The Definitive Guide to Living in the Capital , Cairo , Egypt

بالرغم من أننا مش من هواة السلف في المجمل، إلا أن واقعيًا ظروف كثير بتحطنا في موقف نكون محتاجين فيه مبلغ كبير لأي سبب من الأسباب؛ جواز، عربية أو حتى سفرية. من هنا تيجي فايدة القرض الشخصي، وهو ببساطة شديدة أنت بتستلف من البنك مبلغ بيتحدد على أساس دخلك الشهري ومعاملاتك المصرفية الأخيرة، وبتتفق معاه على مدة تسدد في خلالها المبلغ على أقساط –وطبعًا كل بنك له شروطه ومزاياه.

في المقال ده هنقول لك على المستندات المطلوبة والبنوك اللي تقدر تاخد منها قرض شخصي. هنبدأ بمجموعة الشروط العامة وهي برضه بتختلف من بنك للثاني، يعني فيه بنوك ما بتقدمش قروض لغير المصريين، ومعظمها بتشترط أن صاحب القرض يكون سنه مش أقل من 21 سنة ومش أكثر من 60 سنة. وفيه بنوك ما بتقدمش قروض لغير العاملين بالقطاع العام وهكذا.

إيه المستندات المطلوبة طيب؟

بطاقة الرقم القومي أو جواز سفر لغير المصريين –ممكن كمان يتطلب من الأجانب إقامة سارية. وطبعًا لازم البطاقة أو جواز السفر يكونوا ساريين.

فاتورة خدمات، اللي هي بالبلدي وصل نور أو غاز أو حتى فاتورة تليفون. وهنا كل بنك بيبقى عنده حد أدنى لقيمة الفاتورة علشان يقبلها منك؛ يعني مثلًا فيه بنوك بتقول إحنا مش بنقبل وصل كهرباء قيمته أقل من 10 جنيه، وهكذا.

مفردات المرتب، علشان يضمن أن لك دخل ثابت.

خطاب موافقة من شغلك لتحويل مرتبك على البنك اللي هتاخد منه القرض. ودي بتختلف من بنك للثاني، فيه بنوك بتشترط أنك لازم تحول مرتبك عليهم علشان يديك القرض، وفيه بنوك بتسيبها اختياري. فلو أنت مش عايز تحول مرتبك على البنك، هيتطلب منك أنك تقدم كشف لتعاملاتك المصرفية اللي عملتها في آخر 3 شهور، أو بيانات بالمرتب لآخر 3 شهور.

الكلام ده لو أنت بتشتغل في مكان، أما لو أنت من أصحاب المهن الحرة أو الشركات، فبجانب البطاقة والفاتورة فالموضوع ممكن يختلف من بنك للثاني في عدد المستندات المطلوبة ولكن الثابت أنك لازم تقدم الآتي:

صورة من السجل التجاري، علشان تثبت عدد السنين اللي قضتها في المجال.

بطاقة تجارية سارية.

ده غير أن ممكن يتطلب منك كشف حساب بنكي –شخصي أو باسم الشركة.

خد بالك كمان أن شريحة أصحاب المهن الحرة زي الأطباء والمهندسين مثلًا ممكن يتطلب منهم بطاقة نقابية، أو المهن الثانية اللي يتطلب تصريح لممارستها هيتطلب منك التصريح ده، وأخيرًا أساتذة الجامعة هيتطلب منهم تقديم بطاقتهم الجامعية.

المهم حاولنا نجيب لك الشروط بشكل عام، الجزء ده من المقال هانقول لك فيه عن بنوك تقدر تقترض منهم:

 

البنك التجاري الدولي – CIB:

القرض بيبدأ عندهم من أول 5000 لحد مليون، وبيتأمن على حياتك لحد انتهاء مدة القرض. ومدة السداد بتبدأ من سنة لحد عشر سنين. تقدر تشوف بقيت المزايا والشروط بالتفصيل من هنا.

 

HSBC:

بيوصل القرض عندهم لحد 750 ألف جنيه، وتقدر ترفع من قيمة القرض –ما تنساش أن المبلغ ده بيتحدد عن طريق دخلك الشهري- ده غير ممكن تحصل على بطاقة ائتمانية مجانًا من غير رسوم السنة الأولى، بقية التفاصيل هنا.

 

البنك العربي – Arab Bank:

قرضه بيوصل لـ 600 ألف، ولك تأمين على حياتك بالمجان، ده غير أنك ممكن تعمل إعادة تمويل بعد 6 شهور، وممكن كمان تأجل الأقساط. شوف بقية التفاصيل هنا.