The Definitive Guide to Living in the Capital , Cairo , Egypt

مطاعم
جريس كلوب – Greece Club

جريس كلوب: مطعم وكافيه بطابع يوناني في أرض الجولف

reviewed by
Waleed Abuarab
rate it
review it
جريس كلوب: مطعم وكافيه بطابع يوناني في أرض الجولف
أرض الجولف وشارع النزهة من أرقى وأهدأ مناطق مصر الجديدة، لو فيه علامة مميزة للمنطقة دي هـ تبقى الكافيهات والمطاعم الهادئة برضه. تعودنا رجلينا توجهنا هناك أول ما نكون بـ ندور على مكان يجمع بين صفات الهدوء والبساطة والرقي، وكأن كل أصحاب المحلات في المنطقة دي اجتمعوا على الـ 3 صفات دول. حتى مجموعة الكافيهات اللي كانت ناحية عمارات السعودية في المنطقة دي وكانت صاخبة إلى حد ما بدأت تقفل أبوابها بالتدريج وبقيت نوعية الكافيهات اللي قولنا عليها.

كافيه ومطعم «جريس كلوب – Greece Club» موجود في مواجهة مبنى الرقابة الإدارية، في منتصف الكوبري الموجود بشارع النزهة، قريب من مطاعم «التكية» و«لا تندا». لوجو كبير بألوان علم اليونان الأزرق والأبيض، والكافيه له مدخل من شارع جانبي من شارع النزهة الرئيسي. المكان من الداخل أشبه بطرقة طويلة على جوانبها الترابيزات، والجدارن كلها زجاجية شفافة، وأماكن الجلوس مش كثيرة ولا حجم الكافيه نفسه كبير، لكن في نفس الوقت حسينا أن القعدات مريحة والمسافات كافية بين الترابيزات، وبدأنا نتأمل الديكور والتابلوهات المكتوب عليها بالحروف اليونانية وفيها صور لمراسي وبحار في اليونان، وعلم اليونان بـ يزين أحد الجدران المواجهة لنا، وشاشات التليفزيون بـ تعرض مباريات الدوري الأوربي، وفيه ستاند عليه عدد من المجلات والنشرات، وفيه شاشة أصغر حجمًا في أحد الأركان مخصصة للعب البلاي ستيشن (الساعة بـ 25 جنيه) وموسيقى بوب التسعينيات في الخلفية (3 أغاني بـ يتم تكرارهم بطريقة مستفزة) بس ممكن تفصل نفسك من الموود ده زي ما إحنا عملنا وتدخل أونلاين من الـ Wi-Fi المجاني في المكان وتحط السماعات في ودنك وتسمع أي حاجة مختلفة. غير كده القعدة ظريفة في «جريس كلوب» أو حرفيًا “نادي اليونان” مش “النادي اليوناني”.
منيو عالمي تقليدي، مش يوناني ولا حاجة، ساندويتشات وباستا وأطباق رئيسية ومقبلات وسلاطات وشوربات وآيس كريم وسموزي وميلك شيك وشيشة. بداية بطبق مقبلات متنوعة فيه كبد دجاج “ما عجبتناش بصراحة” وبطاطس محمرة وقطع دجاج تندر مع عسل المسطردة (34 جنيه) كان بداية ضعيفة وندمنا أننا طلبنا الطبق ده بدل أي نوع من السلاطات الفريش. مافيش حاجة معينة مغرية علشان نجربها في المنيو، فكالعادة لجأنا للجرسون يقول لنا اقتراحاته في الأكلات، ورشح لنا طبق دجاج “فان بلانكت – Van Blanket” مع الأرز والخضار السوتيه (52 جنيه) وهو قطع الصدور المخلية المدخنة عليها صوص الكريمة والمشروم. ما حسيناش بطعم مميز قوي أو مختلف زي ما اسمها أوحى لنا، بس ما ننكرش أن الطبق على بعضه كان لذيذ والكمية فيه كبيرة، وفيه إتقان في المذاق وطريقة التقديم. طبق ثاني من اختيارنا هو السكالوب بانيه مع الباستا بالصوص الأبيض (60 جنيه) وفيه قطع سكالوب كبيرة ومستوية كويس جدًا وطعمها حلو. ورغم بعض التأخير في تقديم الأكل، إلا أن الجودة ومستوى الأكل شفع لهم وشجعنا أننا نطلب عصير أو آيس كريم.
كوكتيل Greek Island فيه جوافة وفراولة ومانجو كان لذيذ وفريش (20 جنيه)  وطلبنا آيس كريم شوكولاتة لكن الجرسون فهم غلط وجاب لنا آيس تشوكليت أو عصير شوكولاتة مثلج (20 جنيه) واعتذر لنا عن سوء الفهم بس إحنا ما اعترضناش وشربنا الشوكولاتة المثلجة اللي كانت رائعة لدرجة نسيتنا إحنا أصلًا كنا طالبين إيه.
تجربتنا في «جرييس كلوب» كانت جيدة جدًا، وحبينا مستوى الخدمة ونظافة المكان والعناية به، زيارتنا الجاية هـ تكون للعب البلاي ستيشن ولا مانع من بعض السبريسو والموكا الساخنة.

360 Tip

ممكن تتصل تحجز البلاي ستيشن علشان تروح تلعب على طول.

Best Bit

الأسعار معقولة والقعدة هادئة لدرجة أن كان فيه ناس قاعدة تذاكر جنبنا.

Worst Bit

مافيش فيزا كارد، مافيش بيتزا!

Write your review

Leave a Reply

You must be logged in to post a comment.

recommended