النهارده في القاهرة: فعالية جري جماعي وحفل باليه وسهرة موسيقية وعرض سينما
Cairo 360
الثلاثاء مؤخرًا بقى مثبت معانا كام فعالية من اللي القلب يحبهم، فبقينا نبدأ جولتنا في فعاليات القاهرة ثلاثاء كل أسبوع وإحنا مطمنين وعارفين أن الأذواق كلها مرضية، والرغبات كلها متغطية.
البداية لفعالية قلنا لكم وهنقول تاني أننا منحازين ليها، فعالية الجري الجماعي اللي بتنظمها مجموعة "Night Runners" بانتظام في نفس الوقت من كل أسبوع، الجرية المرة دي هتكون على تراك مركز التنمية الرياضية بشيراتون، وباب المشاركة كالعادة مفتوح للجميع، والبداية في تمام السابعة مساءً.
تاني الفعاليات واللي بقت برضه موعد أسبوعي ثابت هتكون من سينما دكة في المقطم، التابعة لمؤسسة التعبير الرقمي العربي "أضف"، وجولة أخرى من جولاتها في الإنتاج السينيمائي لثقافات مختلفة، المرة دي هيعرضوا لنا فيلم "Of God and Men"، والدعوة عامة، والبداية في تمام السادسة والنصف مساءً.
وييجي اليوم يتقل أوي وترجح كفته بالعرض اللي هيبدأ النهارده في دار الأوبرا لباليه "كارمن"، العرض هيستمر للجمعة الجاية بشكل يومي في نفس المعاد، 8:00 مساءً على المسرح الكبير، وأسعار تذاكر حضوره 150، 200، 250 جنيه.. خبر سعيد جدًا أكيد لهواة الفنون الاستعراضية الكلاسيكية.
ونختم بساقية الصاوي اللي هتستضيف سهرة موسيقية مميزة شايلة عنوان "ليلة جاز شرقي" مع الفنانة داليا فريد، الحفل هيبدأ في تمام الثامنة مساءً على مسرح قاعة الحكمة، وأسعار تذاكر حضوره 35 و 55 جنيه.
ثلاثاء سعيد.
recommended
Arts & Culture
A Literary Sanctuary: 6th Round of Cairo Literature Festival This April
Al Ghuri Authors +3
Arts & Culture
