The Definitive Guide to Living in the Capital , Cairo , Egypt

الحياة في كايرو

دليلك لويك إند سعيد: حفل محمد منير ومسار إجباري وشارموفرز وأتوستراد وفيلم ذيب

دليلك لويك إند سعيد: حفل محمد منير ومسار إجباري وشارموفرز وأتوستراد وفيلم ذيب
    written by
    Cairo 360

    اليوم اللي ما بتجربش فيه حاجة جديدة ما تحسبوش من عمرك، أحسب الأيام اللي بتكون مبسوط فيها بس، هتكتشف أنك ممكن تكون عيشت أسبوع واحد بس مثلًا. علشان كده إحنا بنشجعك تجرب حاجات جديدة وده اللي بنوفره في دليلك لويك إند سعيد.

    ونبدأ بيوم الخميس، وعلى مسرح دار أوبرا جامعة مصر بمدينة السادس من أكتوبر فيه حفل غنائي للملك محمد منير، والبوابات  هتفتح من الساعة 4:00 مساءً. كمان مسرح الضمة بوسط البلد فيه حفل غنائي لفرقة الوزيري الإسماعيلاوية، واللي بتقدم الفن الشعبي السواحلي لجمهورها، وسعر التذكرة 30 جنيه. أما على مسرح الغد بالعجوزة  ففيه عرض مسرحي بعنوان "الحضيض" من تقديم فريق مسرح كلية الهندسة بجامعة القاهرة. وفي أوزيريس آرت سبيس بجاردن سيتي  هتلاقوا عرض للفيلم العربي "ذيب"، وسعر دعوة الحضور 25 جنيه. ولمحبي الموسيقى خلوا بالكم أن فعاليات مهرجان القاهرة الثامن للجاز من يوم الخميس 20 أكتوبر ولحد السبت 22 أكتوبر في الحرم اليوناني بوسط البلد.

    وننتقل ليوم الجمعة، ومهرجان "Vibe" الأول للموسيقى في حديقة الحرية بالزمالك، المهرجان هيضم ثلاثة من أكبرالفرق في وسط الموسيقى المستقلة، مسار إجباري وأوتوستراد وشارموفرز، وسعر تذكرة الحضور 150 جنيه. وفي ساقية الصاوي  فيه حفل للإنشاد الديني للمنشد مصطفى عاطف، وسعر التذكرة 30 جنيه. أما في مسرح الفلكي بالجامعة الأمريكية بالتحرير فيه عرض فني للثنائي وائل سامي الخولي وباسكال فيجلينو يحمل اسم "خارج الصندوق"، وسعر تذكرة الحضور 20 جنيه. كمان فيه في روم آرت سبيس بجاردن سيتي حفل موسيقي لدعسوقة باند، وسعر تذكرة الحضور 50 جنيه.

    ونختم بيوم السبت، وهتلاقوا في قاعة النهر بساقية الصاوي حفل لفرقة "الإخوة أبو شعر" واللي بتقدم الإنشاد الصوفي الشامي والابتهالات والمديح، وسعر التذكرة 40 جنيه. ومن ضمن سلسلة فعاليات "مزيكا في السطح" هيستضيف درب 17 18 بمنطقة مجمع الأديان بمصر القديمة حفل موسيقي لعرض مزيج من الألحان التركية مع ألوان موسيقية مختلفة بتنتمي لمناطق وثقافات مختلفة، وسعر تذكرة الحضور 50 جنيه. ولمحبي المسرح  هتلاقوا في مسرح الهوسابير عرض مسرحي باسم "المخطوطة" هتقدمه فرقة "500 ب" المسرحية، وسعر تذكرة الحضور 20 جنيه. برضه في مسرح الهناجر بدار الأوبرا المصرية فيه عرض مسرحي بعنوان "الخلطة السحرية للسعادة" في موسمه الثاني بعد نحاجه في موسمه الأول، وسعر تذكرة الحضور 20 جنيه، و10 جنيه للطلبة.

    لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.

    ويك إند سعيد!

    recommended