The Definitive Guide to Living in the Capital , Cairo , Egypt

مشكلة محلات مستحضرات التجميل أن
إما تلاقيها بـ تُباع رخيصة وجودتها قليلة، أو تلاقى الجودة عالية والأسعار غالية بزيادة،
ما كناش عارفين نوصل لحل وسط لحد ما محل «لا بوتيه – La Beaute» فتح.

محل «لا بوتيه» الموجود فى شارع سليمان
أباظة يستحق زيارة بكل المقاييس، المحل فيه كل حاجة من ماكياݘ لإكسسوار لعطور وكمان
مستحضرات للبشرة والشعر، وأهم حاجة أنهم بجودة عالية وأسعار معقولة جدًا.

أول كام متر من المحل هـ تحس أنك
في مدخل صيدلية كبيرة. مليان بمستحضرات تجميل أساسية، فيه شامبو بأسعار مناسبة
وكريمات للبشرة، وصبغات شعر مستوردة، مُعقم إيدين وwipes للوجه، وممكن كمان تلاقى فرش ماكياݘ
وسبونج وكل الأدوات بكل المقاسات وبأسعار كويسة.

المحل صغير شوية والممرات فيه ضيقة
لكن المساحات مستخدمة بشكل كويس جدًا، فعلى رف واحد لقينا مرايات بأحجامها واستخداماتها
معروضين فى حتة صغيرة، وأكبر مقاس فيها سعره مش أكثر من 25 جنيه، وكمان توك الشعر موجودة
بكل المقاسات والألوان وأسعارها بـ تبدأ من 5 جنيه. والقسم ده كل منتجاته جودتها
عالية جدًا.

وفى المحل هـ تلاقى ماسكات مستوردة
ومحلية، فيه ماسكات بالفاكهة وماسكات طبيعية للبشرة واخدة مكان كبير قوي فى أول قسم
في المحل، هـ تلاقى الماسكات المستوردة بـ85 جنيه والمحلية بـ11 جنيه، ممكن تسأل العاملين
فى المحل علشان يساعدوك تختار الماسك المناسب لنوع بشرتك.

ولو الاسترخاء عندك مزاج، هـ تلاقى
زيوت للمساݘ «سكرب – scrub»
(الكريم المحبب اللي بـ ينظف المسام) ولوف وكلهم بأسعار كويسة.

الماكياݘ والعطور واخدين أكبر
مساحة من المحل، فيه ستاندات كبيرة عليها كل أنواع الماكياݘ وبجودة عالية محلية ومستوردة
زى «لانكوم – Lancome»،
«إكس أو إكس أو – XOXO»،
«بيوثيرم – Biotherm»
وهـ تلاقى كمان علب مفتوحة من كل المنتجات لو عاوز تجربها في المحل قبل ما تشتريها.
موجود عندهم حاجات أساسية للاستخدام اليومي وماكياچ للمناسبات زي «أى شادو جليتر –
Eye-shadow glitter» و«بودر – powder».

العاملين فى المحل يقدروا يساعدوك
بنصائح فى الماكياݘ وكريمات العناية بالبشرة وكمان ممكن يدلوك لأماكن العناية
بالبشرة. الأسعار بـ تختلف حسب المنتج والماركة لكن الأكيد أنه أرخص من محلات ثانية
كثير.

«لا بوتيه» عنده منتجات كثيرة قوى
زى عطور للسيدات والرجال والأسعار مش مختلفة قوى عن المحلات الثانية زى «Faces»، و«مزايا»، بس المحل دائمًا بـ يعمل
تخفيضات فى الأسعار وعروض كثير، يعنى ممكن تشترى حاجة واحدة وتأخذ الثانية هدية. وعطر
«ديور – Dior»
ملفوف كهدية ممكن يوصل سعره لـ 800 جنيه.

الدور الثانى من المحل فيه لانـﭼيرى
حلو وشرابات وبيـﭼامات بأسعار مناسبة جدًا، وممكن تلاقى بيـﭼاما قطعتين مريحة بـ 2
جنيه.

«لا بوتيه» محل مختلف تمامًا عن محلات
مستحضرات التجميل الغالية، ممكن يكون المحل غير منظم شوية لكن هو مكان كويس جدًا وتقدر
تروحه لو عاوز تشتري مستحضرات أو تجيب هدية.

«لا بوتيه» أسعاره حلوة ومنتجاته جودتها عالية والخدمة كويسة. إحنا أكيد
محتاجين محلات أكثر زى «لا بوتيه».