومزين بقطع من الأثاث المصنوع يدويًا ومعاد تدويره من الخشب، واحد من فريق العمل هناك متخصص فى صناعة المبانى البيئية، الترابيزات والحوائط مزينة بالنباتات علشان تخلق حاجة بـ يسموها “Living Atmosphere” أو “جو صالح للمعيشة” بحيث يكون الجو ملئ بالأكسجين ونظيف، وكل ده خلق جو مريح وهادئ.

منيو “ذا فيجان كيتشن” عامرة بمأكولات نباتية تقليدية إلى جانب ابتكاراتهم الخاصة… من تشكيلة المقبلات بتاعتهم لقينا Guacamole بـ 30 جنيه، مقطع فيها قطع خضار صغيرة لذيذة مع قطع بصل، كان طعمها فيه مزازة بطريقة منعشة، وأكثر لو أكلتها مع رقائق الشوفان اللى عاملينها، وكمان جربنا الأكلة اليابانية الماكي رولز Maki Rolls بسعر 30 جنيه، اللى حطوا لها إضافة نباتية، كانت فريش وطعمها يجنن، معمولة من الأفوكادو والخيار وبدلوا السمك بالجزر.

كل السلاطات فى المطعم بـ تُقدم في حجمين: الصغير (20 جنيه) والكبير (40 جنيه)، ولأننا بـ نحب الجرجير قوى وقعنا فى حب سلاطة المشروم اللى كان فيها إلى جانب المشروم والجرجير فيها بصل وزبيب وعين جمل وعليهم صوص برتقال بالرمان هـ تموت نفسك عليه.

البعض مننا ممكن يعتبر أن الـ Raw Pasta (سعرها 30 جنيه) غير مقبولة، بس الموضوع هنا مختلف، الباستا هنا عبارة عن شرائح كوسة مقطعة شبه الباستا غير مطهية علشان تبقى شبه السباجيتي وكان عليها من فوق طبقة سميكة من البيستو صوص، الطبق مش كان شكله وهمي بس، ده كان طعمه كمان تحفة، صوص البيستو بـ نعتبره من أفضل ما ذقنا فى القاهرة.

على الرغم أن الباذنجان مكون صعب أنك تتعامل معاه لأنه قابل لامتصاص الزيت لما بـ يتقلى، لكن باذنجان ذا فيجان كيتشن رافيولى (35 جنيه) كان رائع، قطع صغيرة من الباذنجان بقشرته وملفوفة حول عين الجمل عاملة قوام متجانس، وكمان محشية طماطم وبصل فيه مزازة لذيذة، ريزوتو المشروم (30 جنيه) دى من الحاجات اللى بـ نرشحها لكم تجربوها برضه، بـ يقدم مع أرز بني وقطع من المشروم الفريش والخضار الطازة.

ما قدرناش ما نجربش البرجر بتاعهم بالعدس والمشروم (40 جنيه) اللى قدم معاه بطاطس ويدجز مخبوزة وكاتشب معمول فى البيت Homemade، البرجر نفسه كان طعمه تحفة ومطبوخ بحرفية، ده أوبشن سهل وسريع هناك.

من تشكيلة الحلويات الصغيرة عندهم، عندهم تيراميسو نباتية (25 جنيه) القاعدة بتاعتها من البلح والمكسرات المقرمشة، الطعم كان مزيج من الحلاوة مع المرارة وكانت خاتمة رائعة لزيارتنا.

حتى لو أنت مش شخص نباتى الأكل هنا هـ يعجبك جدًا، الأكل معمول ومنفذ بطريقة رائعة مافيهاش غلطة.

نصيحة 360

ذا فيجان كيتشن عندهم خدمة توصيل، اتصل بـ 01155006688. 

أحسن حاجة

الأكل هـ يفوق توقعات غير النباتيين.

أسوأ حاجة

فيه احتمالية أنك تفكر تقلب نباتى!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح