في شارع أبو داوود الظاهري المتفرع من شارع مكرم عبيد في مدينة نصر، وبعد صيدلية أفريقيا بخطوتين هـ تلاقي مطعم مكون من دورين له إضاءة خارجية هادئة وتصميم شيك يوحي بجو راقي وجودة عالية في كل حاجة، ده كان مطعم «أورينتال جريل أيلاند – Oriental Grill Island» المشهور بالمشويات والأكلات على الجريل، لكن اللي عرفناه بمجرد دخولنا من باب المحل أن الدور الأرضي بـ يعتبر نفسه مطعم ثاني مستقل اسمه «7 Days» متخصص في البيتزا، وواحد من العاملين سألنا أول ما دخلنا إذا كنا عاوزين «أورينتال جريل» في الدور العلوي ولا «سيـﭭين دايز بيتزا» في الأرضي؛ فسألناه إذا كان ممكن نقعد في الدور العلوي ونطلب من المكانين لأننا كنا مجموعة كبيرة وكل واحد برأي! فقال لنا مافيش مشكلة لكن العبرة بالأغلبية، يعني العدد الأكثر من المجموعة هـ يطلب منين. لكن كان واضح أن فيه مشكلة! واحنا مش عارفين إيه الهدف من التقسيم خاصة أن المبنى من الخارج مش عليه أي يافطة بـ تقول أن فيه حاجة غير «أورينتال» باستثناء لافتة صغيرة على ستاند جنب الباب مكتوب عليها "بيتزا سيـﭭين دايز" وكنا فاكرينها مجرد تعريف أن المكان بـ يقدم بيتزا طول أيام الأسبوع!

ديكور المحل أنيق جدًا ولو قعدت جنب الزجاج في الدور العلوي هـ تشوف منظر جميل للشارع، وواضح أن المطعم قاصد يقدم خدمة مميزة وراقية زي ما كان مكتوب على المنيو وبأسعار منافسة للمطاعم المشابهة في المستوى، وإحنا شايفين أنه ناجح في ده إلى حد كبير.

المنيو سهل وواضح مقسم مشهيات وشوربات والأرز وسالاد بار بـ 15 جنيه، وبعد كده كله أطباق رئيسية زي البيكاتا والفاهيتا والستيك والباستا والفراخ على الجريل وفتة بالموزة أو باللحم والمشويات المشكلة. كل الأطباق الرئيسية بـ تُقدم مع خضار سوتيه وبطاطس محمرة. جربنا معظم الأطباق في المحل لأننا كنا مجموعة كبيرة. بدأنا ببعض المقبلات زي الكبيبة (13 جنيه) والسمبوسك (10 جنيه) وكل طبق كان فيه 3 قطع وكان طعمهم عادي، وورق العنب (13 جنيه) جاء لنا بارد شبه المزات وشوربة الطماطم الساخنة (10 جنيه) كانت معقولة، والأرز الشرقي بالمكسرات (10 جنيه) كان مفلفل وكثير وأحسن حاجة كانت السلاطات المتنوعة علشان كانت فريش جدًا. البيكاتا بالمشروم (59 جنيه) كانت لذيذة رغم أن الصوص كان أكثر من اللازم، والطبق نفسه كان شكله يضحك لأنه كان عبارة عن مستطيل طويل شبه الحوض ومليان بطاطس مقرمشة وخضار كثير. الباستا الألفريدو بالصوص الأبيض والفراخ والمشروم (48 جنيه) كانت مش حلوة خالص لكن الكمية كانت كبيرة، وكانت ناقصة توابل كثير. الحاجة المميزة اللي ما كانش عليها كلام هي المشويات وفيه منها حجمين للأطباق: الكلاسيك مكس (43 جنيه) والمكس جريل الكبير (50 جنيه) والفرق هو قطع كفتة وريش أكثر شوية، وفيه طبق عبارة عن نصف فرخة مشوية على الجريل مع البطاطس (30 جنيه). في المشويات المستوى مختلف تمامًا وطعم أحلى بكثير من أي أكل ثاني في المحل "أو المحلين" والأسعار ممتازة بالنسبة للكميات والخدمة المصاحبة. وعن تجربة بلاش قطع الفراخ الفيليه على الجريل لأنها مش حلوة زي الفراخ المشوية العادية.

جربنا كمان البيتزا من «سيـﭭين دايز»، سوبر ديلوكس (34 جنيه) زي السوبر سوبريم كده وعليها كل الإضافات كانت حلوة ورقيَّقة ومكوناتها طازجة، إنما النجرسكو (23 جنيه) كان فيه مشكلة في الطعم وفي المكونات كمان ومش بـ ننصح أي حد به.

الخدمة جيدة رغم أن فاتورة الحساب تأخرت كثير قبل ما تيجي لنا، لأن كل مطعم عمل فاتورة منفصلة بخدمة وضريبة منفصلين. ولاحظنا مشكلة في نظافة الحمامات خاصة الحريمي، لكن هي محتاجة شوية عناية مش أكثر علشان تكتمل الصورة الجميلة للمكان.

«أورينتال جريل آيلند» اختيار جيد لو ناوي تأكل مشويات، و«سيـﭭين دايز» اختيار هائل للبيتزا فقط، والقعدة حلوة فوق وتحت.