The Definitive Guide to Living in the Capital , Cairo , Egypt

كلنا لا نختلف على جودة “ستيك أوت – Steak Out” مهما راح فى أى مكان، لكن المفاجأة أنه تفوق على نفسه وبزيادة بكل ما تعنيه الكلمة في الفرع اللى اكتشفناه فى الشيخ زايد عند حي الندى وقبل ما ينزل إعلانات فى كل مكان كبيرة فى الشيخ زايد.
المكان عامل زي ما يكون فيلا كبيرة وهما قلبوها مطعم ضخم، المنظر من الخارج بالجنينة والإضاءات هـ يشدك تدخل من الباب الشيك علشان يستقبلك جرسون باحترام ويسألك عن عددكم، الحركة الجامدة بقى أن المدخل من تحت فاضي جدًا عبارة عن استقبال فقط، والجرسون قبل ما تطلع السلم الحلزونى بـ يكون مبلغ الطاقم فوق من خلال تليفون داخلى عددكم.. ما شفناش معاملة تحفة كده قبل كده.
أول ما قعدنا في الجو المعتاد لستيك أوت من الإضاءة الخافتة والشمعة البلاستيك اللى كانت عاملة جو شاعري، والزرع والخشب سائدين فى ديكورات المكان عاملة جو رائع، جاء لنا الجرسون لأخذ الطلبات واللى كان متعاون ومهذب جدًا، والتفاصيل التحفة لا تنتهى.
طلبنا شوربة طماطم (7.99 جنيه) ومن الأطباق الرئيسية جريلد فيليه (62.99 جنيه) وفيليه لافر (89.99 جنيه) وكمان جريلد تشيكن ستيك (54.99 جنيه)، وفى المقبلات اختارنا ميني كومبو (22.99 جنيه) اللى بـ يكون فيه تشكيلة مقبلات من سبرنج رولز الخضار والتشيكن ستربس وغيرها معاها صوص هاني ماسترد.
أول ما قعدنا لفت انتباهنا حاجة عمرنا ما شفناها فى مكان برضه، الجرسون جاب لنا فوط مغسولة ومعقمة فى مياه سخنة وحطها على الترابيزة لكل شخص باستخدام كبشة طويلة، حاسينا أننا هـ نبدأ عملية جراحية بس كانت حركة متميزة وجديدة منهم، نظافة 100%، ونزل لنا كمان زجاجة مياه كبيرة (6.99 جنيه) وسبت عيش ومقرمشات معاه زبدة علشان نصبر نفسنا عقبال ما الأكل ييجي.
ما لحقناش نصبر نفسنا، الأكل جاء لنا بسرعة ملحوظة، طريقة التقديم شيك جدًا ومحترفة، بجد طاقم عمل أكثر من رائع، الأكل كله مافيش تعليق سلبي عليه، كله فريش، كله طعمه حلو، القوام رائع والتسوية تحفة، مش لاقيين عيوب، الكميات كبيرة وأكلنا لحد ما قلنا يا بس.
فى الحلويات ما قدرناش نمسك نفسنا من العملاق الأوريو مادنيس (واللى ممكن تطلبها بنصف الكمية أو الكمية كاملة) (كمية كاملة بـ 23.99 جنيه) واللى اقترح الجرسون علينا أنه ممكن يعمل لنا نصفها شوكولاتة والثاني فانيليا ودي فكرة حلوة لإرضاء جميع الأذواق، من المشروبات أخذنا ليمون منت (9.99 جنيه) وكان لطيف.
فى الآخر بـ يضاف على الحساب خدمة وكوفر (2.99 جنيه)، عامة التفاصيل دي ما ركزناش معاها لأن تفاصيل زيارتنا هى اللى كانت واكلة دماغنا وكنا مبسوطين لدرجة مش طبيعية ومش مصدقين جودة الفرع ده، نتمنى أننا ما نحسدهمش ويفضلوا على المستوى ده وأفضل كمان، بجد لو ما زرتش الفرع ده يبقى أنت ما رحتش «ستيك أوت» قبل كده.