The Definitive Guide to Living in the Capital , Cairo , Egypt

معروف عن الفنادق استضافتها لأرقى المطاعم فى القاهرة، وفيرمونت هليوبوليس & تاورز أكيد مش استثناء، بتقديمه لثمانية عشر مطعم، بار وكافيه، بـ يقدموا أشكال مختلفة تناسب جميع الأذواق.

فى مكانه داخل مبنى فيرمونت القديم، ليوناردو يقع فى مساحة صغيرة مفتوحة على الفندق، لكن فى نفس الوقت محاط ببوابة من النباتات وفازات بلاستيكية شفافة مليانة تفاح طازج. كل ترابيزة عليها مجموعة أدوات مائدة زجاجية بألوان الطاووس الأنيقة، واللى رفعوها مع وصولنا للمكان. الجرسون رجع لنا ومعاه المنيوهات، وملأ الأكواب بمياه باردة، وبعدها تركنا نفكر فى اختيارنا من بين منيو الأكلات الإيطالية.

سهل تستكشف المنيو مع قسم خاص للمقبلات والشوربة، البيتزا، مكرونة وأرز ريسوتو، سى فوود، لحوم وطبعًا قسم للحلو. وقت تقديم شرائح الخبز كمجاملة من المطعم مع طبق من المعجنات بالجبنة، الجرسون انتظرنا بكل صبر نطلب، مع معاناتنا فى نطق أسماء الأطباق.

فى البداية، اختارنا بينّا أرابياتا (85 جنيه). مع انتظارنا للمقبلات، حفزنا شهيتنا بالطعم الحادق للسمبوسك بالجبنة وقطع صغيرة من التارت الحادق. بالرغم من أنها مزيتة لحدٍ ما، القوام الغنى مع الحشو المملح قدروا يقاوموا جوعنا الشديد حتى وصول البينّا.

المكرونة فى البينّا أرابياتا كانت مطهية لدرجة قبل الاستواء بشوية، ومخلوط معها صوص طماطم وفلفل خفيف مع رشة من البيستو قدرت تبرز اللون الأحمر الجميل للمكرونة. النكهة كانت مشطشطة لدرجة رهيبة والمميز كان اللذعة الناتجة عن الفلفل. البارميزان المقدمة بجانب الطبق ساعدت على إطفاء نار الصوص المولع، وكمان أضافت طعم حادق يوازن مع الطعم المسكر للطماطم.

بعد إصرار على ترشيحه من الجرسون المتحمس، قررنا نطلب طبق سى فوود ريسوتو (160 جنيه) من قسم الأطباق الرئيسية.  بعد تحريك رؤوس الجمبرى اللى بـ تزين الطبق للجانب، ظهرت الرائحة العطرية للريسوتو الدسم المشبع بالصوص الأحمر، مع مرقة المأكولات البحرية فى الطبق. مع قطع من الجمبرى، والمحار، وقطع أستاكوزا صغيرة ولحم سمك أبيض لذيذ، قدرنا نستمتع بطعم رائع من القوام المميز مع النكهات البحرية الممتعة.

نروح على الحلو، تيراميسو تحفة (50 جنيه) قُدم فى كأس كوكتيل مع طبقات من الكريمة الخفيفة، أصابع الست وحشو غنى من السبريسو. مع كمية كبيرة من مسحوق الشوكولاتة على الوجه، التيراميسو كان نهاية سعيدة لوجبة لذيذة.

صحيح الأسعار غالية حبتين، بس ليوناردو بـ يقدم أطباق إيطالية هائلة، مع نكهات لذيذة وكميات أكل كبيرة، والأكيد أنك هـ تمشى مبسوط.