The Definitive Guide to Living in the Capital , Cairo , Egypt

معالم وسياحة

متحف النسيج المصري.. التاريخ مكتوب على القماش

بين القصرين شارع المعز متحف النسيج
متحف النسيج المصري.. التاريخ مكتوب على القماش
    بواسطة
    Omar Abd-elmaqsoud

    الصورة الرئيسية لـ: أحمد الششتاوي

    غالبًا وبنسبة كبيرة، كتير مننا ما يعرفش أو ماسمعش عن “متحف النسيج” الموجود في شارع المعز، واللي يعتبر تحفة أثرية فيها  – بجد- ريحة التاريخ المصري، ودليل وشهادة على براعة وتفوق الإيدين المصرية فى صناعة النسيج المصري على مر العصور، من أول الفراعنة، مرورًا بالعصر الروماني واليوناني والفن القبطي، ولحد فنون النسيج في العصور الإسلامية بدايةً من العصر الأموي، والعباسي، ولحد عصر الدولة الحديثة ودولة محمد علي.

    المتحف ده يعتبر أول متحف متخصص في تخليد تاريخ النسيج فى الشرق الأوسط، وهو قريبة جدًا من حى بين القصرين في شارع المعز، اللي هو أصلًا يعتبر متحف مفتوح للآثار الإسلامية.

    متحف النسيج مكون من دورين معروض فيهم منسوجات صناعتها وجودتها عليا جدًا، والدليل على كده إنها قدرت تحافظ على شكلها وجودتها ورونقها طول السنين اللي فاتت، وعلى مر عصور كتير.

    هتلاقي كل ركن في المتحف فيه قطعة قماش منسوجة مختلفة عن القطعة التانية سواء فى الشكل أو في الاستخدام، وكل قطعة وراها حكاية من فترة زمنية كانت موجوده فيها، وفىها رواية عن تاريخ مصر القديم والحديث.

    المعروضات الموجودة في المتحف اتجمعت من أكتر من مكان، منها المتحف المصري، ومتحف الفن الإسلامي، ومنطقة القرنة في مدينة الأقصر، واللي تعتبر من أشهر المناطق اللي فيها آثار مصرية، ده غير الفيوم والبهنسا.

    في ركن مخصص جوه المتحف لقطع القماش والمنسوجات المستوردة، وهتلاحظ إن موديلاتها وطرازاتها بترجع للعصر الإيراني الصفوي، وقطع كمان من دول عربية مختلفة زي العراق واليمن.

    لو حابين تتعرفوا أكتر على “متحف النسيج”.. ممكن تدخلوا على الصفحة الرسمية للمتحف على الفيس بوك من هنا.

    مقترح