The Definitive Guide to Living in the Capital , Cairo , Egypt

اللمبى وأطاطا:

ورجع لنا ثانى اللمبى.. وسته الرهيبة جدًا “ستى أطاطا” فى دوامة غريبة من نوعها وتكرار لفكرة البطل اللى أخذ “سوكسيه” بلغة المسرح واتفتن به الجمهور ففضل المنتج يشتغل على الشخصية لحد ما نحتها.

وتابعوا معانا من أول ما ظهر اللمبى فى شخصية هامشية فى فيلم الناظر إلى سلسلة أفلام شايلة اسم “اللمبى” ومن بعدها ظهرت أطاطا الشخصية اللى حققت جدل بالفعل فى السينما من طريقتها فى الكلام وصناعة كوميديا جديدة قائمة على طريقة التمثيل واللغة المختلفة والإفيهات الحاضرة والست الكبيرة فى السن لكنها القادرة على سحب البساط من تحت رجل أى بطل.

البطل:

هنا لازم نقف شوية أمام فكرة البطل اللى يا إما بـ يكون وحيد فريد من نوعه وكل البنات بـ تحبه أو رهيب بـ يقتل ويكسر كل حاجة.. البطل هنا نوعية مختلفة لأنه الممثل “محمد سعد” اللى قادر يمثل شخصيتين صعبتين ويبدع فى كل شخصية.. لكن اللى مش عاجبنا هو تكرار الشخصية فى كذا عمل وكأن إبداع شخصية جديدة أمر صعب.. وكأن استغلال شهرة شخصية ونجاحها هو معيار نجاح العمل مش السيناريو والإخراج وخلافه.

عن العمل:

الفكرة لطيفة بالفعل هى قائمة على “أطاطا” اللى دخلت السجن فى قضية مالهاش ذنب فيها والمجرمين الحقيقيين خارج السجن ومدير السجن -اللى بـ يلعب دوره “سامى العدل” بشكل جيد جدًا- عنده حفيدة تعبانة نفسيًا ومش عارف يعالجها وبـ تظهر أطاطا فى الحياة وبـ تشوفها “لميس” وبـ تحبها وبـ يظهر تحسن طفيف فى حالتها.. هنا بـ يلاحظ الدكتور المعالج ده وبـ يقرر أن لميس ممكن تتعالج عن طريق أطاطا وحكاياتها الكثير وطريقتها المشوقة فى الحكاية.. وبـ يعرض مدير السجن على المسجونة صفقة أنه هـ يحاول يدور على برائتها فى مقابل أنها تقعد مع لميس وتحكى لها الحكايات بتاعتها.

الحكاية:

الإفيه الكبير هنا أن الحكاية بـ تدور عن حفيدها “اللمبى” اللى بـ يدور على كنز سايبه والده له وهو فى القبو بـ يفتح باب بـ يؤدى لفجوة زمنية وبـ ينزل على العصر الجاهلى فى الجزيرة العربية وتحديدًا فى قبيلة “قريش”.

ولازم نقول أن كمية الكوميديا اللى خارجة من المفارقة دى بجد كبيرة جدًا وفيها إفيهات جديدة لأن الموقف جديد والمخرج مراعى اختيار الكادرات اللى بـ تبين قريش ناس عايشة حياة عادية وبـ تبيع وتشترى وكمان مراعى باقى الموتيفات زى الشعر والمبارزة والجوارى وصاحبات الرايات الحمر.. ودول اللى كانوا “نساء على شمال القبيلة” واللهم أننا صايمين بقى.

علشان تعرف مواعيد وقنوات عرض “فيفا أطاطا” زور “دليل كايرو 360 للتليفزيون فى رمضان“.